Nyabihu: Abangavu basaga 200 batewe inda mu mezi icyenda mu 2020

Yanditswe na N.Kubwimana Janvière
Kuya 24 Ugushyingo 2020 saa 11:00
Yasuwe :
0 0

Abana b’abakobwa bari munsi y’imyaka 18 bo mu mirenge itandukanye yo mu Karere ka Nyabihu bagera kuri 219 batewe inda mu gihe cy’amezi icyenda gusa muri uyu mwaka wa 2020.

Iyi mibare yatangajwe kuri uyu wa 24 Ugushyingo 2020, ubwo inzego zitandukanye zo mu Karere ka Nyabihu, inshuti z’umuryango, Umuryango Hope and Home for Children ufite mu nshingano kurengera umwana n’abandi, bigaga ku ngamba zo kurwanya ihohoterwa rikorerwa abana no guharanira ko buri wese arererwa mu muryango.

Bamwe mu bafite mu nshingano kurengera uburenganzira bw’umwana bavuga ko bimwe mu bituma bahohoterwa bikanabaviramo kubyara imburagihe biterwa n’ababyeyi birengagiza inshingano zo kurera n’abimana amakuru y’ubuzima bw’imyororokere.

Niwezina Emelence, umurezi akaba n’inshuti y’umuryango yavuze ko guhangana n’ikibazo cy’abagabo bahohotera abana bakabatera inda bisaba ubufatanye bw’inzego zose.

Yagize ati ‘‘Ababyeyi bakwiye kumenya kuganiriza abana ku mihindagurikire y’umubiri wabo n’uko bakwitwara, mu by’ukuri turahangayitse ku bw’aba bana batewe inda. Tugiye kongera ubufatanye by’umwihariko ariko n’itegeko ryubahirizwe ku batwangiriza abana.’’

Umukozi mu Muryango Mpuzamahanga urengera abana, Hope and Home for Children, Munyamariza Moïse, agaragaza ko kuba hakiri abana batarererwa mu miryango ari kimwe mu bitanga icyuho bigatuma bahohoterwa.

Yagize ati ‘‘Twibanda mu gushyira imbaraga no gukumira itandukana ry’umwana n’ababyeyi mu gukomeza gukumira ihohoterwa ribakorerwa, kuko umwana warerewe mu muryango n’utararerewemo baratandukanye cyane. Mu muryango niho umwana abonera iby’ingenzi bizatuma yigirira akamaro, turasaba ababyeyi kubungabunga umwana aherwe uburere mu muryango, bityo banabarinde iryo hohoterwa bakorerwa aho kuba ntibindeba.’’

Umuyobozi w’Akarere ka Nyabihu wungirije ushinzwe Imibereho myiza y’Abaturage, Simpenzwe Pascal, na we yibukije ababyeyi ko umwarimu wa mbere urema umwana akamushakira icyerekezo aribo bagomba kubigiramo uruhare.

Yagize ati ‘‘Umwarimu wa mbere uha icyerekezo umwana akamutegurira ejo hazaza ni umubyeyi, akenshi aba ahugiye mu kazi kenshi, yataha ntamenye ngo umwana yiriwe ate, yahoranye nande, ngo amenye amakuru ahagije. Aha hanava ihohoterwa bakorerwa, kugaburira umwana ntibihagije ugomba kumenya n’uburyo abaho.’’

‘‘Ikindi umuryango mugari wiyambuye inshingano, umubyeyi yapfa asize umwana, umuryango ukamutererana ngo ajye mu bigo by’imfubyi, dukwiye guhuriza hamwe mu guhangana n’iki kibazo tukarengera abana bacu.’’

Mu Karere ka Nyabihu habarurwa abana bagera kuri 219 batewe inda bari munsi y’imyaka 18 mu gihe cy’amezi icyenda ya 2020, mu gihe mu ibarura ryakozwe mu myaka ibiri ishize hagaragaye abangavu 462 nabo babyaye bataruzuza imyaka y’ubukure.

Umuyobozi w'Akarere ka Nyabihu wungirije ushinzwe Imibereho myiza y'Abaturage, Simpenzwe Pascal, yasabye abayobozi n'abakora mu bijyanye no kurengera abana kwegera ababyeyi bakabereka uruhare bafite mu burere bw'abato
Abayobozi batandukanye n'abafite aho bahurira no kurengera uburenganzira bw'umwana biyemeje kongera ubufatanye mu guhangana n'ikibazo cy'abahohoterwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .