NURC yavuze ku mpungenge z’imyitwarire y’abafungiwe icyaha cya Jenoside bagiye gufungurwa

Yanditswe na Twarabanye Venuste
Kuya 23 Nzeri 2019 saa 06:04
Yasuwe :
0 0

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge (NURC), Ndayisaba Fidèle, yamaze impungenge abibaza ku myitwarire izaranga abagororwa bagiye gusubira mu buzima busanzwe, avuga ko igihe bamaze bagororwa kitari ubutembere.

Mu 2018 nibwo byamenyekanye ko hari umubare munini w’abagororwa bagiye gusoza ibihano ku cyaha cya Jenoside yakorewe Abatutsi muri Mata 1994.

Abayirokotse n’imwe mu miryango iharanira inyungu z’abacitse ku icumu rya Jenoside, batangiye kugaragaza impungenge ku myitwarire y’abo bagororwa, igihe bazaba bagarutse mu buzima busanzwe.

Ndayisaba yavuze ko impungenge bagaragaje zumvikana bitewe n’isura babafiteho batarajya kugororwa ariko yibutsa ko hari undi mubare w’abakoze icyo cyaha bamaze gufungurwa bakaba babanye neza n’abandi mu buzima busanzwe.

Imibare ya Komisiyo y’Ubumwe n’Ubwiyunge yo guhera muri Mata uyu mwaka wa 2019 igaragaza ko abagororwa bafungiye muri Gereza z’u Rwanda kubera icyaha cya Jenoside bagera ku bihumbi 27 600.

Ndayisaba agasobanura ko uyu mubare urimo abakatiwe burundu batazafungurwa bityo ko abategereje kuva muri gereza ari bo bake ugereranyije n’abarangije ibihano byabo bagafungurwa.

Ati “Twibuke ko abakatiwe kubera icyaha cya Jenoside ni ibihumbi magana, bivuze ko abenshi barangije ibihano byabo barafunguwe bari mu baturage. Abasigaye muri gereza nibo bake.”

Avuga kandi ko nubwo abagororwa bataba baragorotse ijana ku ijana igihe bamaze kitari ugutembera

Ati “Abantu bakoze ibyaha iyo bagiye kugororwa si ugushyirwa mu kabati aba agiye kugororwa. Nagira ngo icya mbere duhumurize abantu bamenye ko bagorowe, kuvuga ko bagororotse ijana ku ijana, [kami ka muntu ni umutima we] ariko bamaze igihe bagororwa. Amaze imyaka myinshi atari mu bukerarugendo, amaze imyaka myinshi mu kugororwa kugira ngo ategurwe kuzasubira mu muryango nyarwanda abana n’abandi neza.”

Ndayisaba asobanura ko ikindi gishobora kumvikanisha impungenge ari uko umubare munini w’abo bakiri muri Gereza bitegura gusoza ibihano, ari ababanje guhunga ubutabera, gusa akavuga ko gahunda zo gukomeza kubafasha kuba mu muryango Nyarwanda zizabageraho nabo zigaherekeza amasomo bafashe mu gihe cyo kugororwa.

Ati “Kuba abantu bagira impungenge hari icyo umuntu yakumva […] harimo abafashwe nyuma babanje kuruhanya, babanje kwihishahisha; haba mu mahanga cyangwa mu gihugu bakaba baratangiye kurangiza igihano cyabo bitinze ikaba ari yo mpamvu nyuma y’imyaka 25 u Rwanda rubohowe bakiri muri Gereza”.

Mu 2018 nibwo byatangiye kuvugwa ko abagororwa bamaze imyaka myinshi bafungiye icyaha cya Jenoside bagiye gufungurwa. Komisiyo y’Ubumwe n’Ubwiyunge ivuga ko kuva icyo gihe Uturere twatangiye gusura abagororwa batwo bari muri Gereza zitandukanye kugira ngo babaganirize bababwire ko abari hanze babiteguye.

Ndayisaba Fidèle, yamaze impungenge abibaza ku myitwarire izaranga abagororwa bagiye gusubira mu buzima busanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza