“Ntitwigisha abana b’abakobwa kuba inshinzi, tububakamo ubushobozi”

Yanditswe na Ishimwe Israel
Kuya 2 Nzeri 2018 saa 11:31
Yasuwe :
0 0

Umuryango wa Generation Rise wasoje icyiciro cy’abakobwa 30 biga mu Rwunge rw’Amashuri rwa Gahanga I muri Kicukiro umaze umwaka uhugura mu kububakamo icyizere n’ubushobozi.

Ibi birori byabereye muri Innovation Village muri Isomero Rusange rya Kigali ku Kacyiru, ku mugoroba wo ku wa 31 Kanama 2018.

Generation Rise yita ku burezi bw’umukobwa imufasha kugira ubumenyi bumuganisha ku ntego z’ubuzima, kwitinyuka, kwigirira icyizere no kuvugira mu ruhame. Bahabwa amasomo y’imiyoborere no gusoma ibitabo birimo inyigisho z’ubuzima.

Abahuguwe berekanye impano zabo mu mbyino gakondo, gusiga, ikinamico no kuririmba. Ubutumwa batanze bwibanze ku muco wakumiraga umwari ariko akaba yarasubijwe ijambo.

Mahoro Rebecca wiga mu Ishami ry’Imibare, Ubumenyi bw’Isi n’Icungamari, yavuze ko yatinyuwe mu rugendo rwo gukuza impano ye yo kuririmba.

Yagize ati “Generation Rise baradufashije cyane, baratuganiriza, batugira inama, batwumvisha ko dushoboye.”

Shirumuteto Régine wiga mu Ishami ry’Ubuvanganzo, Ikinyarwanda n’Igiswahili (LKK) yavuze ko “Naritinyutse birushijeho ndetse nshobora kuvugira mu ruhame. Mu ishuri amanota yariyongereye.”

Umuyobozi wa Generation Rise, Numuhire Caroline, yatangarije IGIHE ko bafasha abakobwa kwiyubakamo icyizere.

Yagize ati “Mu byaro twabonaga abakobwa bitinya, bava mu mashuri imburagihe, bikabaviramo izindi ngaruka mbi. Duhitamo abana bafite ibibazo byatuma bacikiriza amasomo, tukabashyira muri porogaramu ‘Your Voice Matters’ tukabigisha ko badakwiye guheranwa n’ibibazo. Imbogamizi zirahari ariko si ho ubuzima bugarukira.”

Umuyobozi wa Generation Rise, Numuhire Caroline, yatangarije IGIHE ko bafasha abakobwa kwiyubakamo icyizere

Yavuze ko hari abakobwa bamaze gutangiza imishinga yabo. Ati “Hari abatangiye imishinga mito aho baturuka nko guhinga imboga n’ibijumba bakabijyana ku isoko; abakoze amatsinda yo gusoma n’abatangiye kwandika inkuru. Ni ngombwa kubumvisha ko icyo batekereje bakigeraho. Ntabwo turi kwigisha abakobwa kuba inshinzi ahubwo turi kubabwira ko bakwiye kugira uburenganzira bw’ikiremwamuntu hatitawe ku ho baturuka n’amahirwe babonye.”

Umukozi wa Mineduc ushinzwe Uburezi bw’Umwana w’Umukobwa n’Iterambere ry’Uburinganire mu Burezi, Mitali Lydia, yavuze ko hari gahunda zashyizweho zorohereza uburezi bw’abakobwa.

Yagize ati “Mu burezi budaheza hashyizweho icyumba cy’umwana w’umukobwa, kibamo ibikoresho yifashisha mu kwezi kwe. Hari amabwiriza akumira ihohoterwa rishingiye ku gitsina. Umukobwa ntaragera aho kwitinyuka, Generation Rise irunganira gahunda za leta, ifasha uwashyiriweho uburyo bwiza bwo kwiga kubyaza umusaruro amahirwe yahawe.”

Ku kibazo cy’abana bava mu ishuri imburagihe, yavuze ko kizakemurwa n’ubufatanye bw’umuryango, leta n’abikorera.

Minisiteri y’Uburinganire n’Iterambere ry’Umuryango yatangaje ko mu 2016, abakobwa bari hagati y’imyaka 16-19 bagera ku 17 500 batewe inda zitateguwe, binabagiraho ingaruka zirimo no kuva mu ishuri.

Generation Rise yatangiye mu 2016. Ikorana n’Urwunge rw’Amashuri rwa APEKA n’urwa Gahanga I.

Byitabiriwe n'abantu b'ingeri zitandukanye
Umuyobozi wa Educate mu Rwanda, Donnalee Donaldson, ni we wayoboye ibi birori
Generation Rise ni umuryango ugizwe n'abantu batanu bafite intego yo kubaka ubushobozi bw'umwana w'umukobwa
Ibigo bikorana n'umwari n'umutegarugori byamurikaga ibikorwa byabyo
Abari bagize akanama nkemurampaka ni bo batanze ikiganiro kigaruka ku iterambere ry'umukobwa n'ingorane agihura na zo
Haririmbwe indirimbo zishingiye ku muco Nyarwanda
Baniyerekanye mu mbyino gakondo z'umuco Nyarwanda
Bakinnye ikinamico yitwa 'Tinyuka urashoboye' igaragaza ko umwana w'umukobwa yifitemo ubushobozi
Mahoro Rebecca w'imyaka 16 yagaragaje impano ye mu kuririmba, yishimirwa na benshi
Abagize akanama nkemurampaka bareba uko abanyeshuri bitwara mu ruhame
Nyinawumuntu Grace wahoze atoza Ikipe ya AS Kigali y'abakobwa, ari mu bamuritse ibikorwa by'Umuryango, Akwos, ugamije kongerera ubushobozi abagore biciye mu mikino
Rwemarika Félicité wahembwe na Komite Mpuzamahanga y’Imikino Olempike nk’umugore witabira siporo mu 2016 yashishikarije abakobwa bato kwiremamo icyizere
Shirumuteto Régine wiga mu Ishami ry’Ubuvanganzo, Ikinyarwanda n’Igiswahili (LKK) muri Rwunge rw'Amashuri rwa Gahanga I yavuze ko yarushijeho kwitinyuka
Umuhanzikazi Alyn Sano ari mu bitabiriye iki gikorwa cyagaragarijwemo impano z'abakobwa biga mu Rwunge rw'Amashuri rwa Gahanga I
Umukozi wa Mineduc ushinzwe Uburezi bw’Umwana w’Umukobwa n’Iterambere ry’Uburinganire mu Burezi, Mitali Lydia, yari mu kanama nkemurampaka katanze amanota ku bahatanye
Umutoni Melissa uri mu bayobozi ba Generation Rise, yavuze ko abana b’abakobwa bo mu cyaro bakibangamiwe no kubona amakuru ahagije
Umuyobozi Mukuru w'Umuryango Mothering Across Continents, Vugayabagabo Jackson, yavuze ko uburenganzira bw'umwana w'umukobwa bugomba guhera mu muryango akomokamo
Umuyobozi wa Care International mu Rwanda, Musembi Bena, yavuze ko mu turere twose bashyizeho uburyo bwo kongerera ubushobozi umukobwa
Umuyobozi wa Educate mu Rwanda, Donnalee Donaldson, yanejejwe n'impano abamaze umwaka bahugurwa bagaragaje
Umuyobozi wa Generation Rise, Numuhire Caroline, yishimiye impano zagaragajwe n'abakobwa bahuguye
Yavuze imivugo ibiri irimo n'uwo yatuye Generation Rise yabahaye urubuga rwo kwitinyuka
Abitwaye neza bahembwe
Bafashe ifoto y'urwibutso nyuma y'ibirori

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza