Ntituzihanganira na rimwe uzanyuranya n’amahitamo y’abanyarwanda - Makuza

Yanditswe na HABIMANA James
Kuya 13 Mata 2019 saa 03:49
Yasuwe :
0 0

Perezida wa Sena, Bernard Makuza, yibukije ko Jenoside idashobora kuba mu gihe yaba idashyigikiwe na leta, kandi ibi ari nako byagenze mu Rwanda ku yakorewe Abatutsi kuko yari ishyigikiwe na leta mbi, avga ko abashaka kunyuranya n’amahitamo y’abanyarwanda yo kuba umwe batazihanganirwa.

Yabivuze kuri uyu wa Gatandatu ubwo hasozwaga icyumweru cyo kwibuka ku nshuro ya 25 Jenoside yakorewe Abatutsi, umunsi wahujwe no kwibuka abanyapolitiki bazize iyo Jenoside, wabereye ku Rwibutso rwa Jenoside rwa Rebero Akarere ka Kicukiro.

Makuza yavuze ko ubuyobozi bubi ari bwo bwatumye habaho Jenoside yakorewe abatutsi, gusa yongera kuvuga ko igihagarikwa hari byinshi byagombaga gukorwa.

Yagize ati "Turazirikana ko Jenoside ikimara guhagarikwa yadusigiye ibibazo by’ingutu kandi byose byarihutirwaga, leta yafashe umurongo mu kubanza kugarurira Abanyarwanda icyizere, ishyiraho icyerekezo gishingiye ku imiyoborere myiza ishingiye ku masomo twakuye mu mateka yacu."

Perezida wa Sena yagarutse ku buyobozi bwa Perezida Paul Kagame, avuga ko azahora ashimirwa ku cyerekezo cyiza adahwema kugaragariza Abanyarwanda, avuga ko ari ngombwa ko bibera imbaraga abatuye igihugu ndetse bakubakiraho n’ibirenze.

Makuza yagarutse ku bakomeje guhembera ingengabitekerezo ya Jenoside n’urwango, avuga ko ari abo kwamaganwa.

Yagize ati "Dukomeje kwamagana ibikorwa bigayitse byo gupfobya no guhakana byagaragaye, ni umwanya wo kugaragaza ko tutazahwema kwamagana ibi bikorwa aho byaba biri hose.”

"Ni umwanya wo kwibutsa ko tutazihanganira na rimwe uzanyuranya n’amahitamo y’abanyarwanda yo kuba umwe ndetse ko tutazahwema kurwanya ingengabitekerezo ya Jenoside n’ihakana n’ipfobya bya Jenoside yakorewe Abatutsi".

Urwego rw’Igihugu rw’Ubugenzacyaha, RIB, rwatangaje ko mu minsi ine ya mbere y’icyumweru cyo Kwibuka ku nshuro ya 25 Jenoside yakorewe abatutsi, rumaze kwakira ibirego 47 by’abantu baregwa ingengabitekerezo ya Jenoside.

Ibi birego 47 biregwamo abantu 47, muri abo 47 hamaze gufatwa 39 abandi umunani bacyabashakisha.

Depite Mukabunani Christine, uyobora ishyaka rya PS-Imberakuri, yavuze ko uyu ari umunsi abanyarwanda bibuka abanyapolitiki bazize ubutwari baharanira imiyoborere myiza nta vangura, gusa ashimangira ko bitaboroheye kubera ubutegetsi bwari bufite imbaraga.

Yavuze ko abagize ihuriro ry’imitwe ya politiki yemewe mu Rwanda, bafashe umurongo wo kurwanya urwango no kwigisha abakiri bato kurwanya ingengabitekerezo ya Jenoside.

Mu rwibutso rwa Rebero hashyinguye imibiri y’abatutsi irenga 14.000 bishwe muri Jenoside yakorewe abatusi, hanashyinguye kandi bamwe mu banyapolitiki bazize Jenoside.

Bamwe mu banyapolitiki bibukwa bashyinguye mu Rwibutso rwa Rebero harimo Kavaruganda Joseph, Ndasingwa Landouald, Niyoyita Aloys, Rwayitare Augustin, Kameya André, Rutaremara Jean de la Croix, Kabageni Vénantie, Kayiranga Charles, Nzamurambaho Fréderic, Ngango Félicien, Mushimiyimana J. Baptiste, Gafaranga, Gatabazi Felecien na Rucogoza Faustin.

Imiryango ifite ababo bashyinguye ku rwibutso rwa Jenoside rwa Rebero yashyize indabo ku mva zabo mu rwego rwo kubibuka
Minisitiri w'Ububanyi n'Amahanga Dr Richard Sezibera mu muhango wo kwibuka abazize jenoside yakorewe abatutsi
Minisitiri w'ubutabera Busingye yunamira inzirakarengane ziruhukiye mu rwibutso rwa Rebero
Minisitiri w'Ubutegetsi bw'igihugu Prof. Shyaka Anastase mu baje kwibuka abanyapolitiki bishwe muri Jenoside
Perezida wa Sena Bernard Makuza yunamira inzirakarengane zishyinguye mu rwibutso rwa Rebero
Umunyamabanga wa Leta muri Minisiteri y'ububanyi n'amahanga, Olivier Nduhungirehe
Minisitiri Busingye (ibumoso) na Minisitiri Nyirasafari
Umuhanzi Mariya Yohana yaririmbye indirimbo yo kwibuka abazize Jenoside yakorewe abatutsi
Umuyobozi w'Akarere ka Kicukiro Dr Jeanne Nyirahabimana
Umugaba w'Ingabo zirwanira mu kirere Gen.Maj Charles Karamba
Umuyobozi Mukuru wa Polisi y'u Rwanda wungirije ushinzwe ubuyobozi n'abakozi, DIGP Juvenal Marizamunda
Umunyamabanga Nshingwabikorwa wa CNLG, Dr Bizimana (ibumoso), Perezida wa Sena Makuza Bernard (hagati) na Minisitiri w'ubutabera Busingye (iburyo)
Umugaba Mukuru w'Inkeragutabara Lt.Gen Jacques Musemakweli aha icyubahiro abazize Jenoside yakorewe Abatutsi
Umuhanzi Munyenshoza yifatanya n'abandi kwibuka abazize Jenoside yakorewe Abatutsi mu ndirimbo

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza