Ntibyari byoroheye ingabo 600 za FPR Inkotanyi ubwo indege ya Habyarimana yaraswaga

Yanditswe na

Elisée Mpirwa

Kuya 2 Nyakanga 2014 saa 01:27
Yasuwe :
0 0

Mu gihe u Rwanda rwizihiza imyaka 20 ishize rubohowe, Ingabo z’u Rwanda zikomeje gahunda yo gusangiza abanyamakuru inzira ndende y’urugamba rwo kubohora igihugu, aho kuwa Kabiri hari hatahiwe amateka y’inzira ikomeye y’ingabo za FPR Inkotanyi zari mu Nteko ishinga amategeko (CND) mu rwego rwo kubahiriza amasezerano ya Arusha.
Brigadier General Charles Karamba uyobobora Ishuri rya gisirikare rya Nyakinama wari ufite ipeti rya kapiteni mu 1994 ni umwe mu basirikare 600 ba FPR Inkotanyi bari muri (...)

Mu gihe u Rwanda rwizihiza imyaka 20 ishize rubohowe, Ingabo z’u Rwanda zikomeje gahunda yo gusangiza abanyamakuru inzira ndende y’urugamba rwo kubohora igihugu, aho kuwa Kabiri hari hatahiwe amateka y’inzira ikomeye y’ingabo za FPR Inkotanyi zari mu Nteko ishinga amategeko (CND) mu rwego rwo kubahiriza amasezerano ya Arusha.

Brigadier General Charles Karamba uyobobora Ishuri rya gisirikare rya Nyakinama wari ufite ipeti rya kapiteni mu 1994 ni umwe mu basirikare 600 ba FPR Inkotanyi bari muri CND icyo gihe. Yatuganirije ku bihe bikomeye banyuzemo ubwo indege y’uwari Perezida w’u Rwanda, Juvénal Habyarimana yaraswaga.

Brig. Gen. Karamba yagize ati “Nyuma y’iminota nk’ine gusa indege ya Habyarimana imaze kuraswa mu ijoro ryo kuwa 6 Mata 1994, abasirikare ba leta bar i Kanombe batangiye kuturasaho ndetse n’abari ku Kacyiru bose bafatanya kuturasa. Ntibyari byoroshye kuko twari bake ugereranyije n’umwanzi. (...) Twafashijwe n’imbunda 12,7mm Anti-aircraft yari iri hano yadufashaga kurasa kure (igeza mu birometero bibiri) bityo tugasunika umwanzi ari nako ingabo ziri ku butaka zibasha kwigira imbere.”

Brigadier General Charles Karamba yari mu basirikare 600 ba FPR Inkotanyi (APR) bari muri CND

Umusirikare warashishaga iyi mbunda aracyariho, yitwa Major Rwabinumi David akaba icyo gihe yari afite ipeti rya Sergent. Ubu niwe muyobozi wungirije wa batayo ya 51.

Imbunda 12,7mm Anti-aircraft yagize uruhare runini mu kurwanya umwanzi yakorewe ishusho aho yari iteretse hejuru y'Inteko Ishinga Amategeko

Hafi y’inteko ishinga amategeko mu masangano y’imihanda yo ku Kimihurura, hari inkambi y’abasirikare barindaga Umukuru w’igihugu (Camp GP), ari nacyo kibazo gikomeye aba basirikare 600 bahuye nacyo ariko babasha kubanesha bafata ikigo.

Ku itariki ya 11 Mata 1994 nibwo aba basirikare babashije kubona ubutabazi ubwo batayo ya Alpha yabaga mu karere ka Gicumbi yasesekaraga i Kigali maze ibongerera ingufu babasha gufata uduce dutandukanye mu mujyi.

Koloneli wavuye ku rugerero Nyamurangwa Fred wari ufite ipeti rya Lieutenant Colonel waje gufasha ingabo 600 zari muri CND, ni we wayoboye ingabo zafashe uduce dutandukanye kuva ku Gisimenti, Kicukiro kugeza ku i Rebero.

Nyamurangwa yagize ati “Byadutwaye umunsi umwe gusa kugira ngo tugere ku i Rebero aho twahuraga n’interahamwe n’izi ngabo.”

Koloneli wavuye ku rugerero Nyamurangwa Fred wari ufite ipeti rya Lieutenant Colonel mu 1994

Mu gihe izi ngabo zarwanaga, zihutiraga no kurokora abantu batandukanye bari hafi y’agace zari ziherereyemo aho ndetse Minisitiri w’uburezi Dr. Biruta Vincent yarokowe mu ba mbere kuko yari aturanye neza na CND ndetse anagira uruhare runini mu kuvura inkomere zari muri iyi nyubako.

Kuri iyi nyubako ikoreramo Inteko ishinga amategeko y’u Rwanda ubu hagiye gutahwa ibishushanyo by’ubugeni byibutsa urugamba rutoroshye izi ngabo 600 zanyuzemo kugeza Jenoside yakorewe Abatutsi ihagaritswe tariki 4 Nyakanga 1994. Harateganywa kwandika amateka y’ibyebereye kuri iyi nyubako bityo ngo bifashe n’abo mu gihe kizaza kuzamenya neza inzira y’urugamba rwo kubohora igihugu

Brig. Gen. Karamba yitegereza Kigali yibuka ibihe bigoye banyuzemo mu myaka 20 ishize
Hejuru y'Inteko ishinga amategeko uba witegeye Umujyi wa Kigali wose

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .