Ntacyo mwageraho mutirinze ingeso mbi - Guverineri Gasana abwira urubyiruko rwihangiye imirimo

Yanditswe na Prudence Kwizera
Kuya 19 Ukwakira 2019 saa 07:57
Yasuwe :
0 0

Guverineri w’Intara y’Amajyepfo, CG Gasana Emmanuel, yasabye urubyiruko rwihangiye imirimo kwirinda ingeso mbi, ibiyobyabwenge no kwiyandarika kuko nta cyiza kirambye umuntu yageraho adafite imyitwarire myiza n’ikinyabupfura.

Yabivuze kuri uyu wa Gatanu ubwo yaganiraga n’urubyiruko rwo mu turere dutanu two mu Ntara y’Amajyepfo rwihangiye imirimo itandukanye irimo kudoda, gufuma, gukora imitako, guhinga kijyambere, ubukorikori, gukora umutobe n’iyindi.

Abo basore n’inkumi ni bamwe mu barenga ibihumbi 32 bahuguwe mu gihugu hose biciye muri gahunda ya Huguka Dukore Akazi Kanoze iterwa inkunga na USAID ku bufatanye na Education Development Center (EDC).

Guverineri Gasana yashimye ibyo bakora abasaba kongeraho kugira ikinyabupfura birinda ingeso mbi.

Ati “Hari byiza byinshi mumaze kwigezaho ariko ibyo byose ntabwo byaramba mudafite indangagaciro. Ntacyo mwageraho mutirinze ingeso mbi, mugomba kuba inyangamugayo, kutiyandarika, kwirinda ibiyobyabwenge no kwiyandarika. Urubyiruko rufite intumbero rurangwa n’ikinyabupfura rwirinda ingeso mbi.”

Gahunda yo guhugura urwo rubiruko yatangiye mu mwaka wa 2016; rwiganjemo abacikirije amashuri, abaturuka mu miryango ikennye, abakobwa babyariye iwabo n’abarangije kwiga ntibabone akazi.

Nubuhoro Jean de Dieu wo mu Karere ka Nyanza avuga ko nyuma yo guhugurwa yihangiye umurimo wo guhinga ibitunguru ahereye ku 5 000 Frw.

Ati “Naguze ingemwe z’ubutunguru ku mafaranga ibihumbi bitanu mbutera mu ntabire ingana n’igice cy’ikibuga cy’umupira w’amaguru; bumaze kwera nyuma y’amezi atatu narabugurishije nkuramo ibihumbi 160 Frw.”

Avuga ko yakomeje kubuhinga bimugeza ku gushinga iduka acururizamo, yiyubakira inzu yo kubamo y’amabati 53, agura n’ingurube abyiri zo korora.

Umuhoza Solange w’imyaka 22 wo mu Karere ka Kamonyi yarangije amashuri yisumbuye. Yafatanyije na bagenzi be bane bihangira umurimo wo gukora imitako mu birere n’indi yo mu ishinge n’ubudodo.”

Ati “Umutako umwe wo mu birere nkukora mu minsi itatu bintwaye amafaranga 1 200 nkawugurisha 3 000 Frw. Kimwe n’umutako umwe wo mu ishinge n’ubudodo nkukora mu minsi itatu untwaye 1 000 Frw nkawugurisha 3 000 Frw.”

Umuhoza na bagenzi be bakorana umwe yigenera umushahara w’ibihumbi 20 Frw buri kwezi andi bakayazigama.

Abihangiye imirimo bose baganiriye na IGIHE bahuriza ku kuba amahugurwa abahawe yarabatinyuye kuko ibyo bagezeho bumvaga batabishobora.

Umuyobozi w’umushinga Huguka Dukore Akazi Kanoze, Kamanzi Steven, yavuze ko mu barenga ibihumbi 32 bamaze guhugura muri bo abarenga 65% bamaze kwihangira imirimo.

Ati “Iyo turebye mu bo twahuguye barenga ibihumbi 32 mu gihugu hose, abarenga gato 65% bihangiye imirimo kuko turabakurikirana kugira ngo bashyire mu bikorwa ibyo twabigishije kandi nyuma y’amezi atandatu baba bamaze kubigeraho.”

Kamanzi yavuze ko umushinga wabo watangiye mu 2016 ukaba uzarangira mu 2021 bamaze guhugura urubyiruko ibihumbi 40 mu turere 25 tw’igihugu.

Abayobozi batandukanye bitegereza bimwe mu byo urubyiruko rukora
Bagaragaje ko basanze ubuhinzi bw'ibihumyo butanga amafaranga menshi
Bagaragaje uko bahinga gaperi bakayibyazamo umutobe
Bamwe mu rubyiruko bihangiye imirimo bashimiwe basabwa gukomereza aho
Bamwe mu rubyiruko bihangiye imirimo bateze amatwi ijambo rya Guverineri Gasana
Bimwe mu bikorwa by'urubyiruko rwahuguwe muri gahunda ya Huguka Dukore Akazi Kanoze
Guverineri Gasana yasabye urubyiruko kwirinda ingeso mbi no kwiyandarika kugira ngo rukore ibikorwa birambye
Ibikorwa urubyiruko rwahuguwe rukora byiganjemo iby'ubukorikori
Nteziryayo Joel wo mu Karere ka Nyanza yamuritse umushinga bakora wo guhinga ibihumyo
Umuyobozi w’umushinga Huguka Dukore Akazi Kanoze, Kamanzi Steven, yavuze ko abarenga 65% bahuguwe bamaze kwihangira imirimo
Vuguziga Marie Chantal wo mu Karere ka Kamonyi yamuritse gaperi ahinga akazengamo umutobe
Abahinga soya bakayisyamo ifu nabo bamuritse ibyo bakora

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza