00:00:00 IGIHE NETWORK KN KINYARWANDA EN ENGLISH FR FRANCAIS

Ntabwo twihanganira ruswa: Minisitiri w’Intebe yavuze ku ifungwa rya Bamporiki

Yanditswe na Rabbi Malo Umucunguzi
Kuya 19 May 2022 saa 07:01
Yasuwe :

Minisitiri w’Intebe, Dr Edouard Ngirente, yatangaje ko Guverinoma y’u Rwanda itihanganira ruswa, ari nayo mpamvu abayobozi bayakiriye bakurikiranwa kimwe n’abaturage basanzwe.

Dr Ngirente yabikomojeho agaruka kuri Bamporiki Edouard wahoze ari Umunyamabanga wa Leta muri Minisiteri y’Urubyiruko n’Umuco, ufungiwe iwe aho ari gukorwaho iperereza ku kwakira indonke, bifatwa nk’icyaha cya ruswa.

Uyu wari mu bagize Guverinoma yemeye ko yakiriye indonke, anasaba imbabazi Abanyarwanda na Perezida Paul Kagame, yifashishije urubuga nkoranyambaga rwa Twitter.

Ubwo yaganiraga n’abanyamakuru kuri uyu wa Gatatu, Minisitiri w’Intebe, Dr Ngirente yavuze ko Guverinoma yifuza ko ruswa icika burundu, kandi ihanirwa ku wayakira wese, yaba minisitiri cyangwa Umunyarwanda uwo ari we wese.

Yakomeje ati "Ntabwo ari uko ari minisitiri cyangwa atari minisitiri, Umunyarwanda wese byabonekaho, icya mbere biratubabaza, ariko icyiza iyo yemeye icyaha nyine icyo gihe inzego z’ubutabera zikora akazi kazo."

"Ikibazo mwumvise ko kirimo gukorwaho iperereza, ahubwo ngira ngo ni kimwe mu kikwereka ko nta kwihanganira ruswa, ni uko na minisitiri wabifatiwemo abihanirwa. Birashimangira nyine uwo murongo wa leta. Iyaba yihanganirwa uwo minisitiri ntiyari guhanwa, ariko mwabonye ko yakozweho iperereza, na we ubwe arabyemera, ubwo igisigaye twareka inzego z’ubutabera zigakora akazi kazo."

Itegeko ryo 2018 ryerekeye kurwanya ruswa risobanura ko indonke ari ikintu cyose gisabwe, gitanzwe, cyakiriwe cyangwa gisezeranyijwe kugira ngo, mu buryo bunyuranyije n’amategeko, hakorwe cyangwa hatagira igikorwa.

Ingingo ya 4 iteganya ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Iyo ibikorwa bigize ibyaha bivugwa kuva mu ngingo ya 4 kugeza mu ngingo ya 16 byakozwe n’umuntu uri mu rwego rw’ubuyobozi mu nzego za Leta, iz’abikorera, sosiyeti sivile n’imiryango mpuzamahanga ikorera mu Rwanda, uwo muyobozi ahanishwa igihano kinini giteganyijwe kuri icyo cyaha yakoze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .