00:00:00 IGIHE NETWORK KN KINYARWANDA EN ENGLISH FR FRANCAIS

Turashaka gutaha: Impunzi z’Abanye-Congo zajyanye akababaro kazo kuri za ambasade

Yanditswe na Kanamugire Emmanuel
Kuya 23 Mutarama 2023 saa 10:01
Yasuwe :

Itsinda ry’abahagarariye Impunzi z’Abanye-Congo ziba mu nkambi zo mu Rwanda, ryasabye Umuryango Mpuzamahanga kugira icyo ukora mu maguru mashya kugira ngo ubwicanyi bukorerwa bene wabo buhagarare ndetse na zo zibone uburenganzira bwo gusubira mu gihugu zaturutsemo.

Ubu ni ubutumwa nyamukuru iri tsinda ryatanze mu busabe ryagejeje muri ambasade z’ibihugu bitandukanye mu Rwanda zirimo iya Uganda, u Bufaransa n’u Bwongereza ndetse rikaba rifite gahunda yo kubugeza no ku zindi zitandukanye.

Mu mpera z’umwaka ushize impunzi z’Abanye-Congo zakoze urugendo rw’amahoro rwo kwamgana ubwicanyi bukorerwa bene wabo ariko ngo nta mpinduka zagaragaye.

Iyi ni yo mpamvu bateye iyi ntambwe nk’uko Nsengiyera John ubarizwa mu nkambi ya Kigeme yabisobanuriye itangazamakuru ku gicamunsi cyo ku wa Mbere tariki 23 Mutarama, 2023, i Kigali.

Nsengiyera yavuze ko kugeza ubu Abanye-Congo bavuga Ikinyarwanda bakomeje gupfa, abandi bagahunga ku buryo hamaze kwiyongeraho izindi mpunzi zigera ku 6000 ku zisanzwe mu Rwanda, Umuryango mpuzamahanga ukaba ntacyo wakoze ngo abo bantu barengerwe.

Mu cyumweru gishize igikorwa nk’iki cyakozwe n’impunzi z’Abanye-Congo ziba muri Kenya ndetse no muri Uganda byarakozwe.

Nsengiyera ati “Tumaze igihe kirekire hano mu Rwanda turi impunzi, icyaduteye kuba impunzi n’ubu kiracyahari. Bene wacu basigaye barashaka kubamaraho burundu. Rero ntabwo tuzarekera aho gutabaza kuko njya numva baca umugani mu Kinyarwanda ngo iyo umuntu ahiriye mu nzu ntaho adapfunda umutwe."

Yakomeje avuga ko ibibazo bafite uyu munsi byahereye kera ariko byakomeye mu bihe bya vuba. Mu myaka igera kuri 28 bamaze mu Rwanda ari impunzi, leta ya Congo ntiyigeze yifuza kumenya aho bari cyangwa ngo ibemere nk’abenegihugu ahubwo ibita impunzi z’Abanyarwanda ziba mu Rwanda.

Ati “Kubura aho tubarizwa ni ikibazo kigenda kitugiraho ingaruka mu buzima bwa buri munsi. Ikibazo dufite ni uko barenga kuri icyo cyo guhakana ubwenegihugu bwacu bakica abantu. N’uyu munsi tuvugana hari abishwe, abandi barashimutwa bagasabwa amafaranga ariko icyo bazira nta kindi ni uko ari Abatutsi.”

Ikibazo ngo kiri gufata indi ntera kuko ari Jenoside iri gushyirwa mu bikorwa ari na yo mpamvu izi mpunzi zisaba ko imvugo zibiba urwango zihagarara n’ingengabitekerezo yabibwe ikarandurwa, abazikoresha uhereye ku bayobozi mu nzego zo hejuru gusubiza hasi bakabihanirwa.

Basaba Umuryango wa Afurika y’Iburasirazuba (EAC) Congo ibarizwamo gukurikirana ukamenya ibibazo izi mpunzi zifite birimo n’imibereho mibi ukagira icyo ubikoraho ndetse Umuryango Mpuzamahanga ugashyira igitutu kuri Congo bagasubizwa ku butaka bwabo.

Ubutaka bwacu bwigaruriwe na FDLR

Umuyobozi wa komite nyobozi y’impunzi z’Abanye-Congo mu nkambi ya Kigeme mu Karere ka Nyamagabe, Munyakarambi Sebutozi Edson, yavuze ko kugana za ambasade bwari uburyo bwo kumenyekanisha ko muri Congo hari gutegurwa Jenoside nk’uko byakozwe mu Rwanda.

Yagize ati "Hari FDLR zavuye mu Rwanda nyuma yo gukora Jenoside mu 1994; aho kugira ngo Congo ibirukane basubire iwabo, yarabaretse baridegembya. Imirima yacu yigaruriwe na FDLR, bakora ubusahuzi buhoraho, baratwika inzu bakica abantu, bakabakorera iyicarubozo. Mu yandi magambo ni nk’aho ari bo babaye abenegihugu.”

"Ubushize twakoze urugendo rw’amahoro mu nkambi twereka umuryango mpuzamahanga akababaro kacu, uyu munsi twagiye kuri za ambasade kureba niba bumva ibibazo byacu. Uyu munsi turambiwe kwitwa impunzi, turashaka gutaha iwacu."

Yavuze ko Abanye-Congo bavuga Ikinyarwanda bafite ubushake bwo kubana n’abandi mu mahoro. Ibibazo bafite ngo byaturutse ku ikatwa ry’imipaka kandi ibyo leta irabizi nubwo ibyirengagiza naho kuba bavuga Ikinyarwanda ngo bifitanye isano no kuba begeranye n’igihugu gikoresha urwo rurimi [u Rwanda].

Ati "Kuba twegeranye n’u Rwanda ntibitugira Abanyarwanda, turi Abanye-Congo kandi ntacyo wakora ngo ubyiyambure. Turasaba ibihugu by’ibihangange nka Leta Zunze Ubumwe za Amerika na buri ambasade bihamirize Perezida Tshisekedi ko turi impunzi z’Abanye-Congo zishaka gusubira mu gihugu cyazo."

Perezida wa Komite nyobozi y’impunzi zo mu nkambi ya Nyabiheke mu Karere ka Gatsibo, Maniragaba Bosco, yavuze ko Congo irimo amoko arenga 450 ariko igitangaje ari uko ubwoko bumwe ari bwo bwibasirwa leta irebera ahenshi igashyigikira FDLR, Mai Mai n’indi mitwe igira uruhare mu guhiga Abatutsi.

Ati “Bahindutse nk’aho ari bo ba nyir’igihugu twe baratwangaza tujya mu nkambi. Aho turi hano tubabajwe n’igihe tuhamaze n’ubu turarambiwe. Mu ngingo twagiye tuvuga harimo “ngo turarambiwe kuba aha hantu kandi andi moko yose atekanye abona buri kintu cyose.”

"Ibyo bintu byose birakorwa Umuryango Mpuzamahanga urebera kandi ufite ubushobozi bwo kuba yabihagarika."

Izi mpunzi zavuze ko aho zabashije kugeza ubusabe bwakiriwe neza bakaba bategereje ibisubizo bazahabwa.

Bari bafite ibyapa biriho ubutumwa bukubiyemo ibyifuzo byabo
Abahagarariye impunzi z'Abanye-Congo ubwo basubizaga ibibazo by'abanyamakuru nyuma yo gutanga ubusabe bwabo kuri za ambasade
Barifuza ko amahanga asaba Leta ya Congo gucyura impunzi zayo zimaze igihe mu mahanga kandi ikarindira umutekano abari mu gihugu
Aha bari bari kwinjira muri Ambasade ya Uganda mu Rwanda basaba ubuvugizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .