00:00:00 IGIHE NETWORK KN KINYARWANDA EN ENGLISH FR FRANCAIS

Ntabwo turi abajura-Perezida Kagame

Yanditswe na Akayezu Jean de Dieu
Kuya 30 Ugushyingo 2022 saa 05:35
Yasuwe :

Perezida Paul Kagame yamaganye ibirego bya Guverinoma ya Repubulika Iharanira Demukarasi ya Congo (RDC) ishinja u Rwanda kuyiba amabuye y’agaciro, ashimangira ko Abanyarwanda atari abajura.

Ni ibyatangajwe n’Umukuru w’Igihugu kuri uyu wa 30 Ugushyingo 2022, nyuma y’uko hashize igihe RDC ivuga ko amabuye y’agaciro atunganywa mu nganda z’u Rwanda aturuka muri icyo gihugu.

Ni amakuru yakunze kunyuzwa mu bitangazamakuru byo muri RDC aho bivuga kandi ko u Rwanda rushoza intambara muri iki gihugu kugira ngo rubone uko rusahura uwo mutungo kamere.

Byanashimangiwe na Raporo yakozwe kuri Repubulika Iharanira Demokarasi ya Congo mu 2020, igashyikirizwa Perezida w’Akanama k’Umuryango w’Abibumbye gashinzwe Umutekano.

Yashyizwemo iby’uko hari amabuye y’agaciro anyura mu Rwanda agiye kugurishirizwa mu mahanga, bigakorwa n’imitwe yitwaje intwaro muri Congo.

U Rwanda rwabyamaganiye kure, rugaragaza ko amabuye yose anyura mu Rwanda aba afite ibiyaranga n’aho yaturutse kandi ku buryo buzwi.

Ni ibintu Umukuru w’Igihugu yongeye gushimangira avuga ubushobozi igihugu gifite kibukoresha byinshi mu gusaranganya, ariko kidashobora kwiba.

Yagize ati "Yego, banavuga ko dushinjwa kwiba umutungo wabo, amabuye y’agaciro ya RDC, ikintu kimwe tutari cyo, ari nabyo bitugira abo navuze. Ntabwo turi abajura.”

“Dukorera kugera kubyo dufite n’ibyo tugeraho. Aho turi ubu, iterambere tumaze kugeraho, rishingiye rimwe na rimwe ku bufasha duhabwa n’aba bantu badushinja, ibi bihugu bikomeye, biduha ubufasha."

Perezida Kagame yavuze ko mu bashinja u Rwanda kwiba umutungo kamere wa RDC, harimo n’ibihugu bisanzwe birushyigikira, bizi neza ko iterambere rugezeho ryavuye mu gukora neza kandi cyane kw’Abanyarwanda.

Ati “Kuko bifasha ibindi bihugu, ntabwo bizigera bibona ikindi gihugu kibyaza neza umusaruro amafaranga gihabwa nk’uko u Rwanda rubigenza.”

“Ntabwo ari ku mpanuka, ni uko turi kandi nta muntu uzabitwambura. Ariko iyo bigeze ku kugerageza kuducaho urukoma kuko turi insina ngufi, bazasanga duha agaciro amafaranga yabo, ni ukuvuga ko bizabagora cyane.”

Abakurikirana politiki n’ibijyanye n’umutekanomu Burasirazuba bwa Congo, bavuga ko imitwe yitwaje intwaro yayogoje aka karere ahanini igizwe n’Abanye-Congo kimwe n’abanyamahanga.

Bamwe mu banyepolitiki bo muri RDC ubwabo bashyirwa mu majwi ku gushinja imitwe yitwaje intwaro mu Burasirazuba kugira ngo ibafashe gucukura amabuye y’agaciro nta nkomyi.

Umwaka ushize muri Werurwe, Perezida w’Inteko Ishinga Amategeko ya RDC, Christophe Mboso N’Kodia Pwanga yavuze ko hari abadepite bamwe bakorana n’imitwe yitwaje intwaro.

Perezida Kagame yavuze ko 'Abanyarwanda atari abajura' bityo badakwiye gushinjwa kwiba amabuye y'agaciro muri RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .