00:00:00 IGIHE NETWORK KN KINYARWANDA EN ENGLISH FR FRANCAIS

Ntabwo bagaruye iryinyo gusa: Rutaremara yasesenguye icyemezo cy’u Bubiligi kuri Patrice Lumumba

Yanditswe na Rabbi Malo Umucunguzi
Kuya 21 June 2022 saa 07:25
Yasuwe :

Inararibonye muri Politiki, Tito Rutaremara, yavuze ko kuba u Bubiligi bwasubije Repubulika ya Demokarasi ya Congo iryinyo rya Patrice Emery Lumumba, birenze icyo kimenyetso gusa, ahubwo harimo na roho ye ije kwibutsa Abanyafurika ko bataribohora.

Nyuma y’igihe bisabwa, ku wa Mbere, tariki ya 20 Kamena 2022, u Bubiligi bwavuye ku izima bushyikiriza umuryango wa Patrice Emery Lumumba waharaniye ubwigenge bwa RDC, iryinyo rye.

Hari hashize imyaka irenga 60 abenshi mu Banye-Congo n’Umuryango wa Lumumba basaba kubwirwa amakuru y’urupfu rwe ndetse bakanasaba guhabwa n’ibice by’umubiri we byaba bisigaye.

Iri ryinyo ryatanzwe riri mu isanduku nk’aho ari umubiri wose urimo, itwarwa n’abagabo batandatu, mu cyubahiro gihabwa umubiri w’umunyacyubahiro.

Mu butumwa burebure yanyujije kuri Twitter, Rutaremara yavuze ko Lumumba yakundaga igihugu cye, ashaka kukibohora no guhagarika ba Runyunyuzi bakiryaga, akagiha amajyambere ashingiye ku bumenyi n’ikoranabuhanga.

Icyo gihe ngo yashakaga ko ibihugu bitarabona ubwigenge bibugeraho, ariko agashaka n’ubumwe bwa Afurika no kubohora Afurika yose arwanya ba mpatsibihugu.

Yakomeje ati "Patrice Emery Lumumba yashakaga ko Afurika itera imbere, bishingiye ku bumenyi n’ikoranabuhanga, Afurika yose igatera imbere ikagira agaciro. Mpatsibihugu iramutanga, Abanyamerika, Ababiligi na Mobutu baramwica kugira ngo atazaboneka umubiri we bawushyira muri acide."

"Kugira ngo ibitekerezo bya Patrice Emery Lumumba bitazagaruka muri Congo n’ahandi muri Afurika bashyizeho Mobutu n’abandi bameze nka we mu bihugu bya Afurika, barwanya ibitekerezo bya Lumumba na (Kwame) Nkrumah."

Rutaremara yavuze ko nyuma y’imyaka 61 "Mpatsibihugu n’Ababiligi" bibwiye ko bagaruye iryinyo rya Lumumba gusa.

Yakomeje ati "Bibwiye ko bagaruye iryinyo rya Lumumba gusa. Nyamara bagaruye roho (spirit) ya Lumumba ije kutwibutsa twese Abanyafurika n’Abanye-Congo ko Afurika itaribohora. Congo ifite abanyabwenge benshi, ikagira n’urubyiruko rushoboye, Lumumba aje kubibutsa ko bakwiye guhaguruka bakabohora Congo nk’uko yari yabitangiye."

"Abanyarwanda n’Abanyafurika Lumumba aje kutwibutsa ko dukwiye guhaguruka tukubaka ubumwe bwa Afurika, kandi Abanyafurika barabishoboye, ikibuze ni ubushake."

Rutaremara yavuze ko nk’u Rwanda rufite amahirwe yo kuba rufite perezida ushyize imbere kubaka Afurika, ku buryo Abanyarwanda bakwiye kumujya inyuma ngo yubake u Rwanda, "afashe n’abandi kubaka Afurika."

Iryinyo rya Lumumba wishwe afite imyaka 34, ni cyo gisigazwa cy’umubiri we gisigaye kugeza ubu, nyuma y’uko ibindi byose bitwitswe muri acide bikozwe ku kagambane k’u Bubiligi na Leta Zunze Ubumwe za Amerika.

Soma: Impamvu iryinyo rya Lumumba aricyo gice cy’umubiri we gisigaye

Inararibonye Tito Rutaremara avuga ko u Bubiligi bwasubije RDC ibirenze iryinyo rya Lumumba
Iryinyo rya Lumumba ryahawe icyubahiro gikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .