00:00:00 IGIHE NETWORK KN KINYARWANDA EN ENGLISH FR FRANCAIS

Nta rindi somo ry’imiyoborere dukeneye kuko dufite umuyobozi mwiza - Gen Kabarebe

Yanditswe na Claude Bazatsinda
Kuya 14 July 2022 saa 08:33
Yasuwe :

Umujyanama wihariye wa Perezida wa Repubulika mu by’umutekano, Gen. James Kabarebe, yavuze ko nta muntu ukwiye kwigisha Abanyarwanda iby’imiyoborere kuko isomo rikomeye bakwiye kuba baryigira kuri Perezida wa Repubulika, Paul Kagame.

Yabibwiye urubyiruko n’abakozi bo mu Ishuri Rikuru ry’imyuga n’ubumenyingiro rya IPRC Tumba.

Ni mu kiganiro yatanze kuri uyu wa Gatatu cyagarutse ku mateka y’u Rwanda, mbere y’ubukoloni, mu mu gihe cy’ubukoloni na nyuma yabwo no ku rugamba rwo kubohora igihugu.

Gen Kabarebe yavuze ko Perezida Kagame yahinduye byinshi ku rugamba rwari rukomeye rwo kubohora igihugu, by’umwihariko abanza kuremamo abarurwanaga ko icya mbere ari Abanyarwanda.

Abarwanaga urugamba rwo kubohora igihugu bari baravuye ahantu hatandukanye. Hari abari baravuye Uganda na bo bataziranye, abari baravuye mu Rwanda, abavuye i Burundi, iyari Zaïre, bose bavuga indimi zitandukanye.

Gen. Kabarebe yavuze ko Perezida Kagame yabahaye umurongo wo gushyira hamwe, kuko iyo baza kurwana harimo amacakubiri bitari gushoboka ko batsinda urugamba.

Ati "Nta ndi Umunyarwanda yari ihari, murumva [Perezida Kagame], niko kubanza kudukora mu Bunyarwanda kuko iyo hatangiye kurwana havamo abapfa, inkomere, abantu bagatangira kwitana bamwana, ngo twe bavuye i Burundi nitwe muri gushyira ahantu habi, abavuye Congo ni twebwe bashyira imbere, twe abavuye mu Rwanda nitwe bikoreza imvungure, ugasanga abantu bari gushakira ibibazo aho bitari kubera kuneshwa, abantu bamaze gucikamo ibice buriya haba hari ibibazo."

Gen. Kabarebe yakomeje avuga ko gushyira hamwe igisirikare kikumva ibintu kimwe, kigatekereza kimwe, kikaziririza bimwe, kikarwana kimwe, ari akamaro k’umuyobozi mwiza, udasinzira iyo hari ushatse no guhungabanya ibyo yubaka.

Ati "Izo rero ni zo mbaraga zacu nubwo twari bakeya, ariko twari twubakiye ku buyobozi bwiza no ku myumvire mizima. RPA yagize imbaraga zivuye ku muyobozi mwiza, iratangira irwana neza, igatsinda. Nta rindi somo ry’imiyoborere dukeneye kuko u Rwanda rufite umuyobozi."

Bamwe mu rubyiruko rwiga muri IPRC Tumba, bavuga ko kurushaho kumenya amateka y’u Rwanda n’ay’urugamba rwo kubohora igihugu bayahawe n’abayabayemo, ari umwanya mwiza wo kongera gutekereza agaciro k’igihugu n’abagiharaniye, bikabatera ishyaka ryo kumva uruhare rwabo n’umusanzu bakwiye guha urwababyaye.

Ndagijimana Emmanuel wiga muri IPRC Tumba, yavuze ko iki kiganiro kimukanguye kandi kimuhaye umukoro wo kurinda ibyagezweho no gukomeza kubyongera.

Ati "Urubyiruko dufitiye igihugu umwenda wo kucyubaka kandi ni icyacu, ntabwo twacyikopesheje nta n’ubwo tugikodesha, bityo rero nabwira urubyiruko ko tugomba kwiyubakira igihugu."

Mugenzi we witwa Rugambwa Marlene yongeyeho ko nk’urubyiruko bahawe isomo ry’umuyobozi mwiza udacika intege kandi babikuyemo isomo.

Ati "Tugiye kuba umusingi w’iterambere kandi aho bimwe tubikoze bikanga tugomba kugerageza kugeza byemeye kuko umuyobozi mwiza ahora atekerereza abo ayoboye kandi nitwe bayobozi b’ejo hazaza."

Nyamuberuka Benon avuga ko urubyiruko rufite amahirwe y’ubuyobozi bwiza burwigisha gushyira hamwe rukubaka u Rwanda.

Ati "Aba tubigiraho gukunda igihugu no kucyitangira tutizigamye. Ibi twize ngiye kubisangiza urundi rubyiruko rukanguke rumenye ko u Rwanda ari twe Banyarwanda rureba mbere ya byose, bityo turwubake buri wese uko ashoboye".

Perezida Kagame akunda kwibutsa Abanyarwanda ko u Rwanda rwavuye kure kandi byasabye ikiguzi kinini bityo ko ntawe ukwiye kumva ko yarufata uko yiboneye.

Asaba Abanyarwanda guhora babizirikana bakubaka igihugu, kandi bakamenya no kurinda ibyagezweho.

Urubyiruko rwasabwe kwigira kuri Perezida Kagame rugaharanira imiyoborere myiza
Ni ibiganiro byitabiriwe n'abantu batandukanye harimo n'abaturutse muri polisi y'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .