Nta mugore ukwiye gupfa ari gutanga ubuzima - Madamu Jeannette Kagame

Yanditswe na Uwimana Abraham
Kuya 14 Ukuboza 2020 saa 08:45
Yasuwe :
0 0

Madamu Jeannette Kagame yavuze ko hari imbaraga zikwiye kongerwa mu kubungabunga ubuzima bw’umubyeyi mu gihe cyo kubyara kuko nta mugore ukwiriye gupfa mu gihe ari kubyara ku bw’impamvu iyo ari yo yose.

Ibi yabivuze ku wa 13 Ukuboza 2020, ubwo yafunguraga ku mugaragaro Inama y’Urugaga Mpuzamahanga rw’Abaganga bavura Abagore (FIGO) iri kubera i Kigali.

Madamu Jeannette Kagame yabwiye abitabiriye iyi nama y’iminsi itatu, yakurikiwe na bamwe bateraniye mu cyumba cy’inama, abandi bakayikurikirna hifashishijwe ikoranabuhanga, ko ubuzima bw’umugore ari ingenzi bityo bukwiye kubungwabungwa n’ababifitiye ubumenyi.

Yashimiye intambwe imaze guterwa, aho ngo mu myaka 10 ishize, igipimo cy’ababyeyi babyarira kwa muganga bitaweho n’ababifitiye ubumenyi kiyongereye cyane, aho kuri ubu 91% by’abagore babyarira kwa muganga bitaweho n’abaganga babifitiye ubumenyi.

Gusa yavuze ko n’ubwo bimeze bityo hari ibigikwiriye kongerwamo imbaraga kuko nko mu gihe cyo kubyara abagore bahura n’ububabare bukomeye, ariko ugasanga bataganirizwa ngo bahumurizwe ndetse bitabweho cyane muri icyo gihe, banahabwe uburyo bubagabanyiriza ububabare.

Madamu Jeannette Kagame yavuze ko n’ubwo kubyara bifatwa nk’igikorwa gisanzwe, gitera ububabare ku buryo hakenewe uburyo buhamye bwo kwita kuri ubwo buribwe, nta mubyeyi ukwiye kubura ubuzima.

Yagize ati “Tuvuye ku by’imibare, iterambere mu kwita ku mubyeyi kugira ngo abyare neza, rigomba no gushyira imbaraga mu buryo yitabwaho igihe abyara, kumuha amahirwe yo guhitamo uburyo ashaka gukoresha abyara no gushyira imbaraga mu gutuma abagore bose bajya kubyara bitabwaho n’ababyaza babifitiye ubumenyi.”

Yongeyeho ati “Umugore akwiye gutegurwa mbere akamenya ububabare ari buhure nabwo, kugira ngo abe yiteguye. Uburyo umugore ahitamo kwihanganira ububabare mu gihe abyara, ni icyemezo gikomeye. Niyo mpamvu akwiye gushishikarizwa kuganira n’abaganga mbere kugira ngo bamuhitishemo uburyo ashaka gukoresha, ndetse banamugire n’inama.”

Yashimangiye ko kugabanyirizwa ububabare mu gihe cyo kubyara bidakwiye gufatwa nko gutsindwa, kuko ngo biriho kugira ngo bigabanye ibibazo biba mu kubyara, ndetse binafashe kugira ngo icyo gikorwa kigende neza, kuko byagaragaye ko abagore benshi bifuza kuba bakagabanyirijwe ububabare muri icyo gihe.

Madamu Jeannette Kagame yashimiye abaganga bita ku buzima bw’abagore, abashimira umurava n’ubwitange bagaragaza.

Yagize ati “Igihugu cyanjye cyishimiye uruhare buri umwe wese witabiriye iyi nama agira mu gushyigikira kurushaho gutanga serivisi nziza zituma ubuzima bw’ababyeyi ndetse n’abana bavuka buba bwiza. Nidushyira imbere ubuzima bw’umugore mu byo dukora byose, tuzarushaho guhagarika impfu z’ababyeyi n’abana bapfa bavuka.”

Yongeyeho ko ‘nta mugore ukwiye gupfa ari kubyara, ari gutanga ubuzima kuko hari uburyo bwinshi bishobora kwirindwa’.

Umunyamabanga Mukuru w’Ishami ry’Umuryango w’Abibumbye ryita ku Buzima (OMS), Tedros Adhanom Ghebreyesus, witabiriye iyi nama binyuze mu buryo bw’ikorabuhanga, yavuze ko mu gihe cya COVID-19 hari byinshi byahungabanyije ubuzima bwiza bw’abagore n’abakobwa, birimo aho bagiye bakorerwa ihohoterwa rishingiye ku gitsina, ndetse hamwe na hamwe byari bigoye kubona serivisi z’ubuzima nk’uko byari bisanzwe.

Yavuze ko ubufatanye bwa FIGO na OMS bukenewe cyane kugira ngo icyo cyuho cyajemo kibashe kuvamo, ubuzima bw’abagore n’abakobwa bwitabweho byuzuye.

Iyi nama igiye kumara iminsi itatu ibera muri Kigali Convention Centre, ikanakurikiranwa n’abandi bifashishije ikoranabuhanga, yahurije hamwe abahanga mu by’ubuvuzi no kwita ku buzima bw’abagore basaga 1200 bari hirya no hino ku Isi.

Ni inshuro ya kabiri ibereye muri Afurika, n’iya mbere ikozwe mu buryo bwo guhuza abari mu cyumba cy’inama n’abayikurikirana ku ikoranabuhanga; yateguwe na FIGO ku bufatanye n’Urugaga Nyafurika rw’Abaganga bavura Abagore (AFOG) n’Urugaga Nyarwanda rw’Abaganga bavura Abagore (RSOG).

Umuyobozi w’Urugaga Nyarwanda rw’Abaganga bavura Abagore, Dr Ngoga Eugène, yavuze ko bishimiye kuba FIGO yarahisemo ko u Rwanda ari rwo rwakira iyi nama.

Yavuze ko bafite icyizere ko ibizayiganirwamo bizatanga umusaruro ku kubungabunga buzima bw’umubyeyi n’umwana.

Minisitiri w’Ubuzima, Dr Ngamije Daniel, yavuze ko ibizigirwa muri iyi nama bizafasha u Rwanda, akarere, ndetse n’Isi muri rusange gushyiraho gahunda zihamye kandi z’ingenzi mu kurushaho gushyigikira ubuzima bwiza bw’umugore.

Madamu Jeannette Kagame ubwo yagezaga ijambo ku bitabiriye inama hifashishijwe uburyo bw'ikoranabuhanga
Minisitiri w'Ubuzima, Dr Ngamije Daniel, yavuze ko iyi nama izafasha Isi mu gushyiraho ingamba zihamye mu kurengera ubuzima bw'umugore
Bamwe bakurikiraga iyi nama bari mu cyumba cy'inama, abandi bakayikurikiranira ku ikoranabuhanga
Iyi nama yitabiriwe n'abayobozi batandukanye ndetse n'impuguke mu by'ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .