Nta kirahinduka ku nama yatanzwe yo kwirinda kujya Uganda-Minisitiri Biruta

Yanditswe na Cyprien Niyomwungeri
Kuya 11 Mutarama 2020 saa 09:18
Yasuwe :
0 0

Minisitiri w’Ububanyi n’Amahanga w’u Rwanda, Dr Biruta Vincent, yemeje ko nta kirahinduka ku nama yatanzwe yo gusaba abanyarwanda kwirinda kujya muri Uganda kubera ibibazo by’umutekano wabo.

Muri Werurwe umwaka ushize u Rwanda rwaburiye abaturage barwo kutajya muri Uganda, kubera ko umutekano wabo utizewe, biturutse ku gufungwa, gushimutwa n’ibindi bikorwa bya kinyamaswa birimo iyicarubozo.

Ibi bishimangirwa n’abantu barekuwe mu bihe bitandukanye bagiye bavuga igihe runaka bari bamaze muri gereza za Uganda. Bavuga ko bafashwe babwirwa ko bari muri Uganda mu buryo bunyuranyije n’amategeko cyangwa se bakekwaho kuba intasi z’u Rwanda.

Iki kibazo kimwe n’ibindi by’uko Uganda icumbikiye ndetse igatera inkunga abashaka guhungabanya umutekano w’u Rwanda, biri mu byo ibihugu byombi byemeranyijwe gukemura binyuze mu masezerano ya Luanda yo kuwa 21 Kanama 2019.

Nyuma y’aya masezerano ndetse n’inama ebyiri zabereye i Kigali na Kampala zigahuza abayobozi b’u Rwanda na Uganda, baganira ku cyakorwa, hari abanyarwanda barekuwe bajugunywa ku mupaka ariko hari abandi barenga 100 bakiri muri za gereza no mu mabohero ya Uganda, bakorerwa iyicarubozo.

Muri iki cyumweru Uganda yarekuye abanyarwanda icyenda nyuma yo gushyingura dosiye z’ibyaha baregwaga, bituma hari abatekereza ko agatotsi kari mu mubano w’ibihugu byombi kavuyemo ku buryo abanyarwanda bakongera kujya muri Uganda.

Uwitwa Chris Munyakayanza, yabajije Minisitiri Biruta n’Umunyamabanga wa Leta, Amb. Olivier Nduhungirehe kuri Twitter, niba abanyarwanda bemerewe gusubira muri Uganda.

Ati “@onduhungirehe mwiriwe, umupaka w’abaturanyi nibyo koko ubu twemerewe kujyayo?? (Uganda). Murakoze”.

Minisitiri Biruta yamusubije ko abanyarwanda bakomeje kugirwa inama yo kutajya muri Uganda.

Ati “Twababwiye ko igihe nikigera tukabona nta mpungenge zigihari ku mutekano w’abanyarwanda muri Uganda tuzabamenyesha. Nta kirahinduka ku nama yatanzwe yo kwirinda kujya Uganda kuko impungenge zikiriho”.

Mu kiganiro aherutse kugirana n’itangazamakuru, Minisitiri Biruta yavuze ko irekurwa ry’abanyarwanda ‘ari intangiriro nziza yo gushyira mu bikorwa amasezerano ya Luanda, gusa ntabwo aba bahagije kuko hari abandi barenga 100 bari muri Uganda bahafungiwe’.

Yakomeje avuga ko “Hari kandi n’abashaka guhungabanya umutekano w’u Rwanda nabyo biri mu masezerano ko iki kibazo kigomba gukemurwa. Ibi ni ibikorwa twiteguye gukora ibitureba ariko ibi bizakorwa nitumara kubona ko byose byakemutse, ku buryo nta Munyarwanda uzaba ugihohoterwa.”

Yavuze ko mu gihe ibi bibazo byaba bikemutse, urujya n’uruza ruzongera rukagenda neza.

Ati “Twiteguye kuba twabwira Abanyarwanda ko nta mpungenge bajya muri iki gihugu, ariko bizakorwa ari uko abantu bakomeje kurekurwa tukagira ibyo dushingiraho”.

Uganda na yo yemera ko nubwo hari intambwe nziza irimo guterwa mu kuzahura umubano w’ibihugu byombi, hakiri inzira ndende ariko ibyakozwe bitanga icyizere.

Ambasaderi Adonia Ayebare usanzwe ari Intumwa ihoraho ya Uganda mu Muryango w’Abibumbye i New York, ndetse akaba yaranatumwe mu kwezi gushize na Perezida Museveni, kuri mugenzi we Paul Kagame, asanga ibyakozwe ari intangiriro nziza.

Mu kiganiro yagiranye na NTV Uganda, kuwa Kane, Ayebare yavuze ko kurekura abanyarwanda icyenda ari ikimenyetso cyiza n’intambwe mu kuzahura umubano w’ibihugu byombi.

Ati “Mu by’ukuri ni ikimenyetso cyiza cyakozwe na Uganda, kuko nk’uko mubizi kimwe mu bibazo byari bihari cyari icyo u Rwanda rwita ‘itabwa muri yombi ridakurikije amategeko ry’abanyarwanda...kurekura aba bantu biratanga ubutumwa ko gusubiza ku murongo umubano w’ibihugu byombi biri mu nzira. Ibi bizatuma n’ibindi bibazo bikemuka”.

Abajijwe niba ibi byaba ari intambwe iganisha ku kongera gufungura umupaka, Amb. Ayebare, yavuze ko Museveni aherutse kwizeza abaturage ko hazakorwa ibishoboka byose ibibazo biri hagati y’ibihugu byombi bigakemuka, bityo akaba ari rwo rugendo rwatangiye.

Minisitiri Biruta avuga ko abanyarwanda bakigirwa inama yo kutajya muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .