Nsizebashonje, Buryohe na Tebuka mu mbuto nshya z’imyumbati zishobora kwera toni 40 kuri hegitari

Yanditswe na Prudence Kwizera
Kuya 17 Ugushyingo 2020 saa 06:04
Yasuwe :
0 0

Ikigo gishinzwe guteza imbere Ubuhinzi n’Ubworozi mu Rwanda, RAB, cyamuritse ubwoko bushya butandatu bw’imyumbati bufite ubushobozi bwo guhangana n’indwara zikunze kuyibasira, kandi butanga umusaruro kugeza kuri toni 40 kuri hegitari imwe, uvuye kuri toni 14,5.

Izo mbuto nshya zamurikiwe mu Karere ka Nyanza kuri uyu wa Kabiri, ubwo hatangizwaga icyumweru cyahariwe igihingwa cy’imyumbati. Zahawe amazina arimo Tebuka, Gikungu, Buryohe, Nsizebashonje, Biseruka na Tegereza.

Ukuriye ishami rikora ubushakashatsi ku gihingwa cy’imyumati muri RAB, Nduwumuremyi Athanase, yavuze ko bashakishije imbuto nshya y’imyumbati kuko iyari isanzwe yari imaze kwibasirwa n’indwara zirimo ububembe na kabore, ku buryo itari igitanga umusaruro.

Ati “Guhera mu 2002 kugeza mu 2008, indwara y’ububembe yari imeze nabi, dusohora imbuto nyinshi z’imyumbati ziyihanganira, ariko bigeze mu 2009 dutangira kubona indi ndwara nshya yitwa kabore.”

“Uyu munsi twamuritse imbuto nshya esheshatu, ariko hari izindi nyinshi zikiri mu bushakashatsi na zo zigaragaza icyizere ko zishobora guhangana n’indwara.”

Umushakashatsi ku gihingwa cy’imyumbati ukorera mu kigo mpuzamahanga cy’ubushakashatsi, IITA, Dr Tumwegamire Silver, yavuze ko kugera kuri iyo mbuto nshya y’imyumbati byafashe igihe kirekire, kuko byitondewe kugira ngo babashe kubona imbuto ihangana n’indwara kandi itanga umusaruro mwinshi kandi mwiza.

Ati “Twakoze ibishoboka byose kugira ngo tugere ku mbuto nziza ibasha guhangana n’indwara kandi yera neza ku butaka bw’u Rwanda, itanga umusaruro mwinshi kandi mwiza.”

Umunyamabanga wa Leta muri Minisiteri y’Ubuhinzi n’Ubworozi, Dr Ngabitsinze Jean Chrysostome, yavuze ko muri iki gihe u Rwanda rweza umusaruro muke w’imyubati ugereranyije n’ibindi bihugu, ariko hari intego yo kuziba icyo cyuho.

Yagize ati “Uyu munsi imyumbati mu Rwanda ihingwa ku buso bwa hegitari hafi ibihumbi 200, hakavaho toni hafi miliyoni eshatu z’umusaruro, wabishyira ku mpuzandengo ugasanga ni hafi toni 14,5 kuri hegitari. Turacyari munsi ugereranyije n’ibindi bihugu bitandukanye, kuko byo biri hagati ya toni 20 na 25.”

Dr Ngabitsinze yavuze ko imbuto nshya zamuritswe zifite ubushobozi bwo gutanga umusaruro mwinshi, ugera kuri toni 40 kuri hegitari imwe.

Ati “Iyi myumbati mishya yakozwe, ibonye ifumbire nziza ikitabwaho, yagera no kuri toni 40 kuri hegitari. Ubwo twaba tugiye gusatira ibindi bihugu byazamutse gutyo.”

Bamwe mu bahinzi b’imyumbati bavuze ko bakunze guhura n’imbogamizi y’indwara ziyibasira bikabatera igihombo, ariko imbuto nshya bayitezeho gukemura icyo kibazo.

Nsengimana Onesme yagize ati “Iyi mbuto RAB iri kuduha njyewe natangiye kuyihinga mbona yihanganira indwara, kandi ukabona ko nta kibazo iteye kuko itanga umusaruro mwinshi kurusha iyo twari dusanzwe duhinga.”

Abahinzi basabye RAB gukora ibishoboka byose ikajya ibaha imbuto y’imyumbati nshya buri mwaka, kuko iyo imaze igihe kirekire aribwo ihura n’indwara.

RAB yijeje abahinzi ko yashyize ingufu mu gushakisha imbuto nshya z’imyumbati no kuzitubura, ku buryo mu myaka ibiri iri imbere abahinzi bazaba batagifite ikibazo cyo kubura imbuto nziza.

Imibare ya RAB yerekana ko kuri hegitari ibihumbi 200 zihingwaho imyumbati mu Rwanda, haterwaho ingeri hafi miliyari ebyiri.

Abayobozi batandukanye n'abandi bitabiriye itangizwa ry'icyumweru cyahariwe igihingwa cy'imyumbati
Imbuto nshya yahawe izina rya Gikungu
Iyi mbuto abahanga bayise Tegereza
Nyuma yo gutunganya iyi mbuto, abashinzwe ubuhinzi bayise Biseruka
Iyi mbuto yo yahawe izina rya Nsizebashonje, kuko yera vuba
Iyi mbuto yahawe izina rya Buryohe
Iyi mbuto yera imyumbati myinshi kandi vuba, yahawe izina rya Tebuka
Umushakashatsi ku gihingwa cy’imyumbati ukorera mu kigo mpuzamahanga cy’ubushakashatsi cyitwa IITA, Dr Tumwegamire Silver, yavuze ko kugera kuri iyo mbuto nshya y’imyumbati byafashe igihe kirekire kuko byitondewe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .