00:00:00 IGIHE NETWORK KN KINYARWANDA EN ENGLISH FR FRANCAIS

Nshimiye Joseph yishyikirije RIB

Yanditswe na IGIHE
Kuya 22 Mutarama 2023 saa 02:35
Yasuwe :

Nshimiye Joseph wari umaze iminsi ashakishwa, yishyikirije Urwego rw’Igihugu rw’Ubugenzacyaha, RIB, ahita afungwa.

Uyu mugabo ukuriye abafana ba AS Kigali akurikiranyweho icyaha cy’ubwambuzi bushukana; afungiye kuri Sitasiyo ya RIB ya Kicukiro.

Nshimiye yijyanye kuri RIB nyuma yo kubona ubutumwa bumusaba kwitaba kuko yari amaze iminsi ahamagajwe.

Umuvugizi w’Urwego rw’Igihugu rw’Ubugenzacyaha mu Rwanda, RIB, Dr Murangira Thierry, yemereye IGIHE ko Nshimiye yitabye ku wa Gatandatu, tariki ya 21 Mutarama 2023.

Ati "Ni byo afungiye kuri RIB ya Kicukiro. Nyuma y’igihe ashakishwa, ubutumwa bwamugezeho.’"

Yavuze ko "Iperereza rikomeje ku cyaha akurikiranyweho kugira ngo dosiye ishyikirizwe Ubushinjacyaha.’"

Ku wa Gatanu, tariki ya 20 Mutarama 2023, Dr Murangira yabwiye itangazamakuru ko Nshimiye Joseph na bagenzi be babiri bakurikiranyweho ubujura bushukana bakoze binyuze mu Kigo cyabo Gold Planning A.I [Artificial Intelligence], maze bikubira amafaranga y’abaturage.

Ngo byakorwaga basaba ko umuntu agura robot yifashishije ikoranabuhanga hanyuma ngo bitewe n’agaciro kayo ikajya yungukira uwayiguze amafaranga.

Ku ikubitiro, RIB yafashe Ntambara Pierre Céléstin [Billy] na Barahinguka Serge. Aha ni mbere y’uko Nshimiye Joseph na we yishyikiriza uru rwego.

Tariki ya 7 Mutarama 2023, ni bwo abantu barindwi bashyikirije ikirego RIB barega aba bagabo. Bivugwa ko baregwa kunyereza arenga miliyoni 100 Frw.

Umuvugizi wa RIB, Dr Murangira B. Thierry, yavuze ko uru rwego rukangurira Abanyarwanda kugira amakenga mu gihe bizezwa inyungu za hato na hato.

Yakomeje ati "Icya mbere ni uko abantu bakwiye kwirinda ibikorwa bituma bashora amafaranga bagahomba. Ubu butekamutwe buri kuza mu mayeri menshi. Buri wese agire amakenga yumve ko buri wese uje akwizeza inyungu, iteka ataba ari byo. Buri wese akwiye kugira amakenga, akirinda kubyishoramo. Uwumva ubu butumwa wese akwiye kubugira ubwe."

Nshimiye na bagenzi be baramutse bahamijwe icyaha cy’ubwambuzi bushukana bahanishwa ingingo ya 174, iteganya igifungo kitari munsi y’imyaka ibiri ariko kitarenze imyaka itatu n’ihazabu y’atari munsi ya miliyoni eshatu 3 Frw ariko atarenze miliyoni 5 Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .