Nsengimana wari wasimbuye Nsabimana ‘Sankara’ ku buvugizi bwa FLN afungiwe i Kigali (Amafoto & Video)

Yanditswe na Cyprien Niyomwungeri
Kuya 17 Mutarama 2020 saa 03:54
Yasuwe :
0 0

Ku gicamunsi cyo kuri uyu wa Gatanu ku cyicaro Gikuru cy’Urwego rw’Igihugu rw’Ubugenzacyaha (RIB) ku Kimihurura, herekanywe Herman Nsengimana wari umuvugizi w’umutwe wa FLN, umwanya yagiyeho asimbuye Nsabimana Callixte ‘Sankara’, ukurikiranywe n’ubutabera bw’u Rwanda.

Muri Mata 2014 nibwo Herman Nsengimana yavuye mu Rwanda ajya mu ishyaka rya Nsabimana Callixte Sankara ryitwa RRM (Rwandese Revolutionary Movement) ashinzwe itumanaho.

Yihuje n’ihuriro rya CNRD/MRCD ya Rusesabagina Paul mu ngabo zaryo za FLN, aza kuzibera umuvugizi nyuma y’ifatwa rya Nsabimana ndetse akaba yarigambye ibitero byo guhungabanya umutekano mu Bweyeye.

Undi werekanywe ni Mutarambirwa Theobald wari Umunyamabanga Mukuru wa PS Imberakuri, igice cya Bernard Ntaganda, yavuye mu Rwanda muri Kamena 2010, akaba yari mu ngabo za FLN aho yari ashinzwe gutwara urubyiruko rw’abanyarwanda abajyana muri uyu mutwe w’iterabwoba.

Umuvugizi wa RIB, Umuhoza Marie Michelle, yavuze ko aba bombi bazanywe mu Rwanda tariki 16 Ukuboza 2019 ‘nyuma y’ibitero bagabweho n’ingabo za Congo mu mashyamba babagamo iperereza rikaba ryaratangiye kuri ibi byaha bakekwaho’.

Bombi bakiri mu Rwanda bari abarimu. Umwe akaba yari umwarimu ku ishuri rya ETM, undi ari umwarimu mu Karere ka Nyanza.

Umuhoza yavuze ko bashyikirijwe RIB ngo hatangire iperereza ku byaha bitandukanye bakekwaho by’iterabwoba birimo; kurema umutwe w’ingabo zitemewe, iterabwoba, gukora no kugira uruhare mu bikorwa by’iterabwoba, kuba mu mutwe w’iterabwoba, kugambana no gushishikariza abandi gukora iterabwoba, ubwicanyi, guhakana jenoside yakorewe abatutsi mu 1994 n’ibindi.

Yashishikarije abanyarwanda kwirinda abantu bose babashora mu bikorwa byo gusenya igihugu aho kubakangurira kucyubaka, aburira abishora mu byaha ko amategeko azakurikizwa bakabibazwa.

Ati "Amategeko arahari kugira ngo akore, umuntu wese uzakora icyaha icyo ari cyo cyose cyangwa se uzahemukira u Rwanda ntabwo bizamugwa amahoro”.

Umuhoza yasobanuye ko aba bombi batavugisha itangazamakuru kuko batarabazwa ku byaha bakekwaho.

Aba bagabo bombi berekanywe mu gihe mu myaka yashize byagiye bivugwa ko babuze, bishwe n’ibindi byagiye bivugwa n’ibitangazamakuru ndetse n’imiryango mpuzamahanga imwe n’imwe nyamara baragiye mu bikorwa byo gusenya igihugu.

Herman Nsengimana yigambye ibitero byo mu Bweyeye, byagabwe mu mpera z’umwaka ushize, aho yumvikanye avuga ko abarwanyi ba FLN bagabye igitero mu gace ka Bweyeye, umurenge wo mu karere ka Rusizi wegereye ishyamba rya Nyungwe.

Muri Gicurasi umwaka ushize nibwo ishyaka MRCD, rirwanya ubutegetsi bw’u Rwanda, ryasohoye itangazo rishyirwaho umukono na Paul Rusesabagina uriyobora, avuga ko Herman Nsengimana yasimbuye Nsabimana Callixte ku buvugizi bwa FLN.

Nsabimana wari umuvugizi wa FLN [umutwe wa gisirikare ushamikiye kuri MRCD], yafashwe umwaka ushize akaba ari gukurikiranywa n’ubutabera bw’u Rwanda ku byaha 16.

MRCD yavuze ko Herman Nsengimana yakoranye bya hafi na Nsabimana Callixte yasimbuye ndetse ngo yamuhaye inshingano yizeye ko azagera ikirenge mu cy’uwo asimbuye.

Mu mashusho yagaragaye ku rubuga rwa internet, Nsengimana yavuze ko ari umuvandimwe wa Niyomugabo Gérard waburiwe irengero mu 2014.

Uyu Niyomugabo yumvikanye mu rubanza rwa Kizito Mihigo, aho yahuje uyu muhanzi na Nsabimana Callixte, batangira kujya bagirana ibiganiro, byaje kuvamo ibyaha byose uyu muhanzi yashinjwaga.

Ku wa 19 Kamena 2018, ahagana saa tanu z’ijoro, umutwe w’abarwanyi ba FLN uyobowe na Major Rusangantwari Felix, wagabye ibitero mu Karere ka Nyaruguru mu Murenge wa Nyabimata, wica abaturage b’abasivili batatu, unakomeretsa abandi benshi.

Abapfuye barimo uwari Perezida w’Inama Njyanama ya Nyabimata n’Umuyobozi w’ishuri ushinzwe amasomo. Mu bakomeretse harimo umunyamabanga Nshingwabikorwa w’Umurenge wa Nyabimata. Icyo gihe kandi ngo batwitse imodoka na moto ebyiri.

FLN kandi ngo yasahuye amaduka arimo amafaranga n’ibicuruzwa nk’isukari, inzoga, telefoni zigendanwa, bajya no mu ngo z’abaturage basahura amatungo magufi.

Nyuma yo gusahura ngo bafashe bugwate abaturage batandatu. Ku wa 1 Nyakanga 2018 nabwo abagize FLN basubiye muri Nyabimata basenya imiryango y’abaturage, barabakubita banasahura imyaka irimo ibishyimbo n’ibirayi, amafaranga n’imyenda.

Nabwo ngo bafashe abaturage babagira ingwate, babikoreza ibyo babasahuye berekeza mu ishyamba rya Nyungwe, bagenda barasa amasasu hejuru.

Ku wa 13 Nyakanga 2018 kandi abagize FLN bongeye gutera mu Karere ka Nyaruguru mu Murenge wa Kivu, bavuye mu ishyamba rya Nyungwe bitwaje imbunda.

Muri icyo gitero bafashe irondo ry’abagabo bane bababohera imugongo, babategeka kwerekana aho ibirindiro by’Ingabo z’u Rwanda biri hamwe n’inzu zirimo imyaka.

Abaturage barahaberetse, abagize FLN basahura imyaka, bafata bugwate abaturage barayibikoreza, barabatwara bageze aho bagombgaa kwinjirira mu ishyamba, bayambura abaturage barayigabana basubira mu ishyamba.

Herman Nsengimana wari umuvugizi wa FLN asimbuye Nsabimana Callixte 'Sankara'
Mutarambirwa wari Umunyamabanga Mukuru wa PS Imberakuri igice cya Bernard Ntaganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza

Article (128969) Re-process this page *