Nsabimana ’Sankara’ yasabye urukiko ko dosiye ye ihuzwa n’iya ’Sebuja’ Rusesabagina

Yanditswe na Prudence Kwizera
Kuya 10 Nzeri 2020 saa 12:20
Yasuwe :
0 0

Nsabimana Callixte wiyise Sankara wari Umuvugizi w’Umutwe wa FLN, yongeye kugaruka imbere y’urukiko kwiregura ku byaha aregwa bishingiye ku bitero umutwe wa FLN yari abereye umuvugizi wagiye ugaba mu bice byegereye Ishyamba rya Nyungwe; Ubushinjacyaha bwifuza ko urubanza rwe ruhuzwa n’urwa Nsengimana Herman wamusimbuye kuri uwo mwanya na we akaza gufatwa.

Kuri uyu wa Kane, Nsabimana yagarutse imbere y’Urukiko Rukuru mu rugereko rwihariye ruburanisha ibyaha mpuzamahanga n’ibyambukiranya imipaka ruherereye mu Karere ka Nyanza, ngo yiregure ku byaha aregwa, ahanini bigaruka ku bitero umutwe wa FLN wagiye ugaba mu bice byegereye Ishyamba rya Nyungwe, byishe abaturage, abandi bagakomereka, bakanasahurwa imitungo yabo.

Iburanisha ryabaye hifashishijwe uburyo bw’iyakure buhuza impande ziburana hifashishijwe amashusho mu kwirinda icyorezo COVID-19. Abacamanza batatu n’umwanditsi bari mu cyumba cy’urukiko i Nyanza, Nsabimana Callixte ari muri Gereza ya Mageragere i Kigali hamwe n’umwavoka we.

Yasubukuye kwiregura ahereye aho yari ageze mu iburanisha riheruka ku wa 13 Nyakanga 2020 aho yasabye imbabazi, avuga ko yinjiye mu mitwe y’iterabwoba ashutswe.

Icyo gihe nibwo yanashinje Perezida wa Zambia, Edgar Lungu, ko yabemereye inkunga yo guhirika ubutegetsi bw’u Rwanda. Yavuze ko mu mpera za 2017, Perezida wa Zambia, Edgar Lungu, yemereye Perezida wa MRCD, Paul Rusesabagina, ko azamufasha guhirika ubutegetsi bw’u Rwanda, ahita anatanga ibihumbi 150 by’amadolari nk’inkunga.

Iburanisha ryo kuri uyu wa Kane ryatangiye ritinze kubera ibyuma by’ikoranabuhanga byabanje kwifashishwa mu rundi rubanza.

Urukiko rwatangiye ruvuga ko ubushinjacyaha bwarwandikiye ibaruwa isaba ko urubanza rwa Nsabimana rwahuzwa n’urwa Nsengimana Herman wamusimbuye ku buvugizi wa FLN ariko na we akaza gufatwa.

Ubushinjacyaha bwahawe ijambo ruvuga ko hari abaregera indishyi batitabiriye iburanisha, urubanza rwakomeza hagasuzumwa icyifuzo cyo guhuza imanza zombi. Bwagaragaje ko guhuza izo manza zombi byagira akamaro mu iburanisha kuko ibyaha Nsabimana Callixte ‘Sankara’ bifitanye isano ku kigero kinini n’ibyo Nsengimana Herman aregwa.

Bwasobanuye ko dosiye ya Nsabimana Callixte ikubiyemo ibyaha aregwa isa ku kigero kinini n’iya Nsengimana Herman, bityo izo manza zombi zihujwe byaba biri mu nyungu z’ubutabera.

Ubushinjacyaha bwasobanuye ko mu kwiregura kwa Nsabimana Callixte akunze kugaruka kuri Nsengimana Herman nk’umuntu bakoranye ibyaha, bityo basanga imanza zabo zombi zahuzwa. Hasobanuwe ko no mu ibazwa rya Nsengimana Herman yagiye avuga kenshi ko aziranye na Nsabimana Callixte kuko ari we wamujyanye mu mutwe wa FLN.

Nsabimana Callixte yahawe ijambo avuga ko ibijyanye no guhuza izo manza zombi atabirwanya ariko we n’umwunganira mu mategeko bahabwa umwanya wo kubanza kubisesengura. Yavuze ko atifuza gutinza urubanza kuko n’ubusanzwe yatangiye yemera ibyaha byose aregwa akanabisabira imbabazi, bityo nibamara kumva neza impamvu yo guhuza izo manza zombi bakomeza kuburana nta kibazo.

Uwunganira Nsabimana Callixte mu mategeko na we yashimangiye icyemezo cy’umukiriya we asaba ko bahabwa igihe cyo gusoma iyo baruwa no kubijyaho inama.

Nsabimana ‘Sankara’ yavuze ko ibyo ubushinjacyaha buvuga bifite ishingiro bityo urukiko rwabifataho umwanzuro.

Nsabimana ‘Sankara’ yavuze kuri Rusesabagina

Nsabimana Callixte ‘Sankara’ amaze kumva icyifuzo cy’ubushinjacyaha cyo guhuza dosiye ye n’iya Nsengimana Herman, yasabye ko hakwihutishwa na dosiye ya Rusesabagina Paul yise ‘Sebuja’ kuko ari bwo hatangwa ubutabera bwuzuye.

Yasobanuye ko Rusesabagina Paul yari Perezida wa MRCD, bari bahuriyemo kandi ariyo yari ifite umutwe w’inyeshyamba za FLN zakoze ibyaha byo kwica abantu, kubashimuta no kubasahura.

Yagize ati "Uko ubushinjacyaha bwagerageje gusobanura hagati yanjye na Nsengimana Herman ndumva bifite ishingiro. Ubushinjacya buvuze ikintu bwise ’ubutabera bunoze’ hari amakuru ahari avuga ko ubushinjacyaha bufite dosiye y’uwari Databuja nkaba numva muri urwo rwego kugira ngo habeho ubutabera bunoze, ubushinjacyaha bwakwihutisha iyo dosiye bufite y’uwari Databuja kuko zihujwe turi batatu nibwo hazaba habayeho ubutabera nyabwo. Njyewe niko mbyumva ku ruhande rwanjye, urubanza rubaye njyewe na Herman turi kumwe n’uwahoze ari Databuja Rusesabagina ubutabera bwaba bwuzuye."

Urukiko rwamubwiye ko icyifuzo cye kitakwigwaho ako kanya kuko nta dosiye ya Rusesabagina Paul rufite; ahubwo bari kwiga uko bahuza urubanza rwe n’uwa Nsengimana Herman.

Umwe mu bagarariye abaregwa yavuze ko icyifuzo cy’ubushinjacyaha gifite ishingiro ndetse n’ibyo Nsabimana Callixte ‘Sankara’ yifuje byo kwihutisha dosiye ya Rusesabagina bifite ishingiro kandi biri mu nyungu z’ubutabera bityo urukiko rwabifataho umwanzuro.

Nsengiyumva Vincent wari Umunyamabanga Nshingwabikorwa w’Umurenge wa Nyabimata wakomerekejwe agatwikirwa n’imodoka mu gitero cya FLN (ari mu baregera indishyi) yahawe ijambo avuga ko icyifuzo cy’ubushinjacyaha gifite ishingiro ndetse n’ibyo Sankara yasabye biri mu nyungu zabo, bityo byakwitabwaho.

Urukiko rumaze kumva ibisabwa n’impande zose ziri mu rubanza rwategtse ko umwanzuro ku guhuza izo manza zombi uzatangaza tariki ya 1 Ukwakira saa tanu.

Nsabimana Callixte wari umuvugizi w’inyeshyamba za FLN aregwa ibyaha 17 bishingiye ku bitero ku Rwanda n’ibikorwa by’abo barwanyi.

Birimo kurema umutwe w’ingabo utemewe, icyaha cy’iterabwoba ku nyungu za politiki, gukora no kugira uruhare mu bikorwa by’iterabwoba, gutanga amabwiriza mu gikorwa cy’iterabwoba, kuba mu mutwe w’iterabwoba, icyaha cyo kugambana no gushishikariza abandi gukora iterabwoba, ubwicanyi n’ubwinjiracyaha bw’ubwicanyi.

Aregwa kandi gufata bugwate, gukwiza amakuru atariyo cyangwa icengezamatwara rigamije kwangisha leta y’u Rwanda mu bihugu by’amahanga, guhakana Jenoside, kwiba yitwaje intwaro, gutwika, kugirana umubano na leta y’amahanga hagamijwe gushoza intambara, gukora cyangwa gukoresha impapuro mpimbano, gukubita no gukomeretsa ku bushake no gutanga, kwakira no gushishikariza kwakira ibikomoka ku iterabwoba.

Nsabimana yitabye urukiko ari muri gereza ya Mageragere
I Nyanza mu cyumba cy’Urukiko Rukuru mu rugereko rwihariye ruburanisha ibyaha mpuzamahanga n’ibyambukiranya imipaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .