NIRDA igiye gufasha inganda zitunganya ibikoresho by’ubwubatsi bikomoka ku mabuye

Yanditswe na Niyitanga Jean Paul
Kuya 8 Ugushyingo 2020 saa 08:05
Yasuwe :
0 0

Ikigo cy’Igihugu cy’Ubushakashatsi n’Iterambere ry’Inganda (NIRDA) cyatangije gahunda ya ‘Open calls’ igamije kuzafasha inganda zitunganya umusaruro ukomoka ku mabuye, akavamo ibikoresho by’ubwubatsi.

Inganda zikora ibikomoka ku mabuye bivamo ibikoresho by’ubwubatsi ni zimwe mu zigiye gufashwa kubona imashini zikoresha ikoranabuhanga rigezweho n’ubundi bufasha muri Open Calls mu mwaka wa 2020-2021.

Muri gahunda yo gufasha abikorera kongera ubwiza n’ubwinshi bw’ibyo bakora, hagamijwe kongera ingano n’ubwiza by’ibikorerwa mu Rwanda.

Muri iyi gahunda ya Open Calls, NIRDA izafatanya n’Ikigo cy’Ababirigi cy’Iterambere (Enabel). Abashaka guhatanira iyi nkunga babisaba binyuze ku rubuga rwa NIRDA bakabona ahanditse “open Calls portal”.

Abazatsinda aya marushanwa bazafashwa kubona ibikoresho bigezweho nk’imashini n’ibindi ku nguzanyo izishyurwa nta nyungu nta n’ ingwate basabwe. Ni inguzanyo itangwa ku bufatanye na Banki y’u Rwanda ishinzwe iterambere (BRD).

Abazatsinda kandi bazahabwa amahugurwa ku ikoreshwa ry’ikoranabuhanga, kumenyekanisha ibyo bakora n’ibindi.

Umuyobozi w’Agateganyo wa NIRDA, Twahirwa Christian yavuze ko muri iyi gahunda, ikigamijwe ari ugufasha inganda kuzamura imikorere yazo hagamijwe kongera ubwiza n’ubwinshi bw’ibyo bakora, bakanongera umusaruro w’ibikorerwa mu Rwanda.

Yagize ati “NIRDA ifite inshingano zo gufasha inganda kugira ubushobozi bwo guhatana ku isoko ryo mu Rwanda ndetse n’isoko mpuzamahanga, twahisemo gufasha inganda z’abikorera mu ruhererekane nyongeragaciro rw’ibikomoka ku mabuye ngo zongere ubudahangarwa n’umusaruro wazo.”

Avuga ko NIRDA yizeye ko ibi byagabanya icyuho hagati y’ibikorerwa mu Rwanda n’ibitumizwa mu mahanga, zigahanga imirimo mishya, ubukungu bw’inganda ndetse n’ubw’igihugu bugatera imbere.

Yakomeje ati “Turacyatumiza ibikoresho byinshi by’ubwubatsi nyamara dufite amabuye y’agaciro atandukanye harimo n’amakoro. Turashaka gufasha inganda gukoresha ikoranabuhanga rigezweho bagakora ibikoresho by’ubwubatsi bivuye mu mabuye, bishobora guhangana ku isoko ryo mu Rwanda no mu mahanga, bikagabanya ibitumizwa mu mahanga bikanagabanya igiciro cy’ibikoresho by’ubwubatsi.”

Iyi gahunda abayobozi bavuga ko itashoboka abikorera batabigizemo uruhare, kuko ari inkingi ya mwamba mu kwihutisha ubukungu n’iterambere ry’igihugu.

Faida Jean Marie Vianey ukora ubucukuzi bw’amabuye akorwamo amakaro, avuga ko iyi gahunda izafasha abacukura amabuye kubona imashini zibafasha, kuko ubusanzwe kuzibona ngo biba bigoye.

Ati “Iyi gahunda ya Open Calls ni nziza cyane. Kubona ibikoresho ntabwo ari ikintu cyoroshye kuko bisaba amafaranga menshi, gucukura ibuye ukazarikuramo amakaro byose bisaba imashini, hari izicukura, iziyakata […] Ubundi twakoreshaga ibikoresho bya gakondo ku buryo bidatanga umusaruro ufatika.”

Ubushakashatsi bwakozwe na NIRDA bwerekana ko 87.6% badafite uburyo bw’ikoranabuhanga bwo gushaka amabuye, mu gihe 94% bakoresha ibikoresho bya gakondo mu gucukura amabuye.

Umuyobozi Mukuru ushinzwe inganda n’iterambere muri Minisiteri y’Ubucuruzi n’Inganda (MINICOM), yavuze ko iyi gahunda izatuma ibikoresho by’ubwubatsi nk’amakaro, garaviye n’ibindi biboneka ku isoko ari byinshi, bityo bigabanye igiciro cy’ibyo bikoresho.

Uhagarariye Enabel mu Rwanda, Dirk Deprez, yavuze ko bahisemo gufasha NIRDA mu rugendo rwo guteza imbere izi nganda, kuko bizeye ko bizazifasha kugera ku bicuruzwa bishobora guhangana ku isoko ry’u Rwanda no mu karere ruherereyemo.

Muri gahunda ya guverinoma y’imyaka irindwi yo kwihutisha iterambere, Leta ifatanyije n’abikorera irateganya kongera ubukungu bw’igihugu ku kigero cya 17% no guhanga imirimo 214,000 idashingiye ku buhinzi buri mwaka, kuzana iri koranabuhanga bikaba byitezweho kongera imirimo.

Abakeneye ubufasha no kumenya byinshi kuri iyi hagunda bahamagara umurongo utishyurwa wa NIRDA wa 1055 cyangwa bakajya ku cyicaro cyayo mu nyubako ya City Tower, igorofa rya karindwi. Gusaba ubu bufasha bizarangira ku itariki ya 30 Ugushyingo 2020.

Uhagarariye Enabel mu Rwanda, Dirk Deprez, yavuze ko bahisemo gufasha NIRDA mu rugendo rwo guteza imbere izi nganda, kuko bizeye ko bizazifasha kugera ku bicuruzwa bishobora guhangana ku isoko ry’u Rwanda no mu karere ruherereyemo\
Ni inama yitabiriwe n'abanyenganda batandukanye

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .