00:00:00 IGIHE NETWORK KN KINYARWANDA EN ENGLISH FR FRANCAIS

Ni we wamwinjije mu buhinzi! Minisitiri Musabyimana yavuze byinshi kuri Prof Mbanda

Yanditswe na Akayezu Jean de Dieu
Kuya 23 Mutarama 2023 saa 08:11
Yasuwe :

Benshi mu ntiti, abahanga mu buhinzi, ubworozi ndetse n’ibinyabuzima muri rusange, abayobozi mu nzego zitandukanye u Rwanda rufite uyu munsi, banyuze mu biganza bya Prof Kalisa Mbanda.

Impamvu ni uko uretse kuba yarabaye umwarimu muri Kaminuza Nkuru y’u Rwanda mu mashami arimo iry’ibinyabuzima [Biology], yaje no kuba Umuyobozi Mukuru w’Ishuri Rikuru ry’Ubuhinzi n’Ubworozi (ISAE), nyuma ryaje kuba kaminuza bigizwemo uruhare na we.

Ni mu gihe kandi ubwo yatabarukaga ku wa 13 Mutarama 2023, yari amaze imyaka itari mike ari Umuyobozi w’Icyubahiro [Chancellor] wa Kaminuza Yigenga ya Kigali, ULK.

Muri make ni ‘Mwalimu’ kuko inshingano nyinshi yakoze uretse izo kuyobora Komisiyo y’Igihugu y’Amatora yari amazemo imyaka 10, ikindi gihe yari umwalimu muri kaminuza zaba izo mu Bubiligi, Repubulika Iharanira Demukarasi ya Congo no mu Rwanda.

Minisitiri w’Ubutegetsi bw’Igihugu, Musabyimana Jean Claude ni umwe mu batojwe na Prof Kalisa Mbanda.

Mu mugoroba wo kwizihiza ubuzima bwe, Minisitiri Musabyimana yavuze ko yamenye Prof Mbanda mu 1995, ubwo yamwigishaga isomo rya ‘Biologie végétale’ mu mwaka wa mbere muri Kaminuza y’u Rwanda. Icyo gihe kandi ngo ni we wari ukuriye Ishami ry’Ubuhinzi.

Ati “Yari umuhanga cyane, cyane, cyane birenze [...] akaba umuntu ukunda akazi akora n’ibintu byinshi icya rimwe kuko nicyo gihe yigishaga muri Kaminuza Nkuru y’u Rwanda, i Butare, agakora muri Minecofin [Minisiteri y’Imari n’Igenamigambi] hari ibintu bandikaga bya EDPRS n’ibindi n’ibindi.”

Niwe watumye yiga ubuhinzi

Minisitiri Musabyimana yavuze ko uko gukunda akazi, gukora ibintu byinshi icya rimwe yabonanye Prof Kalisa byamufunguye amaso.

Ati “Yatubwiraga ukuntu ushobora gukora, ukaba mwalimu, ugakora n’ibintu biguteza imbere, atubwira ukuntu Kinshasa akiriyo yahingaga imboga za ‘Dodo’, atubwira ukuntu amafaranga ya dodo ashobora kuruta amafaranga ya zahabu.”

Yakomeje agira ati “Ndabyibuka iryo somo yarariduhaga buri gihe, atubwira ati ‘ushobora guhinga dodo ukazihinga neza, amafaranga winjije akaruta ay’umuntu umaze ukwezi acukura zahabu atarabona na garama imwe. Yarabitwigishaga, atwigisha gukunda umurimo.”

Ibi ngo nibyo byatumye Minisitiri Musabyimana afata icyemezo cyo guhindura ibyo yari yagiye agiye kwiga bikarangira akurikiranye ubuhinzi. Icyo giye yari yatangiye mu mwaka wa mbere ibijyanye n’ibinyabuzima [Biology] ariko ageze mu mwaka wa kabiri arahindura yigira mu buhinzi.

Ati “Nahisemo kwiga ubuhinzi kubera ko nabonaga Kalisa atubwira ibintu byinshi akora, tubona ari umuntu w’intangarugero wakwigiraho byinshi.”

Yakomeje agira ati “Yigishaga isomo ryo kumenya ibyatsi [Systematic Botany], ibyatsi byose ugomba kubimenya, umugoronome ugomba kuba ubizi n’iyo waba utarabibona, ryari isomo rikomeye, ryaratunaniraga twese. Ashyiraho uburyo bwo kubitwigisha, twakundaga kwicara hanze mu mucaca, agakuraho ibirenge byawe, agapfura ibyatsi akakubaza ati ibi ni ibiki? Bikatunanira, ati ariko kuki mugenda nk’amatungo? Mukwiriye gutandukana n’amatungo.”

Avuga ko ibyo byatumaga buri gihe aho umuntu akandagiye, yibaza ibyatsi akandagiyeho ku buryo byatumye isomo ryoroha, ku buryo bose Systematic batangiye kujya bayitsinda.

Prof Mbanda yaje kugirwa umuyobozi wa ISAE, impinduka nan’ubu ziracyagenderwaho

Ubwo Musabyimana yari arangije kwiga muri ISAE yaje guhabwa akazi ko kwigisha, icyo gihe ngo hariho undi muyobozi ndetse iri shuri ryari rikibarizwa mu Mujyi wa Kigali ahazwi nko mu Rubirizi.

Icyo gihe kandi ngo hari hari igitekerezo cyo kwimura iri shuri rikajyanwa mu Majyaruguru ariko abanyeshuri, abarimu na bamwe mu bayobozi ngo ntibakozwaga icyo cyemezo.

Gusa ngo hashize igihe, Kalisa Mbanda agirwa umuyobozi w’iryo shuri aho inama ya mbere yakoresheje yari iyo kubwira abantu ko bagomba kwimuka bakajya i Musanze.

Icyo Musabyimana yibuka gikomeye ni inama yabagiraga nk’abarimu n’abakozi ba ISAE muri rusange.

Ati “Yaratubwiraga ati ariko ntabwo ukwiye kuba mwarimu gusa ngo uze hano wigishe, utahe ujye kunywa byeri gusa nurangiza ujye kuryama. Ati ibyo ntabwo ari ubuzima ntaho byazakugeza.”

Yakomeje agira ati “Icyo kintu yavugaga [...] uri i Busogo hari imisozi ihabangamiye imbere yaho, buri gihe yaratubwiraga ati murebe iriya misozi iri hariya, abantu bigisha Agronomy nta bibazo bibareba? Ariko nyuma uko yagiye abitubwira [...].”

Musabyimana avuga ko icyo gihe yaje kwiyemeza kugira impinduka azana ku musozi wa Busogo aribwo yatangiye kujya afata abanyeshuri akabajyana gutera ibiti, guca imirwanyasuri n’ibindi.

Ati “N’uyu munsi iyo uri muri ISAE hari imisozi bakunda guhingaho ingano iriho ibiti bya ‘Uranus’ byinshi, biriya biti ni Mbanda wabiteye no gukorana n’abaturage. Hari n’agasozi bita Butaraga, bakitaga Buhene, naho twarangije ahandi, ati tugiye kurwana na Buhene, abanyeshuri tukabajyanayo, tukajya gupimira abanyeshuri aho barwanya isuri [...].”

Yakomeje agira ati “Abaturage ni uko bagiye bamumenya, bari baziko Mbanda ari ‘izina’ rihabwa umuyobozi wa ISAE, bose niko bari babizi, bari baziko Mbanda ari Umuyobozi w’Icyubahiro wa ISAE.”

Minisitiri Musabyimana avuga ko Kalisa Mbanda yakoze byinshi muri Busogo,birimo gukora ubukangurambaga, kurwanya amacakubiri n’ibindi byinshi byatuma iri shuri rishinga imizi.

Kuri we by’umwihariko bakundaga gukorana bya hafi, akamugira inama z’uko yatera imbere haba mu kazi n’ubundi buzima busanzwe.

Yagiye kwiga mu Bubiligi, agira impungenge z’uko atazagaruka

Mu 2004, Musabyimana yagiye kwiga mu Bubiligi gukomerezayo amasomo. Ni ibihe Abanyarwanda benshi bajyaga mu mahanga aho kugira ngo bagaruke bakigumirayo.

Icyo gihe ubwo yari agiye kugenda, ngo Kalisa yaramuhamagaye amubaza niba koko agiye kwiga azagaruka cyangwa atazamutenguha akaguma i Burayi.

Musabyimana ati “Icyo gihe hari ibibazo bikomeye, abasore n’abandi nkanjye kuko icyo gihe uwajyaga i Burayi akenshi yakundaga kugumayo, njya kugenda arampamagara, none ugiye kwiga, dore ni wowe Munyarwanda wari uri muri ‘Génie Rural’ [...] ndamubwira nti ngusezeranyije ko nzagaruka.”

Yakomeje agira ati “Buri kwezi yarampamagaraga ku buryo ngiye no kugaruka yanyoherereje imodoka ku kibuga cy’indege iza kumfata ndetse nkoze n’ubukwe yambaye hafi abugira nk’umwe [...] yankoreye ibintu byinshi.”

Minisitiri Musabyimana avuga ko ibyo yamukoreraga atari we wenyine ahubwo yitaga cyane ku bantu benshi cyane cyane urubyiruko kuko yashakaga ko bakura.

Ati “Ndibuka yangize umuyobozi ushinzwe amasomo, ampa akazi ko kuyobora abandi barimu. Nari nkiri muto ndabitinya arambwira ati ibyo byo kwitinya nibyo bituma mudatera imbere.”

Minisitiri Musabyimana avuga ko Mbanda yakundaga kubakoresha inama z’Umuryango FPR Inkotanyi akababwira ko gukunda igihugu, gukunda umurimo aricyo kintu gishobora gutuma aho bari hatera imbere.

Ikindi ni uko ngo Musabyimana ajya muri politiki bwa mbere agiye kwiyamamariza kujya muri Njyanama y’Akarere ka Musanze, yabajije Kalisa Mbanda, amubwira ko azabishobora nk’uko ibindi yagendaga abikora.

Musabyimana kandi yahishuye ko Papa we yiganye na Kalisa Mbanda aho icyo gihe yitwaga Kalisa Jean Pierre, mbere y’uko ahindura amazina ubwo yageraga muri RDC.

Ati “Nyuma rero haje kuba ikintu kimeze nk’igitangaza, naje nyuma, muzehe wanjye [aherutse kwitaba Imana- aruhukire mu mahoro] twaje kuganira ati ariko uwo Mbanda uvuga irindi zina yitwa nde? Ndamubwira nti yitwa Kalisa, ndamubaza ati nibyo narahize. Ati twariganye, niko muzehe yambwiye icyo gihe, ati yitwaga Kalisa Jean Pierre.”

Yakomeje agira ati “Icyo gihe nagize ibinezaneza, ngira amatsiko njya kumureba ndabimubaza, arambwira ati nibyo, mubaza uko yiswe Mbanda [...] kuva icyo gihe noneho tuba abantu ba hafi cyane. Kalisa rero yari umubyeyi kuri benshi, kuko abantu twakoranye muri ISAE ni benshi, kandi hose aho yanyuze yatubereye umubyeyi, intangarugero, ntacyo twavuga kindi uretse gusaba Imana yo mu Ijuru ngo imutuze aheza, aruhukire mu mahoro.”

Prof Kalisa Mbanda witabye Imana tariki 13 Mutarama 2023,azize urupfu rutunguranye biteganyijwe ko arasezerwaho bwa nyuma ndetse ashyingurwe kuri uyu wa Mbere tariki 23 Mutarama 2023.

Umuhango wo kwishimira ubuzima bwa Prof Mbanda wabaye kuri iki Cyumweru
Minisitiri Musabyimana (hagati) yari kumwe na Depite Barikana Eugene
Uyu mugoroba witabiriwe n'umuryango wa Prof Mbanda, inshuti n'abaturanyi
Mutangana Jean Bosco yahamije ko Prof Mbanda yari umuntu w'inyangamugayo, akaba n'umuturanyi mwiza
Minisitiri Musabyimana (hagati) yari kumwe na Depite Barikana Eugene
Uyu mugoroba wahariwe kwizihiza ubuzima bwa Prof Kalisa Mbanda
Minisitiri Musabyimana yashimye ubuhanga bwa Prof Kalisa Mbanda wamwigishije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .