Ni iki Polisi iri gukora ku muvuduko w’ibinyabiziga ukabije mu masaha y’ijoro?

Yanditswe na Ndahayo Emmanuel
Kuya 12 Kanama 2020 saa 07:31
Yasuwe :
0 0

Mu guhangana n’icyorezo cya Coronavirus cyibasiye Isi muri rusange, Leta y’u Rwanda yashyizeho ingamba zirimo ko nta ngendo zemewe hagati ya saa tatu z’ijoro na saa kumi n’imwe za mu gitondo.

Ingendo zigomba kuba zifunze nyuma ya saa tatu, ibikorwa byose bigahagarara uretse ibikorwa by’ingenzi cyane nk’ibyo gutanga serivise z’ubuvuzi.

Mu gushyira mu bikorwa icyo cyemezo, Polisi y’u Rwanda yafashe ingamba zo gukora umukwabu nyuma ya saa satu z’ijoro, abafashwe barenze ku mabwiriza bakarazwa muri stade ziri ahantu hatandukanye, bakigishwa mu gukumira ko bazongera kugwa muri iryo kosa.

Kurara muri stade byakanze abantu, kuko birumvikana ko abafite akazi mu gitondo bitaborohera ndetse n’imbeho y’ijoro si iyo gukinisha.

Mu rwego rwo kwirinda ibi byose, abatwara ibinyabiziga bakunze gukoresha umuvuduko w’umurengera cyane cyane iyo amasaha yegereje saa tatu, bagamije kwirinda kurara muri stade.

Mu minsi ishize mu mujyi wa Kigali humvikanye impanuka zabayeho mu masaha y’ijoro, imwe ibera i Remera indi i Nyamirambo. N’ubwo iperereza ritaratangaza icyaziteye, abenshi bazihuje na gahunda yo guhagarika ingendo saa tatu z’ijoro, hashingiwe ku muvuduko izo modoka zombi zagenderagaho igihe cy’impanuka.

Mu kiganiro na IGIHE, Umuvugizi wa Polisi y’u Rwanda, CP Kabera Jean Bosco, yavuze ko icyo kibazo bakizi, ndetse ko Polisi ishishikariza abayobozi b’ibinyabiziga kwitwararika.

Yagize ati “Ibyo natwe turabibona, buri gihe dukunze kubivuga ko abantu bakwiye gukoresha igihe cyabo neza, bagakora akazi kabo bakurikije amasaha ahari”.

CP Kabera yavuze ko isaha ya saa tatu yagiyeho hatirengangijwe ko hashobora kubaho nk’akazi kenshi, gupfumukisha ipine n’ibindi nk’umuvundo w’imodoka, gusa yongeyeho ko ari ngombwa kubahiririza izi ngamba kuko zigamije kurinda ikwirakwira ry’icyorezo.

Ati “Abantu nibumve ko ayo masaha yose, kuva saa tatu kugera saa kumi n’imwe za mu gitondo yagiyeho ibyo byose bizwi, ariko bitabujije ko igihe hari abantu bafite ibibazo byumvikana babibwira Polisi ikabyumva”.

CP Kabera yongeyeho ko gahunda ngari za Polisi zo kwirinda impanuka zigikomeje no mu bihe by’icyorezo, asaba abatwara ibinyabiziga kwitwararika kuko impanuka zishobora guteza ibindi bibazo birimo n’imfu.

Yavuze ko umuyobozi w’imodoka ari we muntu wa mbere ufite inshingano zo kugena umuvuduko, asaba ko bumvira amategeko y’umuhanda kandi bagateganya ibikorwa byabo ku buryo bitari buze kugongana n’isaha yagenwe.

Ati “Umuntu ufite inshingano ya mbere yo kugabanya umuvuduko ni umuyobozi w’ikinyabiziga, ni we ushobora kongera umuvuduko agahitana ubuzima bwe n’ubw’abandi, rero nibareke kongera umuvuduko, bagendere ku muvuduko wemewe, bakurikize amategeko y’ibyapa n’ibirango by’imihanda, bityo bagabanye umuvuduko ku mihanda”.

CP Kabera avuga ko Polisi ihora ikurikirana imyitwarire y’abayobozi b’ibinyabiziga ku mihanda, kandi ko urwo rwego rutazatinya guhana abagaragaraho amakosa hatitawe ku mpamvu izo ari zo zose.

Mu masaha yegera saa tatu z'ijoro hakunda kuboneka umuvundo w'ibinyabiziga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .