Ni igabanuka ritadushimishije – Minisitiri Ngamije avuga ku bana 33% bagwingiye

Yanditswe na IGIHE
Kuya 4 Ukuboza 2020 saa 11:30
Yasuwe :
0 0

Minisitiri w’Ubuzima Dr Daniel Ngamije yavuze ko ari ikibazo gikomeye kuba 33% by’abana bari munsi y’imyaka itanu mu Rwanda bafite ikibazo cyo kugwingira, nubwo uyu mubare wagabanutseho 5% ugereranyijwe no mu myaka itanu ishize.

Ubushakashatsi bwa gatandatu ku bwiyongere n’ubuzima bw’abaturage mu Rwanda, RDHS, bwamuritswe kuri uyu wa Kane, bugaragaza ko abana bagwingiye bavuye kuri 38% mu 2014/15 bagera kuri 33% mu 2019/20, ariko barimo 9% bagwingiye ku rwego rukabije.

Ni mu gihe Leta yari yihaye intego ko muri uyu mwaka nibura igipimo cy’abana bagwingiye kizaba kigeze kuri 30%.

Nyuma y’imurikwa ry’ubu bushakashatsi, Minisitiri Ngamije yavuze ko aho imibare igeze atari myiza, kuko igihe cyose umwana yagwingiye ari ikibazo, byongeye intego leta yihaye iracyaburaho 3%.

Ati “Niho rero tugomba gushyira ingufu kugira ngo ubutaha tubanze tugere aho twagombaga kuba turi uyu munsi, ariko tunaharenge tugumye kumanuka, nicyo cyifuzo cya Minisiteri y’Ubuzima n’izindi nzego zose zikora ku kibazo cyo kugwingira.”

Yavuze ko mu kwirinda igwingira ry’abana, inzego zose bireba zigomba gukorana, ibiribwa bikaboneka ku bwinshi, kandi byujuje intungamubiri zose kugira umwana akure neza.

Gusa yagaragaje impungenge ku miryango imwe icyinangiye ku kuboneza urubyaro, kuko byongera ingorane mu kubona ibiribwa umuryango ukeneye.

Yakomeje ati “Niba imiryango itishoboye ifite n’abantu benshi, ni ikibazo, ni ukuvuga ko ikiguzi cy’amafunguro kiba kiri hejuru ugereranyije n’abakeneye kugerwaho n’amafunguro akwiye. Noneho iyo ari mu muryango ukennye, urumva ko basaranganya amafunguro makeya, iyo ni ingaruka ikomeye.”

“Kuringaniza urubyaro bifite ingaruka no kuri iki kibazo kijyanye no kugwingira. Ingo ziringaniza imbyaro zikabasha kubyara abo zishoboye kurera, ni naryo shingiro ry’ibyo dukunda kuvuga, kubyara abo ushoboye kurera, ingaruka ni uko ugira umuryango ufitiye ubushobozi bwo gutunga, amafunguro akwiriye, hakirindwa ikibazo cyo kugwingira.”

Ibyo ngo bikwiye kuzuzwa n’ubumenyi bwo gutunganya amafunguro yujuje intungamubiri, kuko hari ubwo usanga ababyeyi batavanga amafunguro neza kugira ngo umwana abone indyo ikwiye, irimo intungamubiri zose zituma akura, izimurinda indwara n’izituma abona ingufu.

Yakomeje “Hari gahunda zashyizweho nk’akarima k’igikoni, abajyanama b’ubuzima, ibyo byose byakozwe kugira ngo ababyeyi bahugukirwe kujya batunganya indyo yuzuye kandi ikwiriye. [33%] Ni igabanuka ritadushimishije, twumva byagakwiye kugabanuka kurushaho tukareba biriya bipimo bya 30% twabigeraho.”

Ubushakashatsi bwamuritswe kuri uyu wa Kane kandi bugaragaza ko muri rusange, 1% by’abana bari munsi y’imyaka itanu bari bafite ibiro bike bikabije ugereranyije n’uburebure bafite mu 2020, bavuye kuri 2% mu 2015, mu gihe 8% by’abana bari munsi y’imyaka itanu bari bafite ibiro bike ugereranyije n’imyaka cyangwa amezi bafite mu 2020, ugereranyije na 9% mu 2015.

Abaganga bagaragaza ko kugwingira biterwa no kuba umwana atarabonye indyo yuzuye igihe kirekire no kurwaragurika, bikagira ingaruka z’igihe kirekire kuko bibarwa ko igwingira rigabanya ubukungu bw’igihugu ku kigero cya 3% by’umusaruro mbumbe w’igihugu, kubera ko umwana wagwingiye adatanga umusaruro nk’uwa mugenzi we bangana.

Abahanga kandi bagaragaza ko ari ngombwa kwita ku mwana hakiri kare kuko hafi ya 80% by’ubwonko bwe biremwa mu myaka itandatu ya mbere. Iyo umwana agwingiye mu bwonko, mu mitekereze ye no mu gihagararo, aba atakaje amahirwe atazongera kugaruka no mu bukuru bwe.

Minisitiri w'Ubuzima Dr Daniel Ngamije, ubwo kuri uyu wa Kane hamurikwaga Ubushakashatsi bwa gatandatu ku bwiyongere n’ubuzima bw’abaturage mu Rwanda, RDHS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .