00:00:00 IGIHE NETWORK KN KINYARWANDA EN ENGLISH FR FRANCAIS

Ngororero: Polisi yafashe abantu umunani bacukuraga amabuye y’agaciro binyuranije n’amategeko

Yanditswe na Bukuru JC
Kuya 21 August 2022 saa 07:31
Yasuwe :

Polisi y’ u Rwanda ifatanyije n’inzego z’ibanze mu Karere ka Ngororero, kuri uyu wa Gatanu tariki ya 19 Kanama, yafashe abantu umunani bakora ibikorwa byo gucukura amabuye y’ agaciro mu buryo bunyuranije n’amategeko.

Abafashwe bafatiwe mu Mudugudu wa Gapfura, Akagali ka Rusororo, Umurenge wa Muhororo, umwe muri bo, afatanwa ibiro 8 by’amabuye y’agaciro yo mu bwoko bwa Gasegereti.

Chief Inspector of Police (CIP) Mucyo Rukundo, ushinzwe guhuza ibikorwa bya Polisi n’abaturage mu Ntara y’Iburengerazuba, yavuze ko aba bafatiwe mu bikorwa Polisi ikomeje gukora byo gufata abantu bakora ibyaha byo kwangiza ibidukikije, harimo nabakora ibikorwa byo gucukura amabuye y’agaciro mu buryo bunyuranyije n’amategeko dore ko binateza impanuka zishobora gutwara ubuzima.

Ati: " Polisi yari ifite amakuru ko hari itsinda ry’abanntu bacukura amabuye y’agaciro mu buryo bunyuranyije n’amategeko, bakanayayungurira mu mugezi wa Nyarigamba, aho banduzaga amazi abaturage, bakanangiza imyaka y’abaturage ihinze hafi y’umugezi."

CIP Rukundo yongeyeho ko Polisi ifatanyije n’izindi nzego z’umutekano ndetse n’inzego z’ibanze ku wa Gatanu nibwo zafashe abantu barindwi bafite ibikoresho gakondo bifashishaga mu gucukura amabuye, umwe afatirwa mu rugo iwe mu Kagali ka Rusororo afite ibiro 8 by’amabuye ya Gasegereti."

CIP Rukundo, yibukije abaturage ko gucukura amabuye y’agaciro binyuranyije n’amategeko ari bimwe mu bikorwa byangiza ibidukikije kandi bigateza n’ibyago byo kuba byatwara ubuzima, avuga ko ibikorwa byo kurwanya ibi bikorwa bizakomeza.

Abafashwe n’ibyo bafatanywe bashyikirijwe urwego rw’ubugenzacyaha (RIB) rukorera kuri sitasiyo ya Ngororero ngo hakurikizwe amategeko.

Ingingo ya 54 yo mu itegeko N° 58/2018 ryo ku wa 13/08/2018 rigenga ubucukuzi bw’amabuye y’agaciro na kariyeri Ingingo ya 54 ivuga ko Umuntu wese ushakashaka, ucukura, utunganya,ucuruza amabuye y’agaciro cyangwa kariyeri nta ruhushya, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano. Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

Abafashwe bashyikirijwe inzego z'ubutabera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .