Ngororero: Imiyoboro izageza amashanyarazi ku ngo zirenga 6000 igeze kure yubakwa

Yanditswe na IGIHE
Kuya 28 Ukwakira 2020 saa 08:07
Yasuwe :
0 0

Imiryango isaga 6000 iherereye mu Karere ka Ngororero, yatangiye guhabwa amashanyarazi afatiye ku miyoboro irimo kuhubakwa na Sosiyete y’u Rwanda Ishinzwe Ingufu (REG).

Umuyobozi w’Ishami rya REG mu Karere ka Ngororero, Niyotwizera Christopher, yatangaje ko uyu mushinga wo kubaka iyi miyoboro watewe inkunga na Banki Nyafurika Itsura Amajyambere (AfDB) ugeze kure ku buryo hari abaturage batangiye guhabwa amashanyarazi.

Yagize ati “Uyu mushinga uzageza amashanyarazi ku ngo zirenga 6000 mu mirenge itandukanye iherereye mu Karere ka Ngororero. Ubu ugeze ku kigero cyiza kuko hari ingo twamaze guha amashanyarazi zigera ku 1500.”

Uyu mushinga uzubaka imiyoboro itandukanye izakwirakwiza amashanyarazi mu Mirenge ya Ngororero, Kavumu, Kabaya, Muhanda, Kageyo na Matyazo. Ireshya n’ibilometero 49.4 by’umuyoboro uringaniye (MV) ndetse n’ibilometero 131 by’umuyoboro muto (LV).

Niyotwizera avuga ko mu Karere ka Ngororero, mu ngo zisaga 75000 zihatuye, izigera ku ijanisha rya 41.5% ari zo ubu zifite amashanyarazi, ubariyemo izikoresha imirasire y’izuba zigera ku 6500 ndetse n’izikoresha amashanyarazi afatiye ku muyoboro rusange zigera ku 25 000.

Ati “uyu mushinga uzadufasha cyane kongera umubare w’ingo zifite amashanyarazi ari nako twerekeza ku ntego igihugu cyacu cyihaye y’amashanyarazi kuri bose. Aka ni agace k’icyaro; usanga abaturage bishimiye cyane amashanyarazi kuko azabafasha kwiteza imbere bakora imishinga itandukanye nk’inganda ziciriritse zitunganya ibikomoka ku buhinzi ndetse n’izitunganya ibiribwa n’ibindi bitandukanye nko kogosha, ibyuma bisya n’ibindi.”

Niyotwizera yasabye abatuye aho imiyoboro irimo kunyuzwa gutangira bagatekereza icyo bazakoresha aya mashanyarazi biteza imbere, ntibizagarukire gusa ku gucana no gusharija telefoni.

-  Ibyishimo mu bamaze kuyahabwa

Bamwe mu bamaze kuganura ku mashanyarazi bavuga ko bishimira intambwe bateye kuko bayitezeho byinshi bizahindura imibereho yabo.

Sahunkuye Immaculée utuye mu Mudugudu wa Bukonde mu Kagari ka Nyenyeri, mu Murenge wa Kabaya, yavuze ko amashanyarazi yabagezeho bayanyotewe kuko ubu hari impinduka no mu ijoro babasha gusohoka nta nkomyi.

Yagize ati “Ahari amashanyarazi harabona, hakaba umutekano kuko na nijoro usohoka mu nzu wisanzuye ntacyo wikanga, hagira igikoma nijoro nkasohoka nkareba nta kibazo kubera habona, ariko mbere y’uko tuyabona sinashoboraga gusohoka nijoro.”

Sahunkuye avuga ko ubu agiye kugurira abana be televiziyo izajya ibafasha kwiga no kumenya amakuru.

Nizeyimana Jean Marie Vianney utuye mu Mudugudu wa Kabere mu Kagari ka Busunzu, na we avuga ko ubuzima bwari bugoye batarabona amashanyarazi.

Ati “Twari turi mu kizima ariko ubu ducaginga amatelefoni, yewe hari n’umushoramari ushaka kuzana urusyo rusya amasaka tukajya tubona ifu y’igikoma hafi. Iwanjye ubu abana biga nijoro babona neza mu makayi, mbese tumeze neza.”

Nizeyimana avuga ko agiye gushaka imashini yo kogosha ku buryo azajya yogosha abanyeshuri na we akabona inyungu, imufasha kwiteza imbere.

Ishimwe Victor ni umwe mu rubyiruko rwihangiye imirimo abikomoye ku mashanyarazi. Ubu afite iduka ricuruza ibikoresho by’ikoranabuhanga ndetse akanafotora impapuro n’amafoto.

Yakomeje ati “Iyi serivisi ituma nanjye mbona amafaranga nkatera imbere. Ubu maze ukwezi kumwe ntangiye kandi bimbeshejeho.”

Ishimwe avuga ko ari bwo yari akirangiza amashuri, kandi ko iyo batagira umuriro, atari kwirirwa agaruka iwabo aho avuka, ahubwo yari kujya gushaka imibereho ahandi mu mijyi.

Umworozi Ndamyumugabe Jean d’Amour utuye mu Kagari ka Busunzu, avuga ko iwe mu rugo amashanyarazi atuma arushaho kwizera umutekano w’abe.

Ati “Njye nkunda kuba ntahari nijoro nagiye kureba inka zanjye aho nzororera. Ariko nijoro usanga ab’iwanjye basohoka nta nkomyi, bareba neza ntacyo bikanga.”

Imibare igaragaza ko mu Rwanda, ingo zifite amashanyarazi muri rusange zisaga 56.7% harimo izigera kuri 41.3% zikoresha afatiye ku muyoboro mugari naho 15.4% zikaba zikoresha ayiganjemo akomoka ku mirasire y’izuba adafatiye ku muyoboro mugari.

Amashanyarazi ubu arimo arakwirakwizwa mu ngo zitandukanye mu Karere ka Ngororero
Imiyoboro y'amashanyarazi yamaze kugezwa henshi
Ingo zigera ku 1500 zamaze guhabwa amashanyarazi
Ishimwe Victor ni umwe mu rubyiruko rwihangiye imirimo abikomoye ku mashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .