Ngoma: Imirima y’abaturage 200 igiye kuhirwa hifashishijwe imirasire y’izuba

Yanditswe na Hakizimana Jean Paul
Kuya 10 Ukuboza 2020 saa 07:18
Yasuwe :
0 0

Abaturage 200 bo mu Mirenge ya Mutenderi na Zaza mu Karere ka Ngoma basanzwe bahinga imboga n’imbuto kuri hegitari 20 bagiye kuhirirwa imirima hifashishijwe imirasire y’izuba nk’uburyo butangiza ikirere mu mushinga uzatwara miliyoni 250 Frw.

Uyu mushinga Akarere ka Ngoma kari kuwufatanya n’Umuryango Nyarwanda uharanira Iterambere ry’Icyaro (RWARRI); ugamije kuhira ku buso buto hakoreshejwe uburyo butangiza ikirere.

Umuyobozi Nshingwabikorwa w’Umuryango RWARRI, Uwizeye Belange, yavuze ko uyu mushinga uzafasha abahinzi bato basanzwe bahinga imboga n’imbuto gukoresha uburyo butangiza ikirere hifashishijwe imirasire y’izuba n’ibigega bikozwe mu mabuye n’ibumba.

Ati “Ubu abaturage twamaze kubashyira mu mashyirahamwe, tumaze no kubona ubutaka tuzubakaho ibigega naho tuzashyira imirasire. Turateganya ko muri Mutarama ibikorwa byo kubaka bizaba byatangiye kugira ngo impeshyi izasange byararangiye. Twashoyemo miliyoni 250 Frw nibura ikigega tuzubaka kikaba kizamara imyaka 100 kikiri kizima.”

-  Kuhira byatwaraga amafaranga menshi abaturage

Uwihanganye Sebahire Faustin yavuze ko ubusanzwe kubona amazi yo kuhira byakundaga kubagora nyamara baturiye Ikiyaga cya Mugesera.

Ati “Mu buryo bwo kuhira kuri hegitari imwe twakoreshaga litiro 18 za lisansi noneho tukuhira inshuro ebyiri mu cyumweru, bikadutwara amafaranga ibihumbi 36 Frw kuko litiro ya lisansi twayiguraga 1000 Frw wabara ku gihembwe ugasanga nibura dukoresha ibihumbi nka 600 Frw mu kuhira no guhemba abakozi badufashije.”

Yakomeje avuga ko uyu mushinga bawitezeho kubafasha kugabanya ingano y’amafaranga batangaga mu kugura lisansi na mazutu bakoreshaga mu kuhira.

Yashimangiye ko kuri ubu bagiye kujya bahinga bakenera kuhira bakabikora badatanze amafaranga ngo ayo bakoreshaga mu kuhira nibura azabafasha mu gukora ibindi.

Gahongayire Ancilla we yavuze ko ubusanzwe yahingaga ariko agatinya kuhira bitewe n’uburyo byari bivunanye.

Yagize ati “Gukura amazi hasi ku kiyaga byari bigoranye rero byatumaga ntahinga ibyo nshaka kuko nta bushobozi nari mfite, ubu ngiye kurushaho guhinga imboga n’imbuto kuko nizeye ko nzuhirirwa.”

Umuyobozi w’Akarere ka Ngoma wungirije ushinzwe Iterambere ry’Ubukungu, Nyiridandi Mapambano Cyriaque, yavuze ko uyu mushinga ugamije kongera umusaruro w’ubuhinzi bw’imboga n’imbuto kugira ngo abaturage barusheho kwihaza no gusagurira amasoko.

Ati “Abaturage bari bamaze iminsi birwanaho bakoresha utumashini tugenda tubaha muri nkunganire, nibabona rero noneho umushinga munini ubagezaho amazi ahoraho tuzi neza ko bazawubyaza umusaruro bakabona inyungu kurusha izo babonaga. Ikindi ni umushinga uzarengera ibidukikije kuko ntuzakoresha mazutu cyangwa amashanyarazi ahubwo uzakoresha imirasire y’izuba.’’

Yasabye abaturage gufata neza ibikorwa remezo bagiye gukorerwa bakirinda kubigira iby’abandi kuko aribo bifitiye umumaro kurusha abafatanyabikorwa bawubazaniye.

Uyu mushinga uzatanga akazi ku baturage 400 bo mu Mirenge ya Mutenderi na Zaza, uzatanga imiyoboro ikwirakwiza amazi mu mirima ndetse unubakire ubushobozi abaturage.

Akarere ka Ngoma gafite hegitari 1000 zikorerwaho ibikorwa byo kuhira, muri uyu mwaka hakaba hateganyijwe kongeraho izindi hegitari 388 izigera kuri 200 akaba arizo zimaze gukorerwaho ibikorwa byo kuhira harimo 60 zizaba zikoresha imirasire y’izuba.

Ubusanzwe kubona amazi yo kuhira byakundaga kugora abahinzi kuko byabasabaga kuyakura mu Kiyaga cya Mugesera
Abaturage bahinga imboga n'imbuto bagiye gufashwa kuhira mu rwego rwo kongera umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .