00:00:00 IGIHE NETWORK KN KINYARWANDA EN ENGLISH FR FRANCAIS

Ngoma: Imibiri 160 y’abazize Jenoside yakorewe Abatutsi yashyinguwe mu cyubahiro i Rukumberi

Yanditswe na Hakizimana Jean Paul
Kuya 25 April 2022 saa 07:49
Yasuwe :

Umunyambanga wa Leta muri Minisiteri y’Uburezi, Irere Claudette, yasabye urubyiruko kwihatira kumenya amateka ya Jenoside yakorewe Abatutsi kugira ngo abafashe mu guhangana n’abayagoreka bakoresheje imbuga nkoranyambaga.

Yabigarutseho kuri iki Cyumweru tariki ya 24 Mata 2022 ubwo hibukwagwa ku nshuro ya 28 abishwe muri Jenoside yakorewe Abatutsi mu 1994 i Rukumberi mu Karere ka Ngoma.

Ni igikorwa cyitabiriwe n’Umunyamabanga wa Leta muri Minisiteri y’Uburezi, Irere Claudette, Guverineri w’Intara y’Iburasirazuba; Gasana Emmanuel, Abadepite batandukanye, Abasenateri n’abandi bayobozi bo mu nzego z’umutekano n’inzego z’ibanze.

I Rukumberi hahoze ari muri Komine Sake mbere ya Jenoside yakorewe Abatutsi, ni igice cyiciwemo Abatutsi barenga ibihumbi 45 kandi bicwa mu gihe gito.

Aka gace kandi kari mu kageragerejwemo Jenoside nyuma yo kuhajyana Abatutsi benshi ngo bicwe n’isazi ya Tsetse yabaga mu mashyamba yaho.

Bamwe mu barokokeye i Rukumberi bavuze uburyo Jenoside yakorewe Abatutsi muri iki gice yakoranywe ubugome, uburyo bamwe mu batutsi bishwe urw’agashinyaguro, abajugunywe mu rufunzo ndetse no mu biyaga bitatu bikikije uyu murenge birimo Ikiyaga cya Sake, Birira n’umugezi w’Akagera.

Gusa bose bashimira uburyo bake basigaye barokowe n’Inkotanyi ubwo zageraga muri aka gace.

Umunyamabanga wa Leta muri Minisiteri y’Uburezi, Irere Claudette, wari Umushyitsi Mukuru muri uyu muhango, yavuze ko kuri ubu abarokotse bo mu Murenge wa Rukumberi kimwe n’ahandi hirya no hino mu gihugu bishimira intambwe bamaze kugeraho, avuga ko ikiruta byose bafite igihugu kibakunda kandi kitazabetererana.

Ati “ Uyu munsi turubaka u Rwanda ruzira ingengabitekerezo ya Jenoside ndetse n’amacakubiri, turaharanira ko abazadukomokaho bazabaho neza kandi ko batazigera babona Jenoside ukundi mu gihugu cyacu.”

Yakomeje asaba urubyiruko kwihatira kumenya amateka, arusaba kuyagira intwaro ituma ruhangana n’abagoreka amateka ndetse bakanapfobya Jenoside yakorewe abatutsi.

Ati “ Imbuga nkoranyambaga bakoresha bapfobya banahakana, reka tuzikoreshe tuvuga ukuri, ubuhamya twumvise, abo tugiye gushyingura mukanya, abashyinguye, ibi byose ntabwo ari ibinyoma ni ukuri mureke twifashishe amateka yacu kugirango aturinde kuzongera kubona Jenoside ikorwa mu gihugu cyacu.”

Yasabye ababyeyi n’abarezi kurinda abana ingengabitekerezo n’imizi yayo yose, abagihembera amacakubiri n’ingengabitekerezo yababwiye ko u Rwanda ruri kubakwa ubu bitazashoboka ko barusenya kuko ngo mu myaka 28 ishize hubatswe byinshi byiza badashobora gusenya, abasaba kuza gufatanya n’abandi mu kurwubaka.

Umunyamabanga Nshingwabikorwa wa Ibuka, Ahishakiye Naphtal, yavuze ko kwibuka ari ukwisubiza agaciro n’ubumuntu ku barokotse Jenoside yakorewe Abatutsi mu 1994, yavuze ko abishwe bari bafite ziremereye kandi zikomeye.

Ati “Aba bantu twibuka bari bafite indangagaciro ziremereye kandi zikomeye, indangagaciro ya mbere tubigiraho ni ukwihangana, aba bantu barihanganaga bikomeye, iyo ugiye kureba mu 1959 barasenyewe, 1963 baramusenyera, mu 1973 baramusenyera baranamumenesha.”

Yakomeje avuga ko kandi mu 1994 babasenyeye bareba bamwe baranicwa, indi ndangagaciro ngo abishwe bari bafite ni ugukora cyane kuko ngo abenshi bagiye basenyerwa guhera mu 1959 kandi bakongera bakiyubaka ku buryo bugaragara, yasabye abarokotse kubigiraho izi ndangagaciro bakarushaho gukunda igihugu no kwiyubaka mu buryo bugaragara.

Urwibutso rwa Rukumberi rushyinguyemo imibiri y’abatutsi bishwe muri Jenoside yakorewe Abatutsi 42 500 kongeraho imibiri 160 yashyinguwe uyu munsi.

Abazize Jenoside yakorewe Abatutsi bahawe icyubahiro bambuwe
Imibiri 160 y'abishwe muri Jenoside ni yo yashyinguwe
Abayobozi mu nzego zitandukanye bitabiriye uyu muhango
Minisitiri Irere yasabye urubyiruko gukoresha ikoranabuhanga mu guhangana n'abapfobya Jenoside yakorewe Abatutsi
Umunyambabanga Nshingwabikorwa wa Ibuka, Ahishakiye Naphtal, yashimiye Leta ku buryo yita ku barokotse Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .