Ngoma: Imfungwa enye zari zatorotse aho zavurirwaga Coronavirus zatawe muri yombi

Yanditswe na IGIHE
Kuya 9 Nyakanga 2020 saa 03:52
Yasuwe :
0 0

Polisi y’u Rwanda yafashe abantu bane bari bafungiwe mu Karere ka Ngoma bari batorotse ikigo bari barashyizwemo bitabwaho nyuma yo gusanganwa icyorezo cya Coronavirus.

Izi mfungwa zatorotse mu ijoro ryo ku wa Gatatu tariki ya 8 Nyakanga 2020, nyuma yo guca ibyuma by’idirishya ry’icyumba cy’amashuri zari zarashyizwemo ku Ishuri ryisumbuye rya ASPEK.

Inkuru ikimenyekana, Polisi ifatanyije n’ubuyobozi bw’inzego z’ibanze mu Karere ka Ngoma bashyizemo imbaraga mu kubashakisha kugira ngo bagarurwe bavurwe.

Ahagana saa sita n’igice z’amanywa, nibwo babiri ba mbere bafashwe ndetse n’abandi bamaze gutabwa muri yombi. Mu masaha ya saa cyenda n’igice abandi babiri nabo bahise bafatwa.

Umuvuguzi wa Polisi, CP John Bosco Kabera, yabwiye IGIHE ko abantu bakwiriye gushyira imbere kwirinda COVID-19, bikanajyana no kwirinda ibyaha.

Avuga ku bafashwe, yagize ati “Uwa nyuma tumufatiye i Rwamagana.”

Mu butumwa bwe yasabye abantu kwirinda kurwara COVID-19 bakurikiza amabwiriza yose atangwa n’inzego z’ubuzima arimo kwambara agapfukamunwa, guhana intera, kwirinda kuramukanya n’andi.

Yanakomeje avuga ko abantu bakwiriye gushyira imbere umuco wo kubahiriza amategeko, birinda ibyaha n’ibindi byose binyuranyije n’amategeko.

Umuvugizi wa Polisi mu Ntara y’Iburasirazuba, Chief Inspector of Police (CIP) Hamdun Twizeyimana, yavuze ko abafungwa bane bari batorotse barimo batatu bakurikiranyweho icyaha cy’ubujura n’undi ukekwaho kuvuga amagambo y’iterabwoba.

Izi mfungwa zirimo uwafatiwe iwe mu rugo mu Murenge wa Mugesera, uwafatiwe mu Murenge wa Kigabiro mu Karere ka Rwamagana, uwo mu Murenge wa Zaza n’uwafatiwe mu wa Mugesera aho yari acumbikiwe n’inshuti ye.

CIP Twizeyimana yavuze ko abagize imiryango y’aho bari bari bose bajyanywe mu kato kugira ngo bakurikiranywe harebwe ko batanduye.

Umuvugizi wa Polisi mu Ntara y’Iburasirazuba, CIP Twizeyimana, yashimiye abaturage babonye abatorotse bakihutira gutanga amakuru bagafatwa.

Yagize ati “Bamaze gucika inzego z’umutekano habayeho gukorana n’izindi nzego z’ubuyobozi bagaragaza imyirondoro yabo n’aho bakomokaga. Kuri uyu wa Kane nibwo abaturage bo mu Mirenge ya Kigabiro, Mugesera na Zaza baje kubona abo bantu bihutira guhamagara Polisi barafatwa.”

Kuri ubu inzego z’umutekano ku bufatanye n’inzego z’ubuzima barimo gushakisha abo baba barahuye nabo kugira ngo basuzumwe. Abaturage basabwe gukomeza ubufatanye mu guhanahana amakuru mu bijyanye no kwirinda icyorezo cya COVID-19.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .