Ngoma: Bashinje ubutekamutwe Prof. Karuranga wahoze ayobora UNIK

Yanditswe na Tuyishimire Raymond
Kuya 1 Ukuboza 2020 saa 02:00
Yasuwe :
0 0

Abaturage bo mu Murenge wa Gashanda mu Karere ka Ngoma mu Ntara y’Iburasirazuba, bashinje uwahoze ayobora Kaminuza ya Kibungo, UNIK, Prof Karuranga Egide, kubatekera umutwe maze agatanga amasambu yabo nk’ingwate ya banki kandi batabyumvikanye, ubu akaba agiye gutezwa Cyamunara.

Aba baturage bavuze ko Karuranga yabegereye nk’umuntu uhavuka, akabasaba amasambu agamije kuyakodesha ngo ayakoreremo imishinga itandukanye irimo ubworozi n’ubuhinzi.

Bemeye kumuha ayo masambu gusa bemeranywa ko azajya ayakodesha ibihumbi 200 Frw ku mwaka mu gihe cy’imyaka irindwi.

Babwiye Radio Flash ko bakimara kwemeranya, Karuranga yahise atangiza ibikorwa by’ubuhinzi n’ubworozi muri ayo masambu ahatera urutoki ndetse yubaka n’ibiraro.

Aba baturage bavuze ko atubahirije ibyo bemeranyije ngo kuko yagiye abishyura nabi abaha ibice.

Umwe yagize ati "Yaduhaye amafaranga y’intica ntikize kandi aduha ibice. Twavuganye 200.000 Frw, akajya ampa 50.000 Frw.”

Undi ati “Yayampaye mu myaka ibiri, ampa ibihumbi 200.000 Frw, ubundi ampa 50.000 Frw.”

Aba baturage bavuze ko bitewe n’umwenda Karuranga yari abereyemo Ikigo cy’Imari cya RIM, cyabasabye kuva mu masambu ndetse n’inzu batuyemo bigahita bitezwa cyamunara.

Ati “Bagiye kudutereza cyamunara amasambu yacu, hanyuma bagakuraho amafaranga Karuranga yari amaze kugezamo atishyuraga RIM.”

Ibyangombya aba baturage bafite, bigaragaza ko bari baragiranye amasezerano yo gutiza ingwate. Bavuze ko yabasinyishije batabanje kureba ibyo basinyira ngo kuko bari bamufitiye icyizere nk’umuntu uyobora kaminuza kandi usanzwe ari umuturanyi.

Umwe ati “Yarazaga akadutwara mu modoka, tugeze kuri banki, twe twicaraga hakurya, we akagenda akandika impapuro, bakaduhamagara ngo tuze dusinye, ntawe wari uzi ibyo yasinyiraga ibyo ari byo.”

Undi ati “Batujyanye kuri RIM turasinya, nta muntu wigeze asoma. N’uwaba azi gusoma ntiyasomye.”

Aba baturage bemeza ko batekewe umutwe bityo ko bafashwa kuko ntaho kwerekeza bafite.

Umwe ati “Uriya ni umutekamutwe ahubwo utabaho, ntabwo twari tumusobanukiwe, twari tumuzi nk’umuturage usanzwe w’inyangamugayo nyuma nibwo twabonye ko ari umutekamutwe."

Undi ati "Twasaba n’ubundi ko leta badufasha bagakurikirana iki kibazo, bakaturenganura. Na benshi twabyishoyemo ku bw’icyzere twari tumufitiye, ntabwo twari tuzi ko yadukorera ibintu nka biriya".

Umuyobozi w’Ikigo cy’Imari RIM ishami rya Kabarondo, Nikuze Donatille, yavuze ko amasezerano bagiranye yabereye imbere ya noteri ko nta cyo bari kuyahinduraho .

Ati “Urumva bamutizaga ingwate, ntabwo banki yari kubyinjiramo kuko we na banki bagiye gusinyira imbere ya noteri wa leta mbere y’uko ahabwa inguzanyo."

Umuyobozi w’Akarere ka Ngoma, Nambaje Aphrodis, yavuze ko nk’akarere basabye ikigo cy’imari kuba kiretse guteza cyamunara, kandi aba baturage bagomba gutanga ikirego mu rukiko.

Ati “Bakwiye gutanga ikirego cy’umuntu wabahemukiye, turasaba banki ko iba ihagaritse guteza cyamunara kugira ngo bibanze bisobanuke.”

Kugeza ubu Prof. Karuranga Egide afungiye muri Gereza ya Mageragere aho akurikiramyweho ibyaha bijyanye no gukoresha nabi umutungo w’iyi kaminuza yahoze ayobora.

Prof Egide Karuranga wari Umuyobozi wa Kaminuza ya Kibungo akurikiranyweho ibyaha birimo gukoresha nabi umutungo wa rubanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .