Ndereyehe ukekwaho ibyaha bya Jenoside yarekuwe nyuma y’amasaha make atawe muri yombi

Yanditswe na Cyprien Niyomwungeri
Kuya 9 Nzeri 2020 saa 11:43
Yasuwe :
0 0

U Buholandi bwarekuye Ndereyehe Charles Ntahontuye nyuma y’amasaha make yambuwe ubwenegihugu bw’iki gihugu agahita afatwa akekwaho uruhare muri Jenoside yakorewe Abatutsi.

Ndereyehe ni umwe mu bashinze ishyaka CDR unakekwaho ibyaha bya Jenoside yakorewe Abatutsi. Yari yatawe muri yombi kuri uyu wa Kabiri ahagana saa kumi n’imwe z’umugoroba nyuma yo kwamburwa ubwenegihugu bw’u Buholandi.

Amakuru yizewe IGIHE ifite, ni uko Ndereyehe n’uruhande rumwunganira bari barajuririye umwanzuro w’urukiko wo kumwambura ubwenegihugu bw’u Buholandi. Umushinjacyaha ntabwo yahise abimenya ahubwo yihutiye kumufata kugira ngo adatoroka ubutabera bitewe n’uko yabonaga uwo ari we muri dosiye.

Kuri uyu wa Gatatu umwunganizi mu mategeko wa Ndereyehe yazindutse ajya kwerekana ko bari bajuririye umwanzuro wo kumwambura ubwenegihugu, hanzurwa ko arekurwa mu gihe hategerejwe umwanzuro w’urukiko kuri ubwo bujurire.

Ndereyehe yarekuwe ariko impamvu si uko yambuwe ubwenegihugu binyuranyije n’amategeko ahubwo ni uko umushinjacyaha yibeshye ko batigeze bajurira icyemezo cyo kwamburwa ubwenegihugu.

Mu kiganiro na IGIHE, Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène, yahamije ko ‘Ndereyehe yajuririye icyemezo cyo kumwambura ubwenegihugu bityo ntashobora koherezwa igihe ubujurire bwe butarasuzumwa. Ashobora no kuba afunguwe mu gihe hategerejwe ko ubujurire busuzumwa kandi bimara iminsi”.

Ku wa 20 Mata 2010 nibwo ubutabera bw’u Rwanda bwashyizeho impapuro mpuzamahanga zisaba ko Ndereyehe atabwa muri yombi, ariko hari hashize imyaka icumi atarafatwa. Mu 2018 Ubushinjacyaha bw’u Rwanda bwongeye kwibutsa u Buholandi kuri izi mpapuro zisaba itabwa muri yombi ry’uyu mugabo.

Ndereyehe ni muntu ki?

Dr Bizimana yabwiye IGIHE ko Ndereyehe ari umwe mu bacurabwenge bakomeye b’ingengabitekerezo yagejeje ku itegurwa n’ishyirwa mu bikorwa rya jenoside yakorewe abatutsi, akaba no guhera mu 1994 aho leta y’abicanyi yatsindiwe, yarakomeje umugambi wo gukwirakwiza ingengabitekerezo ya jenoside mu mahanga.

Guhera mu kwezi kwa gatatu mu 1995 ari mu bashinze umutwe witwa RDR wari ugamije kugaruka mu Rwanda ku ngufu mu buryo bwa gisirikare kugira ngo bakomeze jenoside banayisoze.

Aho agereye mu Buholandi Ndereyehe ntiyarekeye aho yakomeje ibikorwa byo gushinga imitwe yitwaje intwaro, ari mu bashinze FDU Inkingi, anayibera komiseri mukuru wari ushinzwe itangazamakuru n’itumanaho akaba yaragiye yandika inyandiko nyinshi cyane zihamagarira urwango, zikwirakwiza ingengabitekerezo ya jenoside, zipfobya jenoside yakorewe abatutsi, ziharabika leta y’u Rwanda, zinashyigikira uburyo bwo guhungabanya umutekano mu gihugu.

Ku mbuga nkoranyambaga, Ndereyehe ni umuntu wandika akwirakwiza ingengabitekerezo ya jenoside, urwango, ahakana ko abatutsi batigeze bicwa, akwiza ikinyoma cy’uko FPR ngo nayo yakoze indi jenoside.

Dr Bizimana ati “Ndereyehe ntabwo ari umuntu wakoze jenoside gusa ahubwo ni umuntu ukomeje uwo mugambi wo kwifuza ko jenoside ikomeza mu gihugu nubwo yahagaritswe kandi igihugu kikaba gitekanye”.

Mu gihe u Buholandi bwaba bumwohereje mu Rwanda, yaba asanga abandi nka Jean Claude Iyamuremye na Jean-Baptiste Mugimba boherejwe mu Rwanda ku wa 12 Ugushyingo 2016.

Ndereyehe ni umwe mu bashinze ishyaka CDR unakekwaho ibyaha bya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .