Ndabasabye mumurekure nanjye namurekuye -Nyina wa Kizito mu muhango wo kumushyingura

Yanditswe na Habimana James
Kuya 22 Gashyantare 2020 saa 07:30
Yasuwe :
0 0

Nyina wa Kizito Mihigo, Iribagiza Placidie, yabwiye abitabiriye umuhango wo guherekeza umwana we ko bamureka agasanga Imana kuko na we yamaze kumurekura.

Kuri uyu wa Gatandatu tariki 22 Gashyantare 2020, nibwo Kizito Mihigo wapfuye yiyahuye yashyinguwe. Umuhango wo kumusabira wabereye muri Paruwasi ya Ndera iherereye mu karere ka Gasabo.

Polisi y’u Rwanda yatangaje ko umuhanzi Kizito Mihigo wari ufungiwe kuri sitasiyo ya Polisi ya Remera, mu gitondo cyo ku wa Mbere tariki 17 Gashyantare yasanzwe yiyahuye agapfa.

Mu itangazo Polisi yashyize ahagaragara, yagize iti “Mu rukerera rwo ku wa Mbere tariki 17 Gashyantare 2020, ahagana saa kumi n’imwe, Kizito Mihigo w’imyaka 38 wari ufungiwe kuri sitasiyo ya Polisi ya Remera yasanzwe yiyahuye arapfa.”

Yakomeje iti “Kizito Mihigo yari amaze iminsi itatu muri kasho ya polisi aho ubugenzacyaha bwamukurikiranagaho ibyaha birimo kwambuka umupaka mu buryo bunyuranyije n’amategeko na ruswa.”

Polisi ivuga ko ku itariki 15 na 16 Gashyantare, Kizito yari yasuwe n’abo mu muryango we ndetse n’umuhagarariye mu mategeko.

Tariki ya 13 Gashyantare 2020 nibwo Kizito yafashwe n’abaturage bo mu Murenge wa Ruheru, Akagari ka Remera, mu karere ka Nyaruguru agiye kwambuka umupaka ngo yerekeze i Burundi.

Kuri uyu wa Gatandatu nibwo uyu muhanzi yashyinguwe mu irimbi rya Rusororo.

Mu butumwa umubyeyi we yatanze, yavuze ko ashima Imana kuba yaramuhaye Kizito mu myaka 38 ishize, ariko na none ikaba yongeye kumwisubiza.

Yagize ati “Mbere na mbere ndashima Imana yari yaradutije Kizito Mihigo imyaka 38 ariko none ikaba inamwisubije, numva ari iby’agaciro, imwisubije tukimukunze kandi tumushaka n’ikimenyimenyi namwe muteraniye hano murabigaragaza. Ndongera gushima Imana kuba imwisubije, akaba ari nayo mpamvu namwe mbasaba ngo mumurekure kuko nanjye namurekuye, namuhaye Imana.”

Ati “Ndashima mwese muteraniye hano uko mungana, kuba muri hano ni uko mwankundiraga umwana, ndashaka kubabwira ko turi kumwe haba mu byiza no mu bibazo, gusa murabizi ko iyo uragiye Inka nyirayo iyo aje urayimusubiza ukamubwira uti yakire databuja, nanjye ndamumuhaye nk’uko yari yaramumpaye.”

Iribagiza kandi yabwiye abitabiriye gushyingura Kizito kujya basaba imbabazi no kuzitanga.

Padiri Mukuru wa Paruwasi ya Regina Pacis iherereye Remera, Ntagungira Bosco, wasomye Misa yo gusabira Kizito, yavuze ko icyo basaba Imana ari ukubabarira Kizito ku byo yaba yarakoze bitari byiza imbere y’abantu n’Imana ubwayo.

Yagize ati “Reka dusabe Imana ibabarire Kizito Mihigo niba hari aho yatambutse nabi imbere y’abantu n’imbere yayo ariko imwakire mu bwami bwayo budashira, kumva ko Kizito yiyambuye ubuzima byatumye ducika igikuba n’ururondogoro.”

Yavuze ko uyu ari umunsi wo guha umwanya Imana no gusenga, ndetse no kwihanganisha umuryango wa Kizito.

Ababanye na Kizito bamutangiye ubuhamya
Abakirisitu batandukanye bitabiriye uyu muhango
Abakirisitu benshi bitabiriye gusezera Kizito Mihigo
Abihayimana batandukanye baherekeje Kizito
Abapadiri batandukanye baherekeje Kizito banamusabira mu gitambo cya misa
Abasore bateruye isanduku irimo umubiri wa Kizito wapfuye yiyahuye
Gusezera Kizito byitabiriwe n'abantu benshi
Gusezera kuri Kizito byabereye muri Paruwasi ya Ndera
Ifoto ya Kizito Mihigo ubwo yasezerwaga muri Paruwasi ya Ndera
Padiri Mukuru wa Paruwasi Regina Pacis iherereye i Remera, Ntagungira Bosco asoma misa yo gusezera kuri Kizito
Paruwasi ya Ndera yari irimo abantu benshi cyane
Ubwo umubiri wa Kizito wagezwaga kuri Paruwasi ya Ndera
Umubiri wa Kizito uri muri Paruwasi ya Ndera
Nyina wa Kizito yavuze ko yamurekuye kugira ngo asange Imana
Abapadiri batandukanye basabira Kizito Mihigo
Imbaga y'abaherekeje Kizito Mihigo yari ikoraniye i Rusororo aho yashyinguwe
Isanduku irimo umubiri wa Kizito mbere yo kumushyingura
Isanduku irimo umubiri wa Kizito ishyirwa mu mva
Abantu batandukanye bashyira indabo ku mva ye
Umubyeyi wa Kizito ashyira indabo ku mva ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .