NASA yohereje abahanga bane mu isanzure, ifungurira amayira abashobora kwiyishyurira miliyoni 50$

Yanditswe na IGIHE
Kuya 16 Ugushyingo 2020 saa 10:06
Yasuwe :
0 0

Kuri iki Cyumweru nibwo ‘rockette’ ya SpaceX Falcon 9 yahagurukije ku Isi ikigendajuru Crew Dragon cyanahawe izina rya ‘Resilience’, gifata iy’ikirere gitwaye abahanga bane mu by’isanzure, mu rugendo ruzamara amezi atandatu ariko rusobanuye byinshi ku ngendo zijya muri iki gice tutabonesha amaso.

Iki kigendajuru cyahagurukiye muri Kennedy Space Center muri Leta ya Florida gitwaye Colonel Michael Hopkins w’imyaka 51, Victor Glover w’imyaka 44 na Shannon Walker w’imyaka 55 bo mu Kigo cy’Abanyamerika gishinzwe iby’isanzure, NASA, bari kumwe n’Umuyapani Soichi Noguchi w’imyaka 55 wo mu kigo cy’u Buyapani gishinzwe iby’isanzure, JAXA, bagize ubutumwa bwiswe Crew 1.

Ni abahanga berekeje mu gice kizwi nka International Space Station (ISS) kiberamo ubushakashatsi mu isanzure mu rugendo rw’amasaha 27.

Rwashoboraga kuba rugufi kurushaho iyo Crew Dragon yoherezwa ku wa Gatandatu nk’uko NASA yabiteganyaga mbere, kubera ko ISS yari kuba iteye mu buryo bashoboraga kugerayo mu masaha umunani, ariko byigizwa inyuma kubera umuyaga mwinshi n’imvura.

Mu buryo iki kigendajuru cyubatswe, gifite aho abantu bashobora kuruhukira ku buryo batora agatotsi, abahanga bo muri NASA na SpaceX bagakomeza gukurikiranira uru rugendo mu byicaro bya Houston muri Texas na Hawthorne muri California.

Walker na Noguchi bari muri Crew 1 ni inzobere mu bijyanye n’ubugenge, ku buryo bitezwe ko mu mezi atandatu bazamara muri ISS bazakora ubushakashatsi ku bintu bitandukanye, birimo ingaruka imiterere yo mu kirere ishobora kugira ku mikorere y’umutima w’umuntu.

Iyi gahunda isobanuye byinshi kuko ari ubwa mbere abahanga bagiye muri ISS batwawe na SpaceX bagiye mu mirimo nyir’izina mu rugendo rwo muri gahunda y’ubucuruzi, kuko urwo muri Gicurasi rwari mu gisa n’igerageza ry’uko ibintu bizaba biteye. Rwagiyemo abahanga Douglas Hurley na Robert Behnken bo muri NASA.

Leta Zunze Ubumwe za Amerika zari zimaze imyaka hafi icumi zidafite ubushobozi bwo kohereza abahanga mu isanzure, nyuma y’ihagarikwa ry’ikigendajuru cya Space Shuttle mu 2011, cyakoreshwaga kuva mi 1981.

NASA yisungaga ikigendajuru Soyuz cy’u Burusiya kugira ngo ibashe kugeza abahanga bayo muri ISS, mu rugendo ariko rwari rumaze guhenda cyane, ku buryo Amerika yishyuraga miliyoni $90 ku muntu umwe.

SpaceX yaje gukora ikigendajuru cyiswe Crew Dragon muri gahunda y’ubucuruzi ya NASA, ari nacyo cya mbere yari ikoze. NASA yahaye isoko SpaceX na Boeing amasezerano ya miliyari $2.6 na miliyari $4.2 nk’uko bikurikirana, kugira ngo uwo mushinga ushyirwe mu bikorwa.

Bitewe n’uko iki kigendajuru mu buryo bwihariye kizaba ari icya SpaceX na Boeing, NASA ikagikoresha ngo igeze abahanga bayo mu isanzure, biteganywa ko mu minsi iri imbere ibi bigo bizajya bicyifashisha mu kohereza ba mukerarugendo, abashakashatsi n’undi wese ubishaka, abanje kwishyura itike isaga miliyoni 50$, ni ukuvuga arenga miliyari 49 Frw.

Umuyobozi Ushinzwe Ibikorwa by’ubucuruzi bijyana n’isanzure muri NASA, Phil McAlister, yavuze ko ari inkuru nziza kuko barenze icyiciro cy’igerageza muri ubu butumwa.

Ati “Ku nshuro ya mbere mu mateka, hari ubushobozi bw’abikorera mu bijyanye n’ubucuruzi, bwo kujyana abantu mu isanzure kandi mu buryo butekanye.”

Ni ikigendajuru cyoherejwe mu gihe Umuyobozi Mukuru wa SpaceX, Elon Musk, kuri iki Cyumweru yatangarije kuri Twitter ko afite ibimenyetso bisa n’ibya COVID-19, ku buryo abaganga bamupimye iyo ndwara, bituma hafatwa ingamba zo kurinda ko hagira umuntu bahura muri uru rugendo.

Iki kigendajuru cyahagurutse ku Isi kuri iki Cyumweru muri Leta ya Florida (Ifoto: NASA/Joel Kowsky)
Bane bagiye mu isanzure barimo Michael S. Hopkins, Shannon Walker na Victor J. Glover bo muri NASA, na Soichi Noguchi wo mu kigo Jaxa (Ifoto: Cj Gunther/EPA)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .