00:00:00 IGIHE NETWORK KN KINYARWANDA EN ENGLISH FR FRANCAIS

Namubwiye inshuro nyinshi ko ari kwihunza inshingano - Perezida Kagame avuga ku birego bya Tshisekedi

Yanditswe na Philbert Girinema
Kuya 22 June 2022 saa 09:37
Yasuwe :

Perezida Paul Kagame yatangaje ko yabwiye inshuro nyinshi mugenzi we wa Repubulika Iharanira Demokarasi ya Congo, Félix Antoine Tshisekedi, ko kuvuga ko u Rwanda arirwo ruri guhungabanya umutekano w’igihugu cye ari ukwihunza inshingano ze nk’Umukuru w’Igihugu.

Perezida Kagame yabigarutseho mu kiganiro yatanze mu nama itegurwa na leta ya Qatar, yiga ku ishoramari.

Cyagarukaga ku bukungu bw’u Rwanda, aho yavuze ku ngingo zirimo amasezerano y’u Rwanda na Qatar mu bijyanye no gutwara abantu n’ibintu mu kirere, ikibazo cy’abimukira bo mu Bwongereza, ibibazo by’u Burusiya na Ukraine n’ibindi.

Perezida Kagame yavuze ko ikibazo kiri mu Burasirazuba bwa Congo gishingiye ku makimbirane amaze imyaka irenga 20, gihora kigaruka umunsi ku wundi ku buryo hari n’ibintu bigenda bivangwa.

Yatanze urugero rw’ikibazo cy’Abanye-Congo bafite inkomoko mu Rwanda, uko cyagiye gikemurwa muri RDC, avuga ko byari bikwiriye kwitabwaho mu buryo bwihariye niba iki gihugu cyarashakaga ko gikemuka burundu.

Ati “Iyo urebye uburenganzira bw’abantu, gukemura ikibazo cyabo ni ikintu cyoroshye. Ntabwo mbona impamvu RDC itabikoze. Hanyuma n’igihe umuryango mpuzamahanga wabyinjiragamo, byaje kurangira nawo ubaye ikibazo.”

Perezida Kagame yavuze ko muri RDC hari imitwe ifite inkomoko mu gihugu nubwo imwe ifite igisanira mu Rwanda. Hari kandi umutwe wa FDLR washinzwe n’abasize bakoze Jenoside mu Rwanda, ugihunganya umutekano.

Ati “Ubwo Loni yazaga ngo ikemure iki kibazo, byarangiye itabikoze, amafaranga menshi yayitakajweho, miliyari z’Amadolari, kandi n’ubu nta gisubizo kiraboneka. Ejo bundi muri iyi mirwano mishya, twaje kubona ko Ingabo za FARDC na Monusco n’uyu mutwe wa FDLR wakoze Jenoside hano mu Rwanda, bari gukorana.”

“Ni gute Ingabo za Loni zagakwiriye kujya kurwanya aba bantu, birangira bafatanya, barwanya uyu mutwe witwa M23 urwanira uburenganzira bw’aba Banye-Congo baharanira uburenganzira bw’inkomoko yabo, ukaba ikibazo aho kugira ngo ikibazo gikemurwe uko bikwiye?”

Aya magambo ya Perezida Kagame aje akurikira ibirego bitabarika bya Perezida wa RDC, Félix Antoine Tshisekedi, wavuze ko u Rwanda arirwo ruri inyuma y’ibikorwa bya M23 mu gihugu.

Yashinje u Rwanda gushaka kwigarurira ubutaka bwa RDC no gusahura umutungo kamere wiganjemo amabuye y’agaciro.

Perezida Kagame yavuze ko inshuro nyinshi yabwiye Perezida Tshisekedi ko adakwiriye gukomeza gushakira ikibazo aho kitari.

Ati “Naranabimubwiye mbere inshuro nyinshi, ko kuzamura ibyo birego ari ukwihunza inshingano ze nka Perezida wa kiriya gihugu, nk’umuyobozi wa kiriya gihugu.”

“Kuki adakemura ibibazo biri imbere muri Congo by’aba bantu n’uburyo yananiwe gukemura ikibazo cya FDLR iri muri Congo, yambuka umupaka igatera abantu bacu, hanyuma ejo bundi bwo byabaye bibi kurushaho ubwo habaga imirwano barwana hamwe n’Ingabo za Loni n’abo ba jenosideri, barwanya M23 hanyuma bikagera aho batangira kurasa ku butaka bw’u Rwanda, bica abantu, bakangiza n’ibintu.”

Yavuze ko hari ibiganiro byinshi byabaye hagati y’impande zombi n’ibindi bikiba magingo aya, ariko ko atumva uburyo Perezida Tshisekedi yahisemo indi nzira.

Ati “Perezida Tshisekedi yafashe indi nzira, sinzi impamvu n’icyo izatugezaho, ariko ibi twabiganiriyeho ku giti cye inshuro nyinshi.”

Perezida Kagame na Tshisekedi, ku wa Mbere w’iki cyumweru bahuriye muri Kenya mu nama ya gatatu y’abakuru b’ibihugu bigize Umuryango wa Afurika y’Iburasirazuba, bafata ingamba zirimo kohereza muri RDC ingabo z’uyu muryango kugira ngo zijye gukemura ikibazo cy’imitwe y’iterabwoba.

Umukuru w’Igihugu yavuze ko bikwiriye ko ikibazo gikemurwa mu mizi aho gukomeza guca ibintu hejuru cyangwa se kubivanga.

Perezida Paul Kagame ubwo yaganiraga na Tshisekedi mbere y'Inama y'Inteko rusange ya 74 y'Umuryango w'Abibumbye i New York, muri Nzeri 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .