00:00:00 IGIHE NETWORK KN KINYARWANDA EN ENGLISH FR FRANCAIS

N’Imana ntiduha byose- Hakuzimana Rashid yavuze ku buzima bw’abafungiye i Mageragere

Yanditswe na Ferdinand Maniraguha
Kuya 27 May 2022 saa 01:52
Yasuwe :

Hakuzimana Abdul Rashid ufungiye by’agateganyo muri Gereza ya Nyarugenge i Mageragere, yagize icyo avuga ku buzima bw’abayifungiyemo by’umwihariko abanyepolitiki.

Uyu mugabo w’imyaka 54, mwabipfa utamwise umunyepoliki, ni na cyo yabanje kwibutsa abanyamakuru ubwo yabaganirizaga kuri uyu wa Kane, nyuma y’umuhango wo gutanga impamyabushobozi z’abasoje icyiciro cya mbere cy’amasomo y’imyuga n’ubumenyingiro atangirwa muri gereza.

Ni umuhango Hakuzimana yakurikiranye yicaranye n’abandi barimo Nsabimana Callixte uzwi nka ‘Sankara’, umunyamakuru Nsengimana Théoneste n’abandi.

Hakuzimana Abdul Rashid yatawe muri yombi ku wa 28 Ukwakira 2021, akurikiranyweho ibyaha birimo icyo gupfobya no guhakana Jenoside yakorewe Abatutsi mu 1994 n’icyo gukurura amacakubiri muri rubanda.

Kuri uyu wa Kane nyuma yo kumva ubuhamya bw’abize imyuga n’andi masomo muri gereza, Hakuzimana ugifunzwe by’agateganyo, yavuze ko kwiga imyuga ari igitekrezo cyiza ndetse ngo na we ‘mu gihe gito’ asigaje agiye gushaka icyo yiga.

Ati “Harimo ubumenyi bwinshi, imyuga nayiga. Ndahamya ko ntazatinda, nkurikije ibyo nkurikiranyweho n’ubutabera nizeye ku gihugu cyacu ariko mu gihe gito njye numva nakwiga indimi kandi harimo abahanga bazo.”

Nta shyano ryaguye…

Hakuzimana Abdul Rashid si ubwa mbere afungiye muri gereza ya Nyarugenge nubwo iyo yafungiwemo ubushize ari izwi nka 1930 yimuriwe i Mageragere.

Yafunze guhera mu 2006 kugeza mu 2014 akurikiranyweho ibyaha byo guteza imvururu cyangwa imidugararo muri rubanda.

Akurikijwe ubuzima imfungwa n’abagororwa babagamo icyo gihe, agaragaza ko uburyo bafunzwemo kuri ubu byahindutse cyane.

Ati “Niba mu buroko bwa mbere naratanze 20%, ubu bigeze hejuru ya 50%, 60%, 70% gutyo [...] Icyo mbona ni uko muri RCS harimo ikintu cyo kugorora kuko niba abantu bafunzwe barakoze ibyaha bikabahama, bagahabwa amasomo yo kugira ngo bajye kubaho mu buzima busanzwe, ni intambwe.”

Yavuze ko ku giti cye kuva yagera muri gereza mu mezi arindwi ashize, nta muyobozi n’umwe baragirana ikibazo.

Ati “Nta gufungwa kwiza kubaho ariko nibura hariho guha umuntu agaciro birenze uko byari bimeze. Kugeza izi saha haba kuva ku mucungagereza kugeza ku muyobozi mukuru wa gereza nta kibazo dufitanye.”

Nubwo ubuzima ari bwiza, Hakuzimana yavuze ko gereza itandukanye no kubaho mu buzima busanzwe. Hari ibyo yifuza atabona ariko ngo nta gitangaza kirimo.

Ati “Ntabwo ibyiza byose ariko wabibona, n’ibyo dusaba Imana ntabwo ari ko byose ibiduha, ni ukuri kwambaye ubusa.”

Hashize iminsi hatangazwa amakuru avuga ko abanyapolitiki barimo na Hakuzimana badafashwe neza muri gereza ya Nyarugenge, icyakora nyir’ubwite yabiteye utwatsi, avuga ko nta cyahindutse mu mibereho y’imfungwa.

Hakuzimana yavuze ko ibiribwa bemerewe babihabwa kandi n’ukeneye gusurwa asurwa.

Ati “Ku byerekeye imirire, ibyo twandikiwe turabibona, tukagira n’amahirwe wenda y’uko iyo imiryango yacu cyangwa inshuti iyo batwoherereje amafaranga atugeraho tugahaha muri Cantine.”

Nubwo hari izindi mfungwa nka Rusesabagina n’abandi batabana, abo abasha kubona yavuze ko bameze neza. Abo barimo umunyamakuru Niyonsenga Dieudonné uzwi nka Cyuma Hassan.

Ati “Cyuma ndamubona nta kibazo afite. Iyo murebye gutya mba mbona nta kibazo afite, ni we wababwira niba nta kibazo afite muri we.”

Yakomeje agira ati “Abandi bo [Paul Rusesabagina] ntabwo tuba dufite uburyo twaganira, aba ari mu bye nanjye ndi mu byanjye. Idamange ni umudamu ntabwo twahura, Aimable Karasira, Cyuma ndamubona iyo murebye mbona nta kibazo afite. Njye ntegereje ubutabera gusa ariko nta shyano.”

Gereza ya Nyarugenge ifungiyemo abasaga ibihumbi 11.

Hakuzimana Abdul Rashid yavuze ko ubuzima babayeho muri gereza atari bubi
umunyamakuru Nsengimana Théoneste ni umwe mu bitabiriye umuhango wo gutanga impamyabushobozi ku basoje amasomo y'imyuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .