00:00:00 IGIHE NETWORK KN KINYARWANDA EN ENGLISH FR FRANCAIS

N’abataduha amahirwe batadukunda nabo barabyemera- Impanuro za Kagame muri Rwanda Day mu Bubiligi

Yanditswe na Cyprien Niyomwungeri
Kuya 10 June 2017 saa 09:06
Yasuwe :

Perezida Kagame yashimiye Abanyarwanda n’abafatanyabikorwa bakomeje gufasha u Rwanda kubaka amateka mashya yo kuza mu bihugu bya mbere ku Isi by’intangarugero mu bipimo by’iterambere, avuga ko n’abataruha amahirwe batanarukunda bamaze kwemera iyo ntambwe rukesha agaciro n’ubumwe by’abaturage barwo.

Yabigarutseho kuri uyu wa Gatandatu mu mpanuro yagejeje ku Banyarwanda bakoraniye muri Flanders Expo, bagizwe n’abaturutse mu Bubiligi, mu Bufaransa, mu Buholandi, mu Busuwisi, mu Butaliyani, mu Budage, mu bihugu byo mu majyaruguru y’u Burayi, mu Burusiya, abo mu Bwongereza, abaturutse mu Rwanda n’inshuti z’u Rwanda.

Umukuru w’Igihugu yashimangiye ko abanyarwanda baba mu gihugu n’abari ahandi aribo batumye u Rwanda ruba igihugu cy’agaciro, yaba mu karere no ku Isi yose.

Agendeye ku bipimo ngarukamwaka bigaragaza aho ibihugu bigeze, uko byiyubaka n’ababyo mu buryo butandukanye no mu bintu byinshi, Perezida Kagame yavuze ko aribwo bwa mbere mu mateka u Rwanda rwaba mu bihugu bya mbere 10 ku Isi yose.

Yagize ati “Uhereye ku ruhare abategarugori bagira mu gihugu, ari mu nteko, u Rwanda rukaba urwa mbere ku Isi yose no mu bindi bishyigikira iterambere ry’uburinganire, ku miyoborere, kurwanya ruswa, ku mutekano abaturage baba bafite mu bihugu byabo, ku mikorere y’ishoramari […] u Rwanda ruza mu bya mbere 10.”

Yakomeje agira ati “Ntabwo ari njye ubyandika ndetse n’abataduha amahirwe batadukunda nabo barabyemera. Ubwo bivuze ko ari ukuri […]. Ntawe byabura gushimisha, nta n’uwo byabura gutera imbaraga kugira ngo dukore n’ibindi ahubwo byinshi bikidutegereje tutarageraho ariko dufite aho duhera.”

Hari ibanga…

Perezida Kagame yahishuye ko ibanga ry’ibyo u Rwanda rumaze kugeraho byose bishingira ku gaciro n’ubumwe abanyarwanda bamaze kubaka.

Ati “Abanyarwanda uko buri umwe ateye kose bimaze kugaragara ko dushyigikiye ko turi umwe, ko turi u Rwanda, turi abanyarwanda, ibyo nibyo bimaze kutugeza kuri byinshi.”

Yongeyeho ko imbaraga abanyarwanda bakoresha ku giti cyabo, gukorera hamwe ndetse n’amasomo bigishijwe n’amateka yabo, bibatera imbaraga zo kwandika amateka mashya ashingiye ku bumwe, gukora, gukoresha ukuri no kumva ko batakwicara ngo hagire undi uza kubakemurira ibibazo.

Ati “Amateka yacu yatuviriyemo amasomo menshi, twize byinshi mu bitari byiza byatuviriyemo imbaraga zo kuvuga ko ibyo bibi byabaye mu mateka yacu bitazasubira, bidakwiriye gusubira.”

Ubukene ntibuzabaza Umuhutu cyangwa Umututsi

Perezida Kagame yasabye abanyarwanda kugira ubumwe no gukorera hamwe bakarandura burundu kwibona mu ndorerwamo z’amoko kuko ubukene cyangwa indwara bitabatera ngo bize birobanura abo mu bwoko runaka.

Yagize ati “Ubukene, indwara, umutekano muke iyo byateye mu gihugu ntabwo bibaza icyo umuntu ari cyo. Ntabwo ubukene mu Rwanda buza bukomanga bubaza niba uyu ari Umuhutu, Umututsi buhitana, bushyira hamwe bose bukazingazinga […] iyo abantu bari hamwe izo ndwara barazitsinda, ubukene, icyo umuntu ari cyo kikaba kuba Umunyarwanda.”

Yakomoje ku ruhare rwa Diaspora

Umukuru w’Igihugu yavuze ko ababa hanze bakwiye guhaha bakibuka kujya kuzamura ibihugu bakomokamo. Abamenyesha ko biba akarusho iyo bakoranye n’abo mu gihugu imbere bakuzuzanya, bakagura amaboko n’imipaka y’igihugu.

Yagize ati “Ababa hanze y’u Rwanda ntimukibwire ko hari ugira icyo abanenga, keretse uba hanze ukora nabi ariko ukora ibikubaka, ukora ibyubaka igihugu cyawe, ni byiza kandi ni uburenganzira bwawe numva nta wagira icyo abinengaho.”

Afurika imeze neza u Burayi bwarushaho kumera neza

Ku wa Gatatu w’iki cyumweru Perezida Kagame yagejeje ijambo ku bitabiriye inama y’u Burayi yiga ku iterambere, agaruka ku kibazo cy’abimukira barohama mu Nyanja bava muri Afurika bajya i Burayi.

Mu ijambo rye yongeye gukomoza kuri iyi ngingo avuga ko ibi bibazo byose biterwa n’uko Abanyafurika baba bakurikiye umutungo wabo batwawe n’ibihugu bikize.

Ati “Wamererwa neza utera imbere, ukira ariko bituruka mu gukenesha abandi? Ninayo mpamvu muri ibi bihe murabizi abanyafurika bagwa mu Nyanja bambuka bava muri Afurika baza mu Burayi […], bariya bantu bashirira mu mazi bakurikiye ibyabo aho byagiye.”

Yavuze ko uburyo bwiza bwo kubikemura ari ugukorana, abakize bagashora imari yabo muri Afurika ahari ubukungu bwinshi ariko abantu bagikennye kuko ‘igihe Afurika izaba imeze neza u Burayi buzarushaho kumera neza’.

Abana bato bishimiye guhura amaso ku maso na Perezida Kagame
Itorero Itetero ryatanze icyizere ku hazaza h'abakiri bato ku gusigasira umuco gakondo w'u Rwanda
Perezida Kagame yashimangiye ko u Rwanda ruri kwandika amateka mashya
Perezida Kagame yabwiye Abanyarwanda ko muri raporo zitandukanye zirimo iz’ijyanye n'uburinganire n’ishoramari u Rwanda rukomeje kuza mu bihugu bya mbere ku isi
Perezida Kagame yavuze ko u Rwanda rumaze kugira agaciro mu Karere no ku Isi hose
Umukuru w’Igihugu yavuze ko azashaka umwanya akabonana n’Abanyarwanda baba mu Busuwisi
Perezida Kagame yavuze ko Umunyarwanda wese yaba ahantu aho ariho hose hamubereye
Perezida Kagame n'abari bamuherekeje bishimiye uko bakiriwe
Abanyarwanda bakiriye Perezida Kagame mu majwi arenga bagira bati 'Muzehe Wacu, muzehe wacu!'
Abanyarwanda biganjemo abageze mu zabukuru basabye ubufasha bwo kubona inguzanyo mu mabanki nabo bagateza igihugu imbere
Abana bato bavukiye hanze bifurije Perezida Kagame ishya n'ihirwe mu Kinyarwanda gitomoye
Abanyarwanda n'inshuti zabo bari bishimiye bikomeye guhura n'umukuru w'igihugu
Rwanda Day yatangiye abayitabiriye bibwirana bitewe na Diaspora baje baturukamo
Byari ibyishimo ku bantu b'ingeri zose
Itorero Itetero ryasusurukije abitabiriye Rwanda Day mu Bubiligi mu mbyino za gakondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .