00:00:00 IGIHE NETWORK KN KINYARWANDA EN ENGLISH FR FRANCAIS

Myriam Ferran wo muri Komisiyo ya EU yashimye iterambere ry’ubuhinzi muri Rwamagana

Yanditswe na Ntabareshya Jean de Dieu
Kuya 19 May 2022 saa 03:12
Yasuwe :

Kuwa Gatatu tariki 18 Gicurasi 2022, Umuyobozi Wungirije wa Komisiyo y’Umuryango w’ubumwe bw’u Burayi, Myriam Ferran aherekejwe na Ambasaderi Nicola Bellomo, uhagarariye uyu muryango mu Rwanda ndetse n’itsinda ry’abakozi bawo basuye umwe mu mushinga w’imboga n’imbuto utera inkunga mu Karere ka Rwamagana.

Muri uru ruzindiko rwari rwitabiriwe n’ubuyobozi bw’Akarere ka Rwamagana ndetse n’abayobozi ba Tearfund n’ Umuryango Nyafurika w’Ivugabutumwa mu Rwanda (AEE Rwanda) bashyira mu bikorwa uyu mushinga, abahinzi bagaragaje ko kuva batangira guhingira mu matsinda no guhuza ubutaka byabyaye umusaruro kandi bihindura imibereho yabo mu bikorwa birebana n’iterambere rusange.

Ubuhinzi mu Rwanda ni kimwe mu bintu byubakiweho ubukungu cyane ko umubare munini w’Abanyarwanda ari bwo ushingiyeho mu gushaka imibereho. N’ubwo bimeze bityo ariko birasaba ko ababukora bahindura umuvuno ubuhinzi bugakorwa kinyamwuga.

Ubuhinzi bukozwe kinyamwuga bwagaragaje ko ari izingiro ry’ubukungu kuko no mu gihe Covid-19 yavuzaga ubuhuha bwo bwakomeje gukorwa nk’ibifatiye runini Abanyarwanda muri rusange.

Mu rwego rwo guteza imbere ubuhinzi no kongera umusaruro ubukomokaho, Guverinoma y’u Rwanda ikomeje gufungura amarembo itewe inkunga n’imiryango mpuzamahanga itandukanye, abafatanyabikorwa n’imiryango itari iya Leta.

Mu mwaka wa 2020 binyuze muri Minisiteri y’Imari n’igenamigambi mu Rwanda, Umuryango w’Ibihugu by’Ubumwe bw’Uburayi watanze inkunga mu mushinga w’imyaka 5 wo guteza imbere ubuhinzi bw’imbuto n’imboga ukorwa n’abahinzi bato n’inganda nto n’iziciritse mu Rwanda ugamije kongera inyungu ziva mu bikomoka ku buhinzi byoherezwa mu mahanga.

Uyu mushinga umaze imyaka ibiri ushyirwa mu bikorwa ukaba ukorera mu turere tune (Gasabo, Bugesera, Rwamagana na Kayonza).

Mu myaka ibiri gusa, Abanyarwanda basanzwe banakunda ubuhinzi bagaragaza ko hari impinduka zabayeho mu mibereho yabo biturutse ku masomo bakuye mu bikorwa binyuranye muri uyu mushinga ugamije guteza imbere ibihingwa bigera ku munani (urusenda, imiteja, ibitunguru, inanasi, amashu atukura, gaperi, tungurusumu na shufureli).

Kugeza ubu mu turere uyu mushinga ukoreramo ugamije guteza imbere ubuhinzi bw’imboga n’imbuto n’inganda nto ziciriritse mu Rwanda.

Uyu mushinga ufite intego nziza yo gufasha abahinzi kubona umusaruro mwinshi kandi mwiza uhuje n’ibishakwa ku isoko, kandi ubazanira amafaranga mu rugo ndetse bagatera imbere, ari nako igihugu gifite gahunda yo kongera ibigurishirizwa mu mahanga, nacyo kikagera ku ntego cyiyemeje ikiganisha ku iterambere.

Abaturage bo mu Karere ka Rwamagana, mu Murenge wa Mwurile mu gishanga cya Nyirabidibiri gihuriweho n’imirenge ya Mwulire, Nzige na Rubona baganiriye na IGIHE, bagaragaje akanyamuneza ko kuba bafite umushinga ubafasha guhinga bakiteza imbere nk’uko Ndacyayisenga Jean Paul yabigarutseho.

Ati “Mbere wasangaga duhinga mu buryo bw’akajagari ariko kugeza ubu twamaze kwigishwa inyungu yo guhuza ubutaka kandi tubona ko bitanga umusaruro. Wasangaga umuhinzi asarura akagurisha nk’ibihumbi 50 Frw ku mwaka ariko ubu ari kubona nibura ibihumbi 300 Frw bivuze ko hari impinduka zigaragara.”

Ndacyayisenga yagaragaje ko mu gihe gito cyane batangiye kurya ku rwunguko kuko umusaruro wavaga kuri hegitari imwe utageraga no ku bihumbi 500 Frw ariko kuri ubu usigaye urenga miliyoni 1.8 Frw.

Mukandayisenga Donatille yavuze ko nk’abagore nabo bamaze gusobanukirwa ko gukora ubuhinzi bw’imboga n’imbuto bishobora guteza imbere umuryango ku buryo batagitegereza akantu kose ku bagabo babo.

Yashimangiye ko hambere batari bazi akamaro ko guhinga imboga nk’urusenda ariko ko ubu babisobanukiwe cyane kubera inyungu babibonamo.

Mukandayisenga yasobanuye ko yatangiye ahinga mu murima akodesheje ariko ko kugeza ubu amaze kwigurira uwe ndetse yizeye ko binyuze muri koperative azagera kuri byinshi abikesha ubuhinzi bw’imboga.

Umuyobozi w’Akarere ka Rwamagana, Mbonyumuvunyi Radjab nawe wafatanije n’abahinzi kwakira abashyitsi baturutse mu Muryango w’Ibihugu by’Ubumwe bw’u Burayi yemeje ko hari intambwe imaze guterwa kuva uyu mushinga watangira gukorera muri aka karere.

Yavuze ko hari gahunda yo gufasha abahinzi b’imbuto n’imboga kurushaho kubona umusaruro mwiza kandi wujuje ubuziranenge binyuze mu kubashakira imbuto nziza, ifumbire ku gihe ndetse no kubashakira amasoko yagutse cyane ko aka karere gafite ubutaka bwiza kandi bwera.

Mu myaka ibiri gusa ubuso bumaze guhingwaho ibihingwa byatoranyijwe bugenda bwiyongera, kuko muri rusange mu turere uko ari tune nk’urusenda ruri kuri hegitari 189.70, imiteja igahingwa kuri hegitare 83.60, inanasi kuri hegitare 11.80 naho ibitunguru kuri ubu biri ku buso bwa hegitare 18.30.

Umuyobozi wungirije wa Komisiyo y’Umuryango w’Ubumwe bw’u Burayi ushinzwe ububanyi n’amahanga, Myriam Ferran yabwiye IGIHE ko ubuhinzi bw’imbuto n’imboga buri mu bugezweho muri iki gihe cyane ko n’isoko ry’ibibukomokaho riboneka.

Yakomeje agira ati “Mbere twabonye ababyeyi batari no gushobora kugira icyizere cyo kugira icyo bageraho. Ariko mu gihe cy’imyaka ibiri gusa batangiye kubona icyizere cy’ubuzima, baribonera ibyo bakeneye, barafasha n’abana bari mu mashuri, ibi ni ibishimangira impinduka nziza mu mibereho kandi ndabyishimiye cyane. Nizeye ko uyu mushinga ugiye gukomeza kandi uzakomeza no kwaguka”.

Ambasaderi w’Umuryango w’u Bumwe bw’u Burayi mu Rwanda, Nicola Bellomo yavuze ko hakiri imyaka itatu y’umushinga ndetse ko kuri gahunda yo kwagura hashobora kuzatekerezwa kwagurira no mu tundi turere ariko ashimangira ko ubuhinzi buri mu byo u Burayi buhanze amaso binyuze mu mishinga itandukanye buteramo inkunga.

Abahinzi kandi batangiye gukirigita ifaranga kuko kugeza ubu mu turere uyu mushinga ukoreramo uko ari tune umusaruro w’ibihingwa umaze gusarurwa no kugurishwa ari mwinshi.

Urusenda rungana n’ibilo 397,146 rwavuyemo angana na 213,171,357 Frw, Imiteja ibilo 1,481,085 byinjiza amafaranga 411,065,237 Frw, Inanasi zasaruwe ni ibiro 218,302 zibonekamo amafaranga amafaranga 29,621,135 Frw n’ibiro 234,207 by’ibitunguru bibonekamo amafaranga 86,859,050 Frw.

Ku ruhande rw’abashyira mu bikorwa uyu mushinga bahagarariwe n’Umuryango Tearfund, Umuyobozi wayo mu mu Karere ka EAC, Douwe Dijkstra yagaragaje ko yishimira ibimaze kugerwaho binyuze mu bufatanye na Guverinoma y’u Rwanda ndetse n’abahinzi.

Yavuze ko hari byinshi bihanzwe amaso mu myaka itatu isigaye birimo kwibanda ku kubona amasoko, kongera umusaruro ndetse no kugabanya imyaka yangirika cyane ko bubakiwe n’ibyumba bikonjesha ku buryo bishyirwamo izo mboga bikazibika neza mu gihe umuguzi yitegura kubijyana ku isoko yateganije.

Uwiringiye Simeon ushinzwe guhuza ibikorwa by’uyu mushinga muri AEE Rwanda yavuze ko nk’umuntu ubana n’abahinzi, imbogamizi bahura nazo buri munsi ari amasoko y’umusaruro adahagaze neza uko byifuzwa, cyane cyane ayo mu mahanga, ihindagurika ry’ikirere, izamuka rikabije ry’ibikomoka kuri peterori bituma kuhiza imashini bihenda cyane ndetse no gutwara umusaruro bikazamuka mu biciro.

Uru ruzinduko rwishimiwe cyane n’abahinzi ndetse n’inzego zitandukanye za Leta n’abafatanyabikorwa bayo, bose bongera gushimira byimazeyo Umuryango w’Ibihugu by’Ubumwe bw’u Burayi ku nkunga udahwema gutera u Rwanda mu rugendo rw’iterambere rurimo.

Nicola Bellomo yagaragaje ko intambwe imaze guterwa ishimishije
Buri Karere muri tune umushinga ukoreramo kubakiwe icyumba gikonjesha
Basuye urusenda rukiri mu murima bagaragarizwa uko rutanga icyizere
Bagaragarijwe ibimaze gukorwa mu buhinzi
Aba bayobozi basuye icyumba gikonjesha basobanurirwa uruhare rwacyo mu kubungabunga umusaruro
Abahinzi bagaragaza akanyamuneza baterwa no kubona umusaruro
Umuyobozi wungirije wa Komisiyo y’Umuryango w’Ubumwe bw’u Burayi ushinzwe ububanye n’amahanga, Myriam Ferran aganira n'abahinzi
Ndacyayisenga uhagarariye aba bahinzi yagaragaje ko hari inyungu bagenda babona mu gihe gito umushinga umaze
Mukandayisenga yagaragaje ko abagore nabo biteje imbere babikesha ubuhinzi
Buri Karere muri tune umushinga ukoreramo kubakiwe icyumba gikonjesha
Meya w'Akarere ka Rwamagana, Mbonyumuvunyi Radjab yashimangiye ko bafite gahunda yo guteza imbere ubuhinzi
Hafashwe ifoto y'urwibutso hamwe n'abahinzi
Abahinzi basabwe gukomeza gufata neza ibikorwa remezo birimo n'icyumba gikonjesha bubakiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .