00:00:00 IGIHE NETWORK KN KINYARWANDA EN ENGLISH FR FRANCAIS

Batandatu bahize abandi muri ‘Capital Market University Challenge’ bahawe ibihembo

Yanditswe na Iradukunda Serge
Kuya 27 May 2022 saa 04:04
Yasuwe :

Ikigo kigenzura Isoko ry’Imari n’Imigabane mu Rwanda (CMA) cyahembye abanyeshuri batandatu bahize abandi muri ‘Capital Market University Challenge’, amarushanwa ahuza abanyeshuri bo muri za kaminuza n’amashuri makuru yo mu Rwanda.

‘Capital Market University Challenge’ ni irushanwa rigamije gushishikariza abanyeshuri bo muri kaminuza zitandukanye zo mu Rwanda kwitabira ibikorwa by’Isoko ry’Imari n’Imigabane ry’u Rwanda.

Rigamije kandi kubongerera ubumenyi ku byiza byo kuzigama no gushora imari ku banyeshuri biga muri kaminuza.

Umuhango wo gutanga ibi bihembo ku banyeshuri bahize abandi muri iri rushanwa ryo ku nshuro ya 9 wabereye muri Kigali Convention Centre kuri uyu wa Gatanu tariki 27 Gicurasi 2022.

Aya marushanwa yatangijwe ku mugaragaro ku wa 17 Werurwe 2022, mu muhango wabereye muri Kaminuza yigenga ya Kigali, ULK yari agizwe n’icyiciro cyo kwandika (essay) ndetse n’icyo kubazwa umunyeshuri agasubiza (quiz).

Mu cyiciro cyo kubaza umunyeshuri agasubiza, umwanya wa gatatu wegukanywe na EgideTumukunde wari uhagarariye Intara y’Uburengerazuba. Yaturutse mu Ishuri rya IPRC Karongi.

Umwanya wa kabiri muri iki cyiciro wegukanywe na Iverson Mico Nsabagasani wo muri Kaminuza ya UNILAK.

Faustin Habimana wiga muri Kaminuza y’u Rwanda Ishami ry’Uburezi ni we wegukanye umwanya wa mbere mu cyiciro cy’aho umunyeshuri yabazwaga ibibazo bitandukanye hagatsinda uwasubije neza.

Mu cyiciro cyo kwandika, umwanya wa gatatu wegukanywe na Daniel Mwenedata wiga muri Kaminuza y’u Rwanda ishami ryigisha ibijyanye n’Imari n’Ubukungu.

Umwanya wa kabiri wegukanywe na Samuel Tuyisenge wiga mu Ishuri ry’Amategeko riherereye mu Karere ka Nyanza, ILPD.

Umwanya wa mbere muri iki cyiciro watwawe na Pascal Niyomuremyi wari uhagarariye Davis college and Akilah.

Abatsinze mu byiciro byose bahawe igihembo cy’amafaranga ariko bashobora gukoresha gusa mu bikorwa byo kugura imigabane n’impapuro mpeshamwenda mu bigo bitandukanye.

Aba mbere mu byiciro byombi bagenewe igihembo cy’ibihumbi 400Frw, aba kabiri bahabwa ibihumbi 300Frw mu gihe aba gatatu bahawe ibihumbi 200Frw.

Igikorwa cyo gutoranya abatsinze muri iri rushanwa cyakozwe n’akanama nkemurampaka kari kagizwe na Marcella Nikuze usanzwe ari umukozi w’Umuryango Plan International, Kajungu Frank, inzobere mu bikorwa by’ubugenzuzi bw’imari na Umugwaneza Olivier.
Mwige kwizigamira

Abanyeshuri bitabiriye aya marushanwa ndetse bagatsindira kugera mu cyiciro cya nyuma bagize umwanya wo kuganirizwa n’abakora mu rwego rw’imari batandukanye, bose bibanze ku kuba inama zizabafasha kwiteza imbere.

Umukozi mu ihuriro ry’Ibihugu n’ibigo rigamije kwimakaza ikoreshwa ry’ikoranabuhanga mu rwego rw’imari rizwi nka ‘Better Than Cash Alliance ‘, Lucy Nshuti Mbabazi yasabye uru rubyiruko gushyira imbere ibikorwa bigamije kwizigamira.

Yabibukije ko bakwiye kugerageza gufata amwe mu mafaranga bakoresha mu bikorwa byo kwishimisha bakayazigama binyuze mu kuyashora mu bikorwa bitandukanye birimo nko kugura ibibanza, inzu cyangwa ibindi bikorwa by’ubucuruzi.

Yababwiye kutishimira kumva ko nibarangiza kwiga bazahabwa akazi ahubwo bagaharanira kwihangira umurimo ariko abibutsa ko bazabasha kubigeramo mu gihe bazaba barizigamiye.

Nshuti Mbabazi yakomeje abwira uru rubyiruko ko ruzagera kuri byinshi mu by’imari ni ruhitamo gutahiriza umugozi umwe.

Ati “Niba mushaka kugera kure, muzagendane. Nabashije kumenya neza igisobanuro cy’ayo magambo binyuze mu buryo bwo kwizigamira buzwi nk’ibimina, abakoresha iyo gahunda bishatse icyo gisubizo bidaturutse ku ma banki ahubwo bivuye mu gukorera hamwe.”

Umuyobozi Wungirije w’Inama y’Ubutegetsi ya ‘Capital Market’, Eric Rwigamba yavuze ko atewe ishema no kuba urubyiruko rw’uyu munsi rugira amahirwe yo kwigishwa inyungu rushobora kubona ku Isoko ry’Imari n’Imigabane mu Rwanda.

Ati “Ndashimye cyane ku bw’aya mahirwe urubyiruko rufite yo kuba rwigishwa ibintu bitandukanye ‘Capital Market’ yabagezaho ndetse bakerekwa ko bashobora guhanga imirimo myinshi kuri iri soko.”

Ni ibintu Rwigamba yahuriye n’Umuyobozi Nshingwabikorwa wa Capital Market, Eric Bundugu wavuze ko kugira urubyiruko rufashwa gutegura ahazaza harwo rukwiye kwigishwa ishoramari n’uburyo bwo kwizigamira binyuze mu kugura imigabane, impapuro mpeshamwenda ndetse n’ubundi bugezweho.

Abitabiriye aya marushanwa ya ‘Capital Market University Challenge’ mu bihe bitandukanye bagaragaza ko yabafashije gusobanukirwa ibijyanye n’imikorere y’Isoko ry’Imari n’Imigabane.

Sandra Nadege Uwayezu wiga muri Keplar akaba n’umwe mu bari bitabiriye irushanwa ry’uyu mwaka ndetse agatsinda mu cyiciro cy’Umujyi wa Kigali yavuze ko ryamwigishije kwizigamira.

Ati “Ntewe ishema no kuba CMA yaradushyize muri aya marushanwa yo kumenya imikorere y’urwego rw’imari. Binyuze muri iri rushanwa nari mfite gahunda yo gushora imari no kwizigamira, ubu twatangiye uru rugendo hamwe na bagenzi banjye. Ndashima CMA kuba yaraduhaye umwanya nk’abanyeshuri ba kaminuza nemera ko ari twe Rwanda rw’ejo.”

Ni ku nshuro ya cyenda iri rushanwa rya ‘Capital Market University Challenge’ riba. Rimaze kwitabirwa n’abanyeshuri barenga ibihumbi 10 kuva ryatangira.

Abatsinze mu byiciro byabanze nibo bahatanye mu cyiciro cya nyuma
Abatsinze batoranyijwe n'akanama nkemurampaka
Abitabiriye aya marushanwa bavuze ko yabafashije kumenya byinshi ku Isoko ry'Imari n'Imigabane
Uyu muhango witabiriwe n'abanyeshuri bo muri kaminuza zitandukanye zo mu Rwanda
Marcella Nikuze wari mu bagize akanama nkemurampaka aganira na mugenzi we
Umuyobozi Nshingwabikorwa wa Capital Market, Eric Bundugu yavuze ko kugira urubyiruko rufashwa gutegura ahazaza harwo rukwiye kwigishwa ishoramari n’uburyo bwo kwizigamira
Lucy Nshuti Mbabazi yasabye uru rubyiruko gushyira imbere ibikorwa bigamije kwizigamira.
Umuyobozi Wungirije w’Inama y’Ubutegetsi ya ‘Capital Market’, Eric Rwigamba yavuze ko atewe ishema no kuba urubyiruko rw’uyu munsi rugira amahirwe yo kwigishwa inyungu rushobora kubona ku Isoko ry’Imari n’Imigabane mu Rwanda
Muri buri cyiciro hahembwe batatu bahize abandi
Hahembwe abahize abandi mu cyiciro cyo kwandika no gusubiza ibibazo bitandukanye byari byateguwe
Abitabiriye ‘Capital Market University Challenge’ basabwe kugira umuco wo kwizigamira
Lucy Nshuti Mbabazi ashyikiriza igihembo umwe mu batsinze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .