00:00:00 IGIHE NETWORK KN KINYARWANDA EN ENGLISH FR FRANCAIS

Mwahisemo neza! Impanuro za Minisitiri Mukeshimana ku basaga 300 basoje amasomo ku buhinzi n’ubworozi

Yanditswe na Igizeneza Jean Désiré
Kuya 18 Ugushyingo 2022 saa 06:15
Yasuwe :

Urubyiruko rwasoje amasomo atangwa n’Ikigo giteza imbere ubuhinzi n’ubworozi, Kilimo Trust, rwasabwe kuba abakozi beza mu bigo byababonyemo ubushobozi bikabaha akazi, abahisemo kwihangira imirimo basabwa gufatanyiriza hamwe mu guteza imbere uyu mwuga.

Bikubiye mu butumwa bwatanzwe kuri uyu wa Kane tariki ya 17 Ugushyingo 2022 mu muhango wo guha impamyabushobozi urubyiruko rw’abanyeshuri 323 basoje amasomo y’igihe gito ajyanye no guteza imbere ubuhinzi n’ubworozi no kongerera agaciro ibibukomokaho.

Ni umwuga basaba ko ukwiye kuva ku isura y’uko ar’umurimo w’abakene n’abakuze ahubwo ukaba umwuga ubyara amafaranga ku buryo bweruye bikozwe n’urubyiruko.

Ni mu gihe abatarabona akazi, bagaragaje ko impamyabushobozi bahawe zigiye kubafungurira imiryango y’amahirwe menshi.

Aya masomo yatangiwe impamuabushobozi atangwa n’umushinga Kilimo Trust Rwanda wo gushyigikira urubyiruko rwo mu cyaro (R-YES) binyuze mu mashuri makuru y’imyuga (IPRC), amashuriy’imyuga n’ubumenyingiro (TVET), inganda, ibigo by’abashoramari mu bikomoka ku buhinzi n’ubworozi; Ihuriro ry’Urubyiruko rukora Ubuhinzi n’ubworozi (RYAF) n’Ikigo cy’igihugu gishinzwe guteza imbere ubuhinzi n’ubworozi (RAB).

Umushinga R-YES ukunzwe kwitwa Menya Wigire uterwa inkunga n’Ikigega Mpuzamahanga Giteza Imbere Ubuhinzi (IFAD) ndetse na Minisiteri y’Ubukungu n’Iterambere y’u Budage (BMZ), watangiye muri Nyakanga 2020 ukazamara imyaka ine.

Abemerewe guhabwa aya masomo ni abatari munsi y’imyaka 18 batanarengeje 30, bakaba barize byibuze kugera mu mwaka wa gatatu w’icyiciro rusange.

Amasomo 10 yizwe arimo gutunganya amata no kuyongerera agaciro; Gukora ibikomoka ku nyama; guhinga no kubika ubwatsi bw’amatungo; guhinga imboga no kuzongerera agaciro; gukora ibiryo b’amatungo atandukanye no gukoresha imashini zo mu nganda zitunganya ibikomoka ku buhinzi n’ubworozi.

Harimo kandi gukora no gukoresha imashini zikonjesha no gukoresha imashini zihinga; ubworozi bw’inkoko z’amaji n’iz’inyama no kuhira imyaka.

Minisitiri w’Ubuhinzi n’Ubworozi, Dr Mukeshimana Gérardine, yasabye abanyeshuri bahawe izi mpamyabushobozi kwishyira hamwe kugira ngo bagire ubuvugizi bufite imbaraga kugira ngo ubumenyi butandukanye bahawe bugirire umwuga w’ubuhinzi n’ubworozi akamaro.

Kugeza ubu muri aba banyeshuri bahawe impamushobozi, 85 muri bo bamaze kubona akazi mu nganda zitandukanye ndetse na 55 bamaze gutangiza mishinga yabo.

Dr Mukeshimana avuga ko biteguye gutera ingabo mu bitugu abatarabona imirimo.

Ati "Minisiteri irashaka gutangiza ikigega ’Youth Challenge’ aho uzana 50% by’ibizagenda ku mushinga wose noneho natwe tukaguha 50% tukayaguha ku buntu." Yashimiye abahisemo gurikira amasomo ku bikomoka ku buhinzi n’ubworozi kuko harimo amahirwe menshi.”

Umuyobozi wa Kilimo Trust Rwanda, Andrew Gashayija yavuze ko mu gutoranya ibyo abanyeshuri biga hakozwe inyigo yagaragaje ahari amahirwe kurusha ahandi mu buhinzi n’ubworozi no gutunganya ibibukomokaho.

Yakomeje avuga ko R-YES yatangiye mu gihe cya Covid-19, ibitari byoroshye kuko ibigo by’amashuri byari bifunze.

Yakomeje ati “Ariko ubu turishimira ko icyiciro cya mbere gisoje amasomo, umwaka utaha hazaza ikindi kugera mu 2024, cyane ko duteganya urubyiruko 3,000."

Aya masomo yatangiwe mu mashuri arimo IPRC Musanze, IPRC Gishari, IPRC Kigali, Ishuri ry’ubumenyingiro rya Kabutare, irya Kavumu, College Fondation Sina Gerard, inganda n’ibigo 28 by’ibikomoka ku buhinzi n’ubworozi, na sitasiyo za RAB.

Umuyobozi w’Ishuri rikuru ry’Imyuga n’Ubumenyingiro, Dr Sylvie Mucyo, yavuze ko integanyanyigisho zateguwe ku bufatanye na Kilimo Trust Rwanda zishyirwamo amasomo yubaka ubushobozi kandi bikorwa kuburyo umunyeshuri abikora abyishimiye kandi akavanamo ubumenyi bumufasha kuba umukozi cyangwa rwiyemezamirimo mwiza.

Akomeza avuga ko banabigisha amasomo abahugura ku bijyanye n’uko bakwihangira imirimo (entrepreneurship), yose agakorwa ku bwiganze bw’imikorongiro cyane ko "iyo umuntu abikoze akabona bigenze neza ashobora no kubyikorera mu gihe yaba abonye igishoro."

Umwihariko ku bafite ubumuga

Aya masomo kandi yahawe n’abafite ubumuga bwo kutumva no kutavuga binyuze mu Kigo gikora ibikomoka ku mata cya Masaka Creamery, aho ubuyobozi bwacyo bwafatanije na Kilimo Trust na IPRC Musanze bagaha urwo rubyiruko amahirwe yo kwiga gukora ibikomoka ku mata bikaba byarabahesheje akazi mur’urwo ruganda.

Niyomwungeri Jean De Dieu ni umwe mu bafite ubumuga 25 basoje amasomo muri iki cyiciro cya mbere cy’Umushinga R-YES, mu bijyanye no gutunganya amata.

Asemuriwe na Keneth Muhozi, Niyomwungeri yavuze ko ubumenyi yavanye muri aya mahugurwa bwamuhesheje amahirwe y’akazi kandi buzamufasha kunoza akazi ke neza ndetse bigenze neza akabona igishoro nawe akabasha kuba yatangira ubushabitsi bwe.

Yasabye abafata abafite ubumuga nk’abadashoboye, guhindura imyumvire kuko kugira ubumuga bitavuze kuba utagira icyo ukora kikwinjiriza, asaba abafite ubumuga bagenzi be gutinyuka "abashoboye kwiga bakagana ishuri kuko iyo bigeze ku kazi twese dukora kimwe n’abandi."

Uyu muhango witabiriwe na Minisitiri w'Ubuhinzi n'Ubworozi, Dr Gerardine Mukeshimana
Dr Mukeshimana Gérardine yasabye abanyeshuri bahawe izi mpamyabushobozi kwishyira hamwe kugira ngo bagire ubuvugizi bufite imbaraga
Minisitiri w’Ubuhinzi n’Ubworozi, Dr Mukeshimana Gérardine, yasabye abanyeshuri bahawe izi mpamyabushobozi kwishyira hamwe kugira ngo bagire ubuvugizi bufite imbaraga
Hafashwe ifoto y'urwibutso nyuma y'iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .