Mutinyuke mwange ikibi n’iyo cyaba kivugwa n’umuntu mukuru-Madamu Jeannette Kagame abwira urubyiruko

Yanditswe na Uwimana Abraham
Kuya 31 Ukwakira 2020 saa 05:01
Yasuwe :
0 0

Madamu Jeannette Kagame yasabye urubyiruko kwanga ikibi aho cyaba kiri hose kabone n’iyo cyavugwa n’umuntu mukuru cyangwa bafitanye isano.

Yabitangaje kuri uyu wa Gatandatu tariki 31 Ukwakira mu Ihuriro Ngarukamwaka rya 13 rya Unity Club Intwararumuri. Ni ihuriro ryabereye mu Nteko Ishinga Amategeko y’u Rwanda ku Kimihurura ariko ryakurikiranywe mu buryo bw’ikoranabuhanga n’abantu batandukanye bari mu bice bitandukanye by’igihugu no mu bihugu by’amahanga.

Mu Rwanda, ibiganiro byakurikiranywe ku rwego rw’intara kuri site enye zirimo iya Rwamagana, Huye, Musanze na Karongi mu gihe mu mahanga ari kuri site umunani zirimo mu Bushinwa, muri Koreya y’Epfo, mu Buhinde, mu Bubiligi, mu Bufaransa, mu Misiri, Zambia na Ethiopia.

Kuri iyi nshuro iri huriro ryari rifite insanganyamatsiko igira iti “Ndi Umunyarwanda, igitekerezo-ngenga cy’ukubaho kwacu”.

Mu ijambo ritangiza iri huriro, Madamu Jeannette Kagame yavuze ko amateka mabi yaranze u Rwanda atari wo murage abakuru bifuza kuraga urubyiruko, ahubwo ko kubigisha kwiyumvamo ubunyarwanda mbere na mbere ariyo nkingi y’u Rwanda rw’ejo ruzira amacakubiri.

Madamu Jeannette Kagame watanze impanuro mu buryo bw’ikoranabuhanga, yasabye urubyiruko guhaguruka igihe rubonye ikibi rukacyamagana, aho cyaba gituruka hose.

Yabishingiye ku bushakashatsi bwakozwe na Komisiyo y’Igihugu y’Ubumwe n’Ubwiyunge, bwagaragaje ko umuryango ufite uruhare mu gukwirakwiza ibitekerezo byigisha amacakubiri abana, ndetse bwanagaragaje ko urubyiruko rufite ubumenyi buke ku mateka y’u Rwanda.

Yagize ati “Nimutinyuke mwange ikibi, kabone n’ubwo cyaba kivugwa n’umuntu mukuru cyangwa mufitanye isano, mukomere ku bumwe, muzirikane u Rwanda igihe cyose, musesengure ibibazo twagize kandi tubitezeho kuzaba umuti w’igisubizo kirambye cyabyo.”

Madamu Jeannette Kagame yasabye urubyiruko kwanga ikibi aho cyava kikagera

Madamu Jeannette Kagame kandi yagarutse ku bayobozi n’ababyeyi, ababwira ko kuba Intwararumuri no kuba umuyobozi bisaba iteka guhora umuntu yikebuka kugira ngo arebe ko akimurikiye abo ayoboye cyangwa abana bamureberaho.

Ati “Ndagira ngo natwe twikebuke dufate umwanya wo kwisuzuma. Ese umuryamgo wacu waba koko ari igicumbi cya Ndi Umunyarwanda? Ese tuganiriza abana bacu dute tubabwira ubunyarwanda nk’isano yacu, tubakundisha gute igihugu cyacu kugira ngo kize ku mwanya wa mbere mu mitekerereze n’imigirire yabo?”

Yakomeje agira ati “Ubunyarwanda twifuza gusigasira, bukwiye gutorezwa mu muryango. Ndi Umunyarwanda ikwiye kudufasha gusana umuryango, kugira ngo wongere ube koko isoko y’amahoro n’iterambere birambye.”

Yagaragaje ko ubumwe yo nkingi ya Ndi Umunyarwanda ari bwo bwafashije igihugu kongera kubaho nyuma ya Jenoside yakorewe Abatutsi.

Ati “Twahisemo kuba umwe, twemera kunywa umuti usharira. Uwo muti kandi, wadufashije gutwara urumuri rwa Ndi Umunyarwanda nk’igitekerezo-ngenga cy’ukubaho kwacu, ariko urugendo ruracyakomeje.”

Madamu Jeannette Kagame yagaragaje ko imbogamizi inzira ya Ndi Umunyarwanda igifite ari abakomeje guhembera ingengabitekerezo ya Jenoside mu bakiri bato, asobanura ko ari inshingano z’abagize Unity Club Intwararumuri kubirwanya.

Ati “Ibi biraduha umukoro wo gushaka uko twakomeza, gufasha abato batagize uruhare muri ayo mateka, ariko bakigowe no kumva ko isano-muzi yacu ari Ubunyarwanda. Kandi tuzakomeza kubukomeraho, tubirage n’abadukomokaho, na bo, bibe bityo.”

Abandi batanze ibiganiro muri iri huriro, bagarutse cyane ku isano ihuza Abanyarwanda ya “Ndi Umunyarwanda” n’uburyo ikwiriye kurushaho gushinga imizi mu nzego zitandukanye.

Perezida wa Komisiyo y’Igihugu y’Ubumwe n’Ubwiyunge, Bishop John Rucyahana yagize ati “Gahunda ya Ndi Umunyarwanda ni umwanya wo kwibutsa Umunyarwanda uruhare ashinzwe mu gushimangira no gusigasira ibimaze kugerwaho no kwiteza imbere nk’Abanyarwanda barebera hamwe ahari inzitizi bakabishakira umuti.”

Senateri Havugimana Emmanuel, mu kiganiro yatanze yagarutse ku mateka yaranze igihugu n’uburyo amacakubiri yagiye akongezwa akaza kugeza kuri Jenoside yakorewe Abatutsi. Yikije cyane ku kuvuga ko “Ndi Umunyarwanda” ari cyo gisubizo kizima gikwiriye, bityo ko ikwiye gushinga imizi.

Ati “Ndi Umunyarwanda ni wo muti, nicyo gisubizo, nicyo kizatuma iki gihugu kivayo, inzozi zanjye mfite ni uko abana bacu, abadukomokaho, bazakurira mu gihugu gitandukanye n’icyo twakuriyemo twebwe, mu bibazo bikomeye cyane, kugira ngo ejo hazaza h’u Rwanda hazabe ari igihugu abantu bose bumva ko ari bamwe.”

N’ubwo hari intambwe ikomeye yatewe ndetse inakomeje guterwa mu kwimakaza Ubunyarwanda, hagaragajwe ko hakiri imbogamizi z’ababyeyi bamwe bacengeza amacakubiri mu bana babo, ibyiswe kubigishiriza ku ishyiga.

Minisitiri w’Uburinganire n’Iterambere ry’Umuryango, Dr Bayisenge Jeannette, yavuze ko ari ngombwa ko abana bakibyiruka bitabwaho cyane bagahabwa uburere bukwiriye.

Ati “Ya ngengabitekerezo batorezwaga ku ishyiga tukayisimbuza indangagaciro, maze umuryango ukaba umusemburo wa Ndi Umunyarwanda bihereye iwacu. Ndongera kwibutsa kandi isano riri hagati y’umuryango n’igihugu, kuko umuryango n’igihugu ari indatana, n’ugize ibyago akabura abo babyeyi igihugu kiramurera kimubera umubyeyi.”

Umwe mu rubyiruko rwari rwitabiriye iri huriro wanatanze ikiganiro, Kurumvune Patrick, yatanze ubuhamya bw’uburyo Ndi Umunyarwanda yamufashije kuva mu ipfunwe yaterwaga no kuba se umubyara yari afungiwe ubusahuzi yakoze muri Jenoside yakorewe Abatutsi.

Yagize ati “Kubera amateka mabi data yaciyemo, byanteraga ipfunwe aho ngeze mu bandi, baganira ibiteza imbere igihugu, nkibaza icyo nanjye navuga nkakibura. Igihe cyarageze ndavuga kandi ikosa rya data yararihaniwe, singomba guherenwa n’amateka.”

Yongeyeho ati “Nyuma y’ibyo byose naciyemo, nafashe icyemezo cyo gufata umurongo mwiza, ntozwa indagagaciro na kirazira. Ubu ndi umwe mu rubyiruko ruharanira gukomeza kubaka u Rwanda.”

Umuyobozi Mukuru Wungirije wa Unity Club Intwararumuri, Dr Nsanzabaganwa Monique, yavuze ko Ndi Umunyarwanda ikwiye kurushaho kwimakazwa aho ari ho hose, kuko ari igihango gikomeye.

Ati “Ndi Umunyarwanda iduherekeze aho turi hose, itwinjize mu ikoranabuhanga no ku mbuga nkoranyambaga; kuko uwambaye Ubunyarwanda agendana ubudahangarwa mu ngamba z’ubumenyi n’ubukungu, akamenya kurinda iby’u Rwanda, ibya none n’ejo hazaza.”

Yongeyeho ati “Tuzagaruka kenshi ku nsanganyamatsiko zishimangira Ndi Umunyarwanda, tuzirikana za nkingi eshatu yubakiyeho, ari zo kwiyumvamo Ubunyarwanda, komora ibikomere by’amateka no kwimakaza indangagaciro na kirazira z’umuco nyarwanda.”

Dr Nsanzabaganwa kandi yashimangiye ko urubyiruko rutanga icyizere muri gahunda ya Ndi Umunyarwanda, aho yagiye agaruka ku ngero za bamwe bagiye bavuga amagambo atanga icyizere kandi bikajyana n’ibikorwa.

Ihuriro Ngarukamwaka rya 13 rya Unity Club Intwararumuri, rifite insanganyamatsiko igira iti “Ndi Umunyarwanda, igitekerezo-ngenga cy’ukubaho kwacu”, ryitabiriwe n’abayobozi bakuru mu nzego nkuru z’Igihugu, abanyamadini, sosiyete sivile, abikorera ndetse n’urubyiruko.

Ijambo Madamu Jeannette Kagame yagejeje ku bari bitabiriye iri huriro

Madamu Jeannette Kagame yagaragaje ko ubumwe yo nkingi ya Ndi Umunyarwanda ari bwo bwafashije igihugu kongera kubaho nyuma ya Jenoside yakorewe Abatutsi
Perezida wa Komisiyo y'Igihugu y'Ubumwe n'Ubwiyunge, Musenyeri John Rucyahana, atanga ikiganiro
Senateri Dr Havugimana Emmanuel atanga ikiganiro, yagarutse ku mateka yaranze igihugu n’uburyo amacakubiri yagiye akongezwa akaza kugeza kuri Jenoside yakorewe Abatutsi
Umunyamakuru wa RBA, Basile Uwimana, niwe wari uyoboye ikiganiro
Minisitiri w'Uburinganire n'Iterambere ry'Umuryango, Jeannette Bayisenge, ari mu batanze ikiganiro cyiswe "Ndi Umunyarwanda: Igitekerezo-ngenga cy’Ukubaho kwacu”
Patrick Kurumvune yatanze ubuhamya bw’uburyo Ndi Umunyarwanda yamufashije kuva mu ipfunwe yaterwaga no kuba se yari afungiwe ubusahuzi yakoze muri Jenoside yakorewe Abatutsi
Uwacu Julienne uyobora Ikigega gishinzwe gutera inkunga abacitse ku icumu rya Jenoside, FARG, ageza ijambo ku bari bitabiriye iri huriro
Umuyobozi Mukuru Wungirije wa Unity Club Intwararumuri, Dr Nsanzabaganwa Monique, yavuze ko Ndi Umunyarwanda ikwiye kurushaho kwimakazwa hose kuko ari igihango gikomeye
Bernard Makuza wahoze ari Perezida wa Sena ni umwe mu bitabiriye iri huriro
Minisitiri wa Siporo, Aurore Munyangaju Mimosa, nawe ni umwe mu bagize Guverinoma witabiriye iri huriro
Minisitiri w'Ubutegetsi bw'Igihugu, Prof Shyaka Anastase
Umuyobozi Mukuru wa Polisi y'u Rwanda, IGP Dan Munyuza, akurikiye ibiganiro byatangwaga
Umujyanama wa Perezida wa Repubulika mu by'umutekano, Gen James Kabarebe
Depite Muhongayire Christine akurikiye ibiganiro
Minisitiri w'Ibikorwa remezo, Claver Gatete, akurikiye ibiganiro

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .