Musanze: Yibye inka arabifungirwa, arekuwe ajya kuyireba arayica afatwa atetse inyama zayo

Yanditswe na Ferdinand Maniraguha
Kuya 27 Mutarama 2020 saa 12:07
Yasuwe :
0 0

Emmanuel Ntagahora wo mu Karere ka Musanze mu Murenge wa Muhoza, yatawe muri yombi nyuma yo kurekurwa azira kwiba inka, yagera mu rugo agasubira guhiga ya nka kugeza ayishe.

Mu 2017 nibwo Ntagahora yibye inka y’umuturage wo mu Karere ka Musanze yari abereye umushumba.

Icyo gihe yafashe imwe mu nka yari ashinzwe kwitaho mu rwuri arayigurisha. Yaje gufatwa ashinjwa kwiba iyo nka, ashyikirizwa urukiko rumukatira igifungo cy’imyaka itatu.

Mu gihe yari amaze ibyumweru bibiri afunzwe, iperereza ryarakomeje ya nka baza kuyifatana uwari warayiguze, bayigarura mu rwuri.

Igifungo cye cyarangiye mu minsi ishize, agaruka mu buzima busanzwe. Kuwa Gatandatu w’icyumweru gishize, bivugwa ko yasubiye muri rwa rwuri agafata ya nka arayitwara.

Nyir’iyo nka, yabwiye IGIHE ko bayitwaye ihaka ku buryo hari hasigaye icyumweru kimwe ngo ibyare.

Ntagahora kuri iyi nshuro ngo yatwaye iyo nka ayijyana mu rugo rw’undi muntu baturanye, barayibaga inyana bayikuramo.

Nyir’iyo nka yagize ati “Ejo yarongeye aragaruka arayiba arayishorera. Twasanze yayibaze, yayikuyemo inyana y’ikibamba nziza cyane. Yari kuzabyara mu cyumweru gitaha. Bamufashe bati ‘kuki wayishe’, ati ‘njye nari mfite umugambi wo kuzayica’. Bati ‘kuki wumva ushaka kwica inka’, ati ‘nari navuze ko nzayica’.”

Ntabwo biramenyekana icyateye Ntagahora kwica iyo nka, nubwo hari abaketse ko ashobora kuba yabitewe no kwihorera kuko yafunzwe nyuma ikaza kuboneka.

IGIHE yavuganye n’Umunyamategeko Moise Nkundabarashi, ngo asobanure icyo amategeko avuga ku muntu wakoze icyaha nk’icyo.

Me nkundabarashi yavuze ko icyo uwo mugabo yakoze ari isubiracyaha kandi rihanirwa. Kuba yarafunzwe inka ikaza kuboneka nyuma, Nkundabarashi yavuze ko bitavanaho icyaha yakoze, byongeyeho no kugira ngo iboneke nta ruhare yabigizemo.

Ati “Ni ibikorwa bibiri bitandukanye kandi n’iyo ya mbere kuboneka ntabwo ari uko ari we wayisubije ngo agaruke yongere ayibe. Bikozwe mu bihe bitandukanye yabigambiriye.”

Mu gihe habayeho isubiracyaha, ibihano birongerwa. Inzego z’umutekano zahise zita muri yombi Ntagahora n’umuturanyi we bafatanyije kuyibaga ari na we wari wamwemereye ko aramushakira abagura inyama z’iyo nka.

Ifoto ya Satellite igaragaza Umurenge wa Muhoza muri Musanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza