Musanze: Uwari Gitifu yatakambiye Urukiko ku byaha aregwa, aratsemba ku cyo gutanga ruswa

Yanditswe na N.Kubwimana Janvière
Kuya 18 Ukuboza 2020 saa 10:21
Yasuwe :
0 0

Uwari Umunyamabanga Nshingwabikorwa w’Umurenge wa Cyuve, Sebashotsi Gasasira Jean Paul, yasabiye imbabazi mu Rukiko rwisumbuye rwa Musanze ibyaha aregwa byo gukubita no gukomeretsa ku bushake, ahakana burundu ubwinjiracyaha ku cyaha cya ruswa ashinjwa.

Sebashotsi yireguye kuri uyu wa 18 Ukuboza 2020, ku munsi wa kabiri w’uru rubanza rwari rwasubitswe hamaze kumvwa uruhande rw’Ubushinjacyaha.

Aregwa gukubita no gukomeretsa Nyirangaruye Clarisse na Manishimwe Jean Baptiste, mu gihe bagenzi be bareganwa barimo ba Dasso batatu na Gitifu w’Akagari ka Kabeza bari bireguye imbere y’urukiko mu iburanisha ryabaye ku wa 16 Ukuboza 2020.

Ku itariki ya 28 Gicurasi 2020 nibwo Gitifu Sebashotsi na bagenzi be bareganwa baburanye mu Rukiko rwisumbuye rwa Musanze, ku cyaha baregwa cyo gukubita no gukomeretsa ku bushake, ku itariki ya 10 Kamena nibwo uru rukiko rwategetse ko abaregwa bafungurwa by’agateganyo bakajya baburana bari hanze, ariko bukeye bwaho barekuwe bongera gutabwa muri yombi bakekwaho icyaha cyo gutanga ruswa no gushaka gutoroka ubutabera.

Ubwo umucamanza yahaga umwanya Sebashotsi ngo yiregure ku byaha aregwa, yasobanuriye urukiko ko yemera icyaha cyo gukubita Nyirangaruye Clarisse akanabisabira imbabazi uwo yahemukiye, umuryango we n’umuryango nyarwanda muri rusange.

Yavuze ko icyaha yakiguyemo atabiteguye, ahubwo byaturutse ku guhosha imvururu zari zavutse, aho uyu Nyirangaruye yari yarumye Dasso Nsabimana akamukomeretsa.

Sebashotsi yabajijwe niba yemera icyaha cy’ubwinjiracyaha ku cyaha cya ruswa ashinjwa, agihakana yivuye inyuma avuga ko atari kubona uko atanga ruswa kandi afunzwe, ndetse anavuga ko kuba bamushinja ko yatumye muramu we ngo amufashe gutanga amafaranga ku muryango yahemukiye bakagirana inyandiko imusabira imbabazi, yavuze ko nta muntu yigeze atuma kuko aho yari afungiye atigeze asurwa ngo abone uko avugana n’abo avuga ko yatumye.

Yasabye urukiko kuzagira ubushishozi ku cyaha cya ruswa areganwa na bagenzi be, kuko kitigeze kibaho ndetse n’abakibarega nta bimenyetso bifatika bagaragaje, usibye kugendera ku nyandiko yanditswe na Se w’abahemukiwe, wavuze ko yahawe amafaranga ngo yiyunge n’abamuhemukiye abana be akayanga, ngo bakamubwira ko bazayatanga ku rukiko bakabarekura, ibintu avuga ko bitabayeho.

Ku ruhande rw’umwunganizi wa Sebashotsi, Me Janvier, na we yavuze ko icyaha cya ruswa umukiliya we ashinjwa kitakozwe kuko nta bimenyetso bifatika bigaragazwa n’Ubushinjacyaha.

Yasabye Urukiko kutita cyane ku ibaruwa yanditswe na se w’abana bakubiswe, asobanura ko ishobora kuba yaranditswe kubera ko bari bafite impungenge ko bashobora kurekurwa kandi batabishaka, bagahitamo kuyifashisha.

Ubushinjacyaha bwongeye guhabwa umwanya maze busaba urukiko kudatesha agaciro ibaruwa yanditswe na Karemera atanga amakuru ko hari intumwa yatumweho na Sebashotsi ariwe muramu we, bamusaba kumuha amafaranga yose yifuza, harimo no gusubizwa ayo batanze bavuza abana babo, yayanga bakamubwira ko azatangwa ku rukiko akarekuranwa na bagenzi be.

Ubushinjacyaha bwagaragaje ko kuba hari abemera icyaha cyo gukubita no gukomeretsa ariko bakongeraho ko babikoze kubera impamvu z’akazi bari boherejwemo, bitari impamvu y’uko bakora amakosa nk’ayo bakoze, gusa ubushinjacyaha bwasabye urukiko kuzagabanya ibihano ku bemeye icyaha bakanabisabira imbabazi no guhana by’intangarugero abakomeje kubihakana.

Nyuma yo kumva ubwiregure bw’abaregwa n’ababunganira ndetse n’Ubushinjacyaha, urubanza rwasubitswe, urukiko rwanzura ko ruzasomwa ku wa 14 Mutarama 2021 saa Munani n’igice.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .