Musanze: Urujijo ku musore wasambanyije umwana agakatirwa ariko akaba atarigeze afungwa

Yanditswe na N.Kubwimana Janvière
Kuya 8 Nzeri 2020 saa 03:38
Yasuwe :
0 0

Umwana w’umukobwa utuye mu Murenge wa Muhoza, Akagari ka Cyabararika, Akarere ka Musanze, atewe akababaro no kuba yaratewe inda asambanyijwe afite imyaka 14, uwayimuteye agahabwa igihano cyo gufungwa burundu ariko ubu ntari muri gereza.

Uyu mwana avuga ko yatewe inda ashutswe n’umusore witwa Bimenyimana Elisa wari usanzwe akora akazi ko gucuruza amafaranga yo muri telefoni (Airtime), hafi na Gare ya Musanze, ariko akaba yarabifatanyaga no kwigisha abanyeshuri bigaga mu mashuri abanza babaga bitegura gukora ibizamini bya Leta, ari naho yashukiye uyu mukobwa akamutera inda, kuko nawe yamwigishaga yitegura gukora ikizamini gisoza umwaka wa Gatandatu w’amashuri abanza.

Mu kiganiro kirambuye uyu mwana yagiranye na IGIHE, yavuze ko akimara guterwa inda n’uwo musore, yabibwiye ababyeyi be, nabo bakihutira kugeza iki kibazo kuri Polisi, batangira kumushakisha arafatwa arafungwa, ndetse baburana afunzwe aranakatirwa, ariko nyuma agiye kumushaka kuri Gereza kugira ngo amumenyeshe ko agomba kwandikisha umwana, bamubwira ko adahari.

Yagize ati "Maze kumenya ko ntwite najyanye na Mama kuri Polisi bambaza uko byagenze ndababwira, banyandikira impapuro banyohereza kuri MAJ, nabo banyohereza kuri Isange One Stop Center bambwira ko bazakomeza gukurikirana ikibazo cyanjye"

"Umwana amaze kuzuza imyaka ibiri nagiye kumwandikisha ku Murenge baranga kuko nta Ndangamuntu nagiraga, MAJ baramfasha tujya gushaka Se w’umwana kuri Gereza ngo amwandikishe ariko turamubura".

Uwasambanyijwe yavuze ko bageze kuri gereza bareba mu myirondoro y’ikoranabuhanga y’imfungwa bakamusangamo nk’imfungwa bagombaga kwakira yakatiwe burundu ariko ko atigeze ahagera.

Ubuhamya bw’uwo mwana bwatumye IGIHE yongera kugera kuri Gereza nkuru ya Musanze kugira ngo hamenyekane koko niba uyu musore wamuteye inda atahafungiye, ubuyobozi bwa Gereza bwarebye mu ikoranabuhanga, babonamo gusa imyanzuro y’urukiko igaragaza icyaha Bimenyimana aregwa n’igihano yahawe cya burundu, ariko bikagaragara bo batigeze bamwakira.

Ibi byatumye tugera kuri Sitasiyo ya Polisi ya Muhoza aho umwana avuga ko uwamusambanyije akimara gufatwa yafungiwe, gusa nabo bavuga ko babonye imyanzuro y’urukiko igaragaza ko yakatiwe igifungo cya burundu ku cyaha cyo gusambanya umwana akanamutera inda, ariko batigeze bamwakira ngo ahafungirwe, bagakeka ko yaba yarakatiwe ari hanze.

N’ikiniga cyinshi uwo mwana yongeye kubwira IGIHE ko abizi neza ko Bimenyimana yafashwe agafungirwa ku Murenge wa Muhoza, ndetse akanemeza ko amazemo icyumweru yamutumyeho we na Mama we ngo amusabire imbabazi ariko akazimwima.

Ati "Nta muntu mu bo duturanye cyangwa abo bakoranaga utazi ko yafashwe agafungwa, gusa icyo gihe yahakanaga icyaha, nyuma bamubwira ko nimbyara azakoresha DNA bikamenyekana, yumvise bihenze yemera icyaha antumaho na Mama ngo adusabe imbabazi, ariko turazimwima kuko umubyeyi wanjye byari byamubabaje cyane"

Bimenyimana ubusanzwe ukomoka mu Murenge wa Gakenke, Akagari ka Kagoma, ubuyobozi bw’Akagari akomokamo bwo bwemeza ko ahari kandi atuye ndetse yanasezeranye mu buryo bwemewe n’amategeko n’undi mugore.

Umunyamabanga Nshingwabikorwa w’Akagari ka Kagoma uyu musore akomokamo Niyonsenga Vincent, yemereye IGIHE ko uyu mugabo ahari ndetse yanashatse umugore n’ubwo barimo kwaka gatanya ubu.

Ati “Twarebye mu mashini turamubona, arahari atuye mu Mudugudu wa Rulambi mu Kagari ka Kagoma, Umurenge wa Gakenke, yanashatse umugore mu buryo bwemewe n’amategeko, ariko hashize nk’imyaka ibiri umugore yaramutaye yisubirira iwabo, ubu umugabo aba wenyine n’umwana umugore yamusigiye, ariko ubu umugore arimo kwaka ubutane".

Urubanza ruregwamo Bimenyimana wasambanyije umwana utujuje imyaka y’ubukure rwaciwe n’urukiko rukuru rwa Musanze, rutegeka ko ahabwa igihano cy’igifungo cya burundu mu Ukwakira 2017, ariko kugeza ubu ntiyari yagezwa muri Gereza, uwasambanyijwe akaba asaba ubuvugizi ngo afashwe kumushakisha.

Umwana wasambanyijwe arahangayitse nyuma yo guterwa inda uwabikoze ntafungwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .