Musanze: Urubyiruko rwasobanuriwe uruhare rufite mu guharanira ubutabera bunoze

Yanditswe na N.Kubwimana Janvière
Kuya 21 Werurwe 2019 saa 08:44
Yasuwe :
0 0

Urubyiruko rwiga mu mashuri makuru na Kaminuza rwasobanuriwe uruhare rufite mu guharanira ubutabera bunoze, no kurwanya ibyaha binyuze mu kubikumira bitaraba.

Ubu butumwa bwatangiwe mu ishuri rikuru ry΄ubumenyingiro rya INES Ruhengeri kuri uyu wa 20 Werurwe 2019, hagarukwa ku ruhare rw’urubyiruko mu kurwanya ibyaha bitandukanye, muri gahunda y΄icyumweru cyahariwe ubutabera cyatangiye kuya 18 Werurwe kizasozwa kuwa 22 Werurwe 2019.

Umuyobozi wa Komisiyo ishinzwe ivugururwa ry΄amategeko, Havugiyaremye Aimable, yavuze ko kurwanya ibyaha bitashoboka igihe bikozwe n’inzego zibishinzwe gusa.

Yagize ati "Kurwanya no gukumira ibyaha ni umurimo wacu wa buri munsi, ariko kandi inzego zibishinzwe ntizihagije hatarimo n΄abagenerwabikorwa, kuko iyo bumvise neza ububi bw΄ibyaha, uburyo bwo kubikumira no kubirwanya, ndetse n‘uko batanga amakuru aho babibonye, bitworohereza akazi. Niyo mpamvu y’ibi biganiro tugenda dutanga hirya no hino mu gihugu kugira ngo barusheho gusobanukirwa neza ubutabera."

Bamwe mu bitabiriye ibi biganiro bavuga ko bagiye gutanga umusanzu wabo basobanurira abaturage ibyaha, ingaruka zabyo n΄amategeko abihana.

Rutayisire Gedeon yagize ati "Nyuma y’ibi biganiro duhawe dusobanukiwe neza uruhare rwacu mu kurwanya ibyaha cyane tubikumira bitaraba, umusanzu wacu ni ugusobanurira abaturage ibyo byaha uburyo bwo kubyirinda no kubirwanya, nkatwe twiga iby΄amategeko tunabasobanurire amategeko abihana. Ibi bizatuma umubare w΄ababikora ugabanuka, hiyongere uw’ababirwanya."

Ibiganiro birimo gutangwa mu cyumweru cyahariwe ubutabera byibanda ku gusobanurira abaturage kurwanya no gukumira ibyaha birimo icuruzwa ry΄abantu, ibiyobyabwenge, gusambanya abana, ruswa n΄ibyaha bikoreshejwe ikoranabuhanga.

Abanyeshuri bo muri Ines-Ruhengeri bitabiriye ibi biganiro
Umuyobozi wa Komisiyo ishinzwe ivugururwa ry΄amategeko, Havugiyaremye Aimable, yavuze ko kurwanya ibyaha bitashoboka igihe bikozwe n’inzego zibishinzwe gusa
Anastase Nabahire uyobora Ubunyamabanga bw'Urwego rw'Ubutabera, atanga ikiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza