Musanze: Imiryango 900 ibana mu makimbirane yatunzwe agatoki ku ihohoterwa rikorerwa abana

Yanditswe na N.Kubwimana Janvière
Kuya 2 Ukuboza 2020 saa 08:49
Yasuwe :
0 0

Imiryango isaga 900 ibana mu buryo bw’amakimbirane mu Karere ka Musanze, iratungwa agatoki mu kuba nyirabayazana w’ihohoterwa rikorerwa abana, harimo inda zigiterwa abangavu n’imirimo ivunanye ibakoreshwa, bikabagiraho ingaruka zirimo guta amashuri, indwara n’ibindi.

Ni ikibazo cyagarutsweho cyane ku wa 1 Ukuboza 2020, ubwo inzego zitandukanye z’ubuyobozi bw’Akarere ka Musanze, abafatanyabikorwa bako barimo Umuryango Mpuzamahanga ufite mu nshingano kurengera umwana Hope and Home for Children n’abandi, bareberaga hamwe uko ihohoterwa rikorerwa abana rihagaze n’ingamba zo kurirwanya.

Muri Musanze kuri ubu habarurwa abangavu batarageza ku myaka 18 bagera ku 107 babyaye mu gihe cy’amezi 10 gusa mu 2020, muri aba harimo 90 babyaye mu mezi atatu gusa, hakaba n’abandi bana 248 bafatiwe mu mirimo ivunanye yiganjemo ubwikorezi bw’ibisheke, gukoreshwa mu birombe by’amatafari, kwikorezwa inzoga n’ibindi.

Twizerimana Clement ni umwe mu babyeyi bemeza ko n’ubwo hakiri ibibazo bituma abana bahohoterwa, ipfundo nyamukuru ari amakimbirane akigaragara mu miryango.

Yavuze ko ibyo bikorwa bituma abana babura urukundo rwa kibyeyi n’impanuro bikarangira bashowe mu bibagiraho ingaruka, birimo ubuzererezi n’ihohoterwa rishingiye ku gitsina.

Yagize ati "N’ubwo hakiri ibintu byinshi bituma habaho ubuzererezi bw’abana, inda ziterwa abangavu n’ibindi, ariko ipfundo nyamukuru riri mu miryango ikibana mu makimbirane. Umwana wakuriye muri uyu muryango ntazi icyanga cyo gukundwa n’ababyeyi, nta nama zabo azi, ntiyitabweho n’umuryango bigatuma ashukishwa ibimujyana mu bikorwa bituma ahohoterwa. Ni ahacu nk’ababyeyi kuba ijisho ry’iyo miryango tureba uko ibanye n’uko irera abana bayo.’’

Umukozi wa Hope and Home for Children, Munyamariza Moïse, avuga ko umuryango ariwo ugomba gufata iya mbere mu kurengera umwana, ukamufasha kubona ibyo akenera mu buzima bwe.

Ati "Iyo tuvuze umuryango ni ba bandi baba munsi y’igisenge cy’inzu imwe, Papa, Mama n’abana. Ababyeyi ni bo ba mbere mu kurwana no kurengera uburenganzira bw’abo babyaye, ikibazo gikomera rero iyo uyu muryango ubana mu makimbirane kuko umwana abihirwa no kuwubamo akigendera, niho hava kwa kubasambanya, bagakoresha imirimo ivunanye n’ibindi.

Yavuze ko bidakwiye ko ababyeyi bihunza inshingano zo kurera abo babyaye bagahitamo kubareresha.

Ati “Birababaje kuba umubyeyi ahitamo kureresha umwana we kuko aba yiyambuye inshingano, ikibazo kiratureba, kikareba ubuyobozi ariko cyane umuryango umwana avukamo.’’

Umuyobozi w’Akarere ka Musanze, Nuwumuremyi Jeannine, avuga ko buri Munyarwanda wese akwiye kureberera uburere bw’umwana uwo ariwe wese, ariko by’umwihariko umuryango abarizwamo ugomba utarangwa n’amakimbirane.

Yagize ati “Umwana uzagirira igihugu akamaro na we ubwe agomba kuba yarabonye uburere bwiza, ibi bisaba ko buri wese aba ijisho ku burere bwe, yabona hari abashaka kumushora mu ngeso mbi akabyamagana, usanze akoreshwa imirimo mibi bikaba uko, kuko igihugu ntikizubakwa n’abana b’umuryango umwe. Nibyo turacyafite imiryango ibanye mu makimbirane ituma abana batabona uburere nyabwo, dukomeje kubegera tubigisha ngo bayavemo kuko atuma abana babura ibyo bifuza bakabishakira aho bashobora guhura n’ingorane.’’

Ibarura ryakozwe n’Akarere ka Musanze ryagaragaje ko mu mezi 10 gusa ya 2020, abangavu 107 babyaye batarageza ku myaka 18, mu gihe imiryango 951 nayo ikibana mu makimbirane.

Abayobozi bahawe umukoro wo gukemura ibibazo by'amakimbirane yo mu ngo barengera uburenganzira bw'abana
Abayobozi n'abafite aho bahurira no kurengera abana basesenguye ikibazo cy'ihohoterwa bakorerwa basanga gishingiye ku makimbirane yo mu ngo
Ikibazo cy'abana bakoreshwa imirimo ivunanye mu Karere ka Musanze cyasabiwe umwihariko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .