Musanze: Gukora imyenda mu bwoya bw’intama byavanye abagore mu bukene n’ubwigunge

Yanditswe na N.Kubwimana Janvière
Kuya 16 Ugushyingo 2019 saa 11:21
Yasuwe :
0 0

Abagore bo mu Karere ka Musanze bakora umwuga wo gutunganya ubwoya bw’intama zo mu bwoko bwa Merino abenshi bazi nka Derine, bakoramo imyenda yo mu bwoko butandukanye, bavuga ko byabakuye mu bwigunge babagamo n’ubukene bwari bwarabatsikamiye.

Ni abagore basaga 150, bibumbiye hamwe mu cyo bise umuzabibu mwiza, aho batunganya ubu bwoya bw’intama bakoramo imipira yo kwifubika, imyenda y’abana, ingofero, imitako ikoze mu nyamaswa zitandukanye cyane izikunze kuboneka muri Pariki y’Ibirunga n’ibindi.

Aba bagore bari mu byiciro bitandukanye birimo abapfakazi, abafite ubumuga, abafite ubwandu bw’agakoko gatera Sida, babagaho mu buzima butaboroheye kubera kutagira icyo bakora. Kuri ubu bavuga ko bamaze kuva mu bukene bwari bwarababayeho akarande

Umwe muri abo bagore Uwamahoro Angelique yagize ati “Ndi umupfakazi, naryaga ari uko nagiye kuri komezamabuno ngahirwa no kubona ikiraka, nakibura nkirirwa nkomanga ibipangu by’abandi ngo bamfungurire, none ubu ubwoya bw’intama bwankuye muri ubu bukene, singitekereza ku bwandu bwa Sida mbana nabwo, mu gihe mbere nahoraga numva ko ndi nyakwigendera, ubu nigaruriye icyizere, ukwezi kurashira nkibarira amafaranga 40,000, byanatumye nivana mu bukode”.

Mukeshimana Solange nawe ati “Ntaratangira kwigishwa uyu mwuga nari meze nka mayibobo, byarangoraga kurera abana batanu umugabo yansigiye, iyo nibukaga ko ndi umutindi byongeyeho wanduye agakoko gatera Sida narihebaga pe, ariko ubu sintinya kujya kuri Banki kwaka inguzanyo nkakora imishinga inteza imbere”.
“Iyo mboshye umwenda umuzungu akawugura nta gushidikanya numva nishimye cyane, mbese iwanjye ibintu ni uruzungu”.

Umuyobozi uhagarariye iri shyirahamwe ry’abagore bo mu muzabibu mwiza Dufitumukiza Simon Pierre, avuga ko iri shyirahamwe rijya kujyaho ryatekereje cyane ku bagore b’abakene kurusha abandi, abapfakazi, ababana n’ubwandu bw’agakoko gatera Sida, n’abandi bitabaga byoroshye kubona akazi hanze, byose bigamije kubazamurira ubushobozi bikura mu bukene.

Umuyobozi w’Akarere wungirije ushinzwe imibereho myiza y’abaturage Kamanzi Axelle, avuga ko aba bagore ari abafatanyabikorwa bakomeye bo gukebura bagenzi babo bacyitinya.

Ati “Aba bagore ni abafatanyabikorwa bacu bakomeye mu guhindura imyumvire kuri bagenzi babo bakitinya, kuko berekanye ko kwikura mu bukene uko bwaba bumeze kose bishoboka, kuko batinyutse bakaganisha umurongo wabo ku kwishakamo ibisubizo nk’uko duhora tubibakangurira, tuzakomeza kubaba hafi aho badukeneye batwiyambaze, n’ubuvugizi ku biturenze twabubakorera.”

Iri shyirahamwe ryatangiye mu 2008, rikaba rifite abanyamuryango 180 harimo n’abakora nk’abanyabiraka. Bamaze kugera ku bworozi b’intama 215 za Merino zikomoka muri Kenya.

Icyakora barasaba gushakirwa amasoko mu Rwanda kuko iryo bafite ubu ari iryo mu bihugu byo hanze, no gukangurira abaturage korora izi ntama kuko zikiri nke bigatuma ubwoya butaboneka, bityo ibicuruzwa byabo na byo bikaba bihenze, aho umupira umwe ushobora kugura amafaranga asaga 100,000.

Abagore bakora imyenda mu bwoya bw'intama byabavanye mu bukene
Mukeshimana avuga ko ubudodo buva mu bwoya bw'intama buvamo imyenda itandukanye
Intama zo mu bwoko bwa Merino bogosha ubwoya bukorwamo imyenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza