00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Batewe impungenge n’ibidendezi by’amazi byatangiye kwangiza inzu zabo

Yanditswe na Ndikumwenayo Thierry
Kuya 20 Ukuboza 2022 saa 11:11
Yasuwe :

Ikidendezi cy’amazi yireka mu muhanda uhuriweho n’utugari tubiri two mu murenge wa Cyuve ari two Kabeza na Marantima kimaze imyaka igera kuri itatu gihangayikishije abaturage kuko mu gihe cy’imvura amazi yuzura umuhanda akinjira mu nzu zabo none zikaba zaratangiye kwangirika.

Aya mazi kandi afunga umuhanda ku buryo ingendo zihagarara cyangwa ababishoboye bakagenda bafashe ku nkuta z’ibipangu bikikije iki kidendezi.

Iki kibazo kinari mu kagari ka Cyabararika, Umurenge wa Muhoza, aho nubwo hakozwe umuganda rusange bitigeze bikemura ikibazo, kuko amazi yoherejwe mu butaka bw’umuturage.

Abaturiye ibi bidendezi bisa n’ibyabaye akarande bavuga ko biteye inkeke haba ku bikorwaremezo birimo inzu ndetse no ku buzima bwabo. Hari n’abakoropa mu muhanda kugira ngo amazi ave imbere y’ingo izabo, ibi bakabikora birinda imibu yo muri aya mazi.

Bigirimana Théoneste atuye mu mudugudu wa Nganzo, imbere neza y’ibi bidendezi. Yabwiye IGIHE ko byamwangirije inzu dore ko iyo amazi abaye menshi yinjiramo imbere.

Yagize ati “Ni mazi aturuka ruguru mu isanteri akireka hano. Imyaka itatu irashize, twiyambaje abayobozi batubwira ko bari hafi kuza kuhakora ariko kuva iyo myaka na magingo aya nk’uku ubisanze niko bihora. Iyo imvura iguye ari nyinshi inzira irafunga burundu.”

Bigirimana avuga ko aya mazi yamugizeho ingaruka kuko hari inzu y’ubucuruzi yinjiyemo ikaba yaratangiye gusenyuka; ubu ngo nta mu kiriya yayibonera kubera ayo mazi.

Ati”Nk’aha twahaje mu buryo bwo gutura twumva ko hajya hanatubyarira umusaruro mu bucuruzi ariko kubera aya mazi inzu twarazifunze nta bantu bazibamo. Wahatura ute ubona bakoropa mu muhanda? Twashatse kuhakora twirengera ubuyobozi buratubuza”.

Impamvu bwababujije ni uko buri wese yari gushaka kwirengera akabangamira bagenzi be.

Mugenzi we Twizerimana Jean Paul acururiza hafi y’aya mazi, inzu acururizamo yayijemo nyuma y’uko uwayibagamo ibicuruzwa bye byangijwe n’amazi bigatuma yimuka.

Ati “Iyo imvura yaguye amazi araza akarenga akinjira mu nzu, ibicuruzwa bikangirika. Uwambanjirije muri iyi nzu yimutse ahunze aya mazi kuko yamwangirije ibintu byinshi. Hari ubwo usanga abana bagwamo cyangwa amakayi n’inkweto bikagwamo. Ubu twabaye inshuti n’imibu”.

Nshimiyimana Jean de Dieu wo mu kagari ka Cyabararika muri Muhoza avuga ko iki kibazo kirenze ubushobozi bw’akagari n’umurenge, ngo hatagize igikorwa hari inzu zigera muri enye zasenyuka.

Iyo imvura iguye abafite imodoka hambuka ufite ndende, ibi akabihuza n’abatuye muri Kabeza ya Cyuve kuko ngo imodoka ngufi inyuzemo amazi agera ku birahuri.

Umuyobozi w’Akarere ka Musanze Ramuli Janvier, avuga ko n’ubwo atari afite amakuru kuri iki kibazo, hari gahunda yo gukora indi mihanda mu mwaka utaha nyuma y’icyiciro kiri gukorwa ubu.

Ati “Igisubizo cy’aho hantu tugitegereje mu cyiciro cya kane cy’imishinga duterwamo inkunga na banki y’isi, kandi biri mu mwaka utaha. Niturangiza aho turi gukora tuzakurikizaho Cyuve kandi inyigo zarakozwe”.

Icyiciro cya gatatu cy’imihanda iri kubakwa muri aka karere ku nkunga ya banki y’isi, kirasaga ibilometero bitandatu. Bikaba biteganyijwe ko izaba yarangiye muri Gicurasi umwaka utaha.

Iyo amazi yabaye menshi udafite akagufu ahindura inzira
Iyari inzu y'ubucuruzi yarafunzwe kubera amazi
Iyo amazi abaye menshi amusanga mu iduka rye
Uyu mukecuru yari kugabanya amazi ari imbere y'inzu ye mu kwirinda imibu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .