Musanze: Abarenga 150 bafashwe barenze ku mabwiriza yo kwirinda Coronavirus ku munsi wa mbere w’ingamba nshya

Yanditswe na N.Kubwimana Janvière
Kuya 16 Ukuboza 2020 saa 11:41
Yasuwe :
0 0

Nyuma y’uko Inama y’Abaminisitiri Idasanzwe yateranye kuri uyu wa 14 Ukuboza yemeje amabwiriza mashya yo kwirinda icyorezo cya Coronavirus ndetse akarere ka Musanze, kihariye 13% by’ubwandu bushya bw’iki cyorezo mu byumweru bibiri bishize kagahabwa umwihariko, abarenga 150 baraye baguye mu mutego wo kutubahiriza amabwiriza mashya yashyizweho muri aka karere, bajyanwa kongera kuyasobanurirwa muri Stade ya Musanze.

Amabwiriza mashya agena ko isaha yo kuba ibikorwa byose byahagaze ari saa tatu z’umugoroba, ndetse umubare w’abitabira ibikorwa birimo inama ukaba utagomba kurenza 30 by’ubushobozi bw’aho igiye kubera.

Akarere ka Musanze ko kahawe umwihariko, kuko inama zahagaritswe burundu muri aka karere mu gihe cy’ibyumweru bitatu uhereye ku wa 15 Ukuboza, ndetse isaha yo guhagarika ibikorwa byose ishyirwa saa moya, aho kuba saa tatu nk’uko bimeze ahandi.

Umuyobozi w’Akarere ka Musanze, Nuwumuremyi Jeannine, yavuze ko ingamba zashyizweho zigomba kubahirizwa kugira ngo iki cyorezo gicike burundu mu karere ka Musanze, ndetse anashimangira ko izi ngamba zizakurikizwa kuri bose, kabone yewe n’abaca muri aka karere bajya mu tundi turere.

Yagize ati "Birumvikana ko ku bagenda mu Karere ka Musanze cyane cyane mu mujyi, amasaha yo guhagarika ingendo ni saa moya zuzuye, aho waba uva hose n’aho werekeza. Niba uvuye mu mujyi wa Kigali ufite aho werekeje ariko uri bunyure i Musanze ukarenza iyi saha, birakubera ikibazo kuko waciye ku mabwiriza ahari. Dufatanyije n’abaturage, turakomeza kwibukiranya ishyirwa mu bikorwa ry’aya mabwiriza kugira ngo tugabanye imibare y’abakomeje kwandura izamuka buri munsi mu Karere kacu".

Kuri iyi ngingo, Minisitiri w’Ubutegetsi bw’Igihugu, Prof. Shyaka Anastase, yavuze ko abakora ingendo zikeneye guca mu karere ka Musanze, nk’abakora ingendo hagati ya Rubavu na Kigali, bashobora gukoresha uburyo bubiri mu gukomeza ingendo, bagaca mu nzira inyura mu karere ka Ngororero ikagera Muhanga, cyangwa se abanyuze muri Musanze bagaherekezwa n’inzego z’umutekano igihe bari mu karere.

Ku ruhande rw’abaturage, abaganiriye na IGIHE bavuze ko biteguye kubahiriza amabwiriza yashyizweho, kuko kuba akarere kabo kahawe umwihariko bigaragaza ko bageramiwe.

Ikoribyayo Simeon yavuze ko n’ubwo hhari abaguye mu makosa bagafatwa barenze ku mabwiriza, hari abandi benshi bari bayubahirije.

Yagize ati "Saa kumi n’ebyiri n’igice byari ibicika, abantu biruka basiganwa kugera mu rugo, ibinyabiziga binyuranamo ku muvuduko udasanzwe, saa moya ni isaha igoye kuba twageze mu rugo, gusa tuzajya tugerageza kuyubahiriza, kuko guhangana na Covid-19 ntibisaba kujenjeka [icyo bisaba] ni ugufata imyanzuro ikarishye".

Nyirabushari Velonique nawe yemeza ko aya mabwiriza yari akenewe cyane, kuko ahamya ko abaturage, biganjemo abatuye ahantu hahurira abantu benshi mu byaro, batari bacyubahiriza aya mabwiriza.

Yagize ati "Abantu basa nk’aho biraye cyane, mu isoko babyigana uko biboneye, agapfukamunwa bakambara nabi, hari n’abatakambara. Ibi byose tubona ari yo ntandaro yo kuzamuka kw’imibare y’abarwayi ba Covid-19, ingamba twashyiriweho tugiye kugerageza kuzubahiriza dufatanyiriza hamwe kwirinda ubwandu bushya".

Kugeza ubu, abantu 6,832 bamaze kwandura icyorezo cya Coronavirus mu Rwanda, barimo 739 bakirwaye, ndetse na 57 bamaze kwitaba Imana, barimo 10 bapfuye bakiri bato kandi badasanganywe indwara z’akarande, nk’uko byatangajwe na Dr. Ngamije Daniel.

Mbere ya saa moya, umuvuduko w'abantu n'ibinyabiziga byatanguranwaga kugana mu rugo
Mu masaha y'umugoroba, urujya n'uruza mu karere ka Musanze rwari rwagabanutse
Inzego z'umutekano zari zageze mu muhanda mbere ya saa moya, ziri gukebura abantu ngo batahe
Hari abafashwe n'amasaha bataragera mu rugo mu karere ka Musanze
Abarenga 150 barajwe muri Stade basobanurirwa ingamba zashyizweho zo kwirinda Coronavirus
Nyuma ya saa moya, imihanda y'umujyi wa Musanze nta nyoni yatambagamo, usibye imodoka z'inzego z'umutekano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .