Musanze: Abakobwa basabwe gutinyura bagenzi babo bikandagira mu guhitamo amasomo ya Siyansi

Yanditswe na N.Kubwimana Janvière
Kuya 18 Ugushyingo 2019 saa 10:21
Yasuwe :
0 0

Umuryango Uharanira guteza imbere uburezi bw’umwana w’umukobwa, Fawe Rwanda n’uwa Master Card Foundation basabye abakobwa biga amasomo ya Siyansi kuba inyenyeri imurikira bagenzi babo bakiyatinya.

Ubu butumwa bwatangiwe mu gikorwa cyo gusinyisha abana b’abakobwa 416, bagiye kurihirirwa na FAWE Rwanda mu Ishuri rikuru ry’Ubumenyi ngiro rya Ines Ruhengeri.

Ni igikorwa kiri muri gahunda FAWE Rwanda yihaye yo kurihira abakobwa biga mu mashuri yisumbuye na Kaminuza basanzwe ari abahanga, ariko baturuka mu miryango itishoboye yo mu cyiciro cya mbere n’icya kabiri cy’ubudehe.

Tuyizere Jeanne ufashwa n’uyu muryango, yavuze ko yiteguye kubyaza umusaruro amahirwe yahawe akanaha ubutumwa abandi bagitinya kwiga siyansi.

Ati “Maze imyaka ine ndihirwa na FAWE, ubu ngeze mu mwaka wa kabiri mu bijyanye n’Ubuganga. Aya mahirwe niteguye kuyabyaza umusaruro kuko mbona amateka yanjye yarahindutse. Nandi nzaba icyitegererezo kuri bagenzi banjye bagitinya kwiga siyansi kandi nta gikomeye kirimo.”

Nyirakanyambo Philomène na we yagize ati “FAWE Rwanda yadukoreye ibikomeye umuntu atapfa kugukorera. Aya mahirwe ngomba kuyabyaza umusaruro nteza imbere igihugu n’umuryango wanjye. Indoto zanjye ni izo guhangana n’indwara zugarije sosiyete , nzasobanurira bagenzi banjye bagitinya amasomo y’ubumenyi ngiro ko gushaka ari ugushobora.”

Usibye kuba FAWE Rwanda yarakanguriye abakobwa kwiga amasomo ajyanye na Siyansi na Minisiteri y’Uburezi yihaye intego yo kongera umubare w’abana b’abakobwa biga amasomo y’ubumenyi ngiro bakava kuri 16% bariho bakagera kuri 30% mu 2024.

Umuyobozi wa Ines Ruhengeri, Padiri Hagenimana Fabien, yavuze ko yishimiye ubufatanye bwa FAWE Rwanda yabahaye abakobwa bifitiye icyizere.

Yavuze ko bazi neza icyo bashaka. Ati “Twizeye ko bazaba umusemburo wa bagenzi babo bagitinya kwiga iby’ubumenyi ngiro.’’

Umuyobozi wa FAWE Rwanda, Antonia Mutoro, yavuze ko abana barihira bifitemo ubushobozi bwo gutanga ibyo bafite.

Ati “Twemeye kurihira abakobwa 416 ku nkunga ya Master Card Foundation no ku bufatanye dufitanye na Ines Ruhengeri. Hari abatangiye bashya n’abahasanzwe, tubafasha no mu buzima busanzwe tukabaherekeza kugeza barangije.”

“Ni abana biyumvamo ubushobozi bwo gutanga ibyo bafite ku buryo biduha icyizere ko na nyuma y’amasomo bazatanga umusaruro mwiza, nk’aba biga siyansi tubasaba kuba inyenyeri itinyura bagenzi babo bakibitinya kuko birashoboka.”

Mu myaka irindwi ishize iyi gahunda itangiye ya FAWE Rwanda ku bufatanye na Master Card Foundation yo kurihira abana b’abakobwa bakomoka mu miryango itishoboye biga mu mashuri yisumbuye na Kaminuza, imaze kurihira abagera kuri 816. Biteganyijwe ko kugeza mu 2023 abagera ku 1200 bazaba bamaze kungukira muri iyi gahunda.

FAWE Rwanda igiye kurihira abakobwa 416 biga muri Ines Ruhengeri
Muri iki gikorwa hasinywe amasezerano yo kurihira abakobwa 416 baturuka mu miryango itishoboye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza