Murukali yatangije ikoranabuhanga ryorohereza abatanga impano zo guhahira kuri murandasi

Yanditswe na Ndahayo Emmanuel
Kuya 22 Mutarama 2021 saa 02:12
Yasuwe :
0 0

Iguriro ryo kuri murandasi rya Murukali ryashyize igorora abahahira kuri murandasi, aho ryashyizeho ikarita ya ‘eGift’ izafasha abantu barenze umwe kuyihahiraho mu buryo bworoshye kandi mu gihe kirekire.

Ni ikarita yo kuri murandasi (idafatika mu ntoki), aho umuntu ajya ku rubuga rwa Murukali.com akarufungura, ubundi akagura iyo karita maze akayishyiraho amafaranga azajya akoresha mu gihe kirekire, bitabaye ngombwa ko buri uko aguze ikintu kuri Murukali yishyura ako kanya.

Iyi karita kandi izatuma uyiguze abasha gufasha inshuti n’abavandimwe kugura ibyo bakeneye bayifashishije bitabaye ngombwa ko bishyura amafaranga yabo, ahubwo agakatwa kuri ya karita kandi uwayifunguye akabona ubutumwa bumwereka ibyabaye byose.

Iyo umuntu amaze kugura iyi karita, yakira ubutumwa kuri email bukubiyemo nimero azajya akoresha ahahira kuri Murukali, izo nimero ni zo ashobora no gusangiza bagenzi be yifuza ko bazajya bahaha bayikoresheje.

Umuyobozi Mukuru wa Murukali, Uwampaye Yvette, yavuze ko usibye kuba eGift izafasha abantu kurushaho guhaha mu buryo bworoshye, izanafasha uyihawe kwizigamira amafaranga.

Yavuze ko ari ibintu bituma umuntu ashobora guteganya amafaranga azakenerwa mu gihe runaka akaba yayashyira kuri ya karita, akajya ayakoresha gahoro gahoro bitabaye ngombwa ko yishyura buri uko aguze ikintu.

Yagize ati “Abantu benshi baba bashaka guhahira imiryango yabo, hari abashaka koherereza abantu amafaranga yo guhaha, hari abantu baba mu mahanga bumva bahahira imiryango yabo iba mu Rwanda, aho hose abantu bashobora kwifashisha ikarita ya eGift bakabasha guhaha kandi bitabaye ngombwa ko bahura cyangwa ngo babe bari kumwe.”

Mu gihe abantu bahashye bifashishije eGift ya Murukali, uwatanze uburenganzira bwo guhaha abona ubutumwa bw’igikorewe cyose kuri ya karita, ibyo akabibonera mu butumwa bugufi yakira nyuma y’uko amafaranga asohotse kuri ya karita.

Ku rundi ruhande, abantu bazakoresha iyi karita bazagira amahirwe yo gukora igenamigambi rijyanye n’icyo bifuza kugeraho.

Yakomeje ati “Ushobora guhembwa ugahita ushyira amafaranga ku ikarita, ukazajya uhaha uko ubishatse kandi bidasabye ko buri gihe wishyura amafaranga, ahubwo hagakoreshwa ya mafaranga umuntu yizigamiye.”

Ku kijyanye n’umutekano, Murukali ivuga ko ikoranabuhanga ikoresha ryizewe ku buryo abantu badakwiye guhangayikishwa na ryo kuko “dufite ikoranabuhanga rigezweho kandi urubuga rwacu rurizewe cyane.”

Uwampaye yavuze ko bafite gahunda nshya yo kugabanyiriza abakiliya babo mu gihe basubije neza ibibazo bishyirwa ku rubuga, aho bashobora kugabanyirizwa amafaranga ari hagati ya 5000 Frw na 10 000 Frw.

Muri ibi bihe bya Guma mu Rugo kandi Murukali irahamagarira abacuruzi kuyigana bakabacururiza ibicuruzwa byabo kuko ari ubuntu.

Ku baguzi, guhahira kuri Murukali birahendutse cyane kandi bitwara igihe gito ndetse umuntu akanagura ibicuruzwa bifite ubuziranenge, isuku n’ibindi. Umuntu iyo aguze kuri Murukali, ibyo yaguze bimugeraho mu gihe kitarenze amasaha atatu gusa.

Murukali yizeza ko abantu badakwiye kugira ubwoba bw’ibihombo kuko batagikora, ahubwo bayegera bakagaragaza ibyo bacuruza, bagasobanurirwa uko bafashwa gukomeza gucuruza no muri ibi bihe bya Guma mu Rugo ndetse ibicuruzwa byabo bikagera ku masoko menshi.

Murukali irahendutse kandi uyitumijeho ibicuruzwa bimugeraho mu gihe kitarenze amasaha atatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .