00:00:00 IGIHE NETWORK KN KINYARWANDA EN ENGLISH FR FRANCAIS

I Kigali hagiye gushingwa ishuri ryigisha amahame n’imikorere bya FPR-Inkotanyi

Yanditswe na Igizeneza Jean Désiré
Kuya 18 September 2022 saa 06:19
Yasuwe :

Umuryango FPR-Inkotanyi mu Mujyi wa Kigali watangaje ko ugiye gutangiza ishuri rizajya ryigishirizwamo amahame n’imikorere iwubereye hagamijwe gusobanurira amatwara yawo mu bakiri bato.

Byatangajwe kuri iki Cyumweru, tariki ya 18 Nzeri 2022, mu nama yahuje abayobozi b’Umuryango FPR Inkotanyi bagize Komisiyo ishinzwe Imiyoborere Myiza ku rwego rw’Umujyi wa Kigali.

Iyi nama yatumiwe abayobozi b’iyi komisiyo ku nzego zitandukanye zirimo urw’Umujyi wa Kigali, iz’uturere tuwugize ndetse n’abo mu mirenge yose uko ari 35. Yitabiriwe kandi n’abayobozi b’udushami twayo ku rwego rw’umujyi, uturere n’ingaga z’urubyiruko n’abagore.

Umuyobozi wa Komisiyo ishinzwe Imiyoborere Myiza mu Muryango FPR Inkotanyi ku rwego rw’Umujyi wa Kigali, Prof. Niyomugabo Cyprien, yavuze ko kugira ngo urubyiruko rukomeze kwihugura ku ngingo nyinshi zitandukanye, umujyi uteganya gushyiraho ishuri rizafasha mu kubarera no kubongerera ubumenyi buzatuma baba intangarugero mu gihe kiri imbere.

Ati “Iryo shuri rizabamo amasomo ajyanye n’umuco, ubukungu, ikoranabuhanga, mbese iyo mitekererezae ya FPR yo kubaka Umunyarwanda ushoboye igere kuri bose.”

Yemeje ko aya masomo ari yo azatuma u Rwanda rugira abayobozi b’ahazaza bashoboye bafite indangagaciro zubaka igihugu mu nguni zose.

Ntabwo hatangajwe igihe iri shuri rizafungurirwa nubwo yijeje ko ari mu gihe cya vuba.

Niyomugabo yavuze ko muri iyi nama banarebeye hamwe ibyo Umuryango FPR Inkotanyi wiyemeje kugezaho abaturage niba biri gushyirwa mu bikorwa n’aho kongera imbaraga.

Yagize ati “Nkatwe rero dushinzwe kureba uko imigabo n’imigambi ishyirwa mu bikorwa mu Mujyi wa Kigali, byari ngombwa koko ko tuza tukaganira niba yinjira muri wa murongo nyawo Abanyarwanda bahisemo biturutse ku mateka yabo n’imiyoborere biyemeje.”

Yavuze ko bagomba kujya mu baturage bakabakangurira gukurikiza gahunda za Leta zose haba mu burezi, imibereho byiza, kwizigamira binyuze muri Ejo Heza n’ibindi.

Ati “Hari nk’aho mu minsi yashize hagaragaye raporo y’abana batewe inda, icyo tugomba kugikoraho ubutabera bugakurikizwa ariko n’abana bakamenya uburenganzira bwabo n’inshingano zibareba.”

Umuyobozi ushinzwe Imiyoborere Myiza mu Karere ka Kicukiro, Mukandahiro Hydayat, yavuze ko uyu munsi mu bijyanye n’imiyoborere n’abayobozi barajwe ishinga no kubona umuturage ku isonga mu kumuha serivisi zose akeneye, birinda ivangura iryo ari ryo ryose.

Ni igitekerezo ahurizaho n’Umuyobozi w’Umudugudu wa Rwinyana, mu Murenge wa Gisozi, Hitimana Jean Marie Vianney, uvuga ko mu myaka 28 ishize u Rwanda rwateye imbere mu miyoborere.

Abayobozi ba Komisiyo y'Imiyoborere Myiza muri FPR Inkotanyi ku rwego rw'Umujyi wa Kigali biyemeje gukomeza gukurikirana ishyirwa mu bikorwa ry'imigabo n'imigambi y'umuryango
Prof Niyomugabo Cyprien yatangaje ko vuba aha mu Mujyi wa Kigali hazaba hari ishuri ryigisha amahame ya FPR Inkotanyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .