Muri inkingi y’umugabane wacu, ibyifuzo byanyu ni itegeko kuri twe- Madamu Jeannette Kagame abwira urubyiruko

Yanditswe na Ishimwe Israel
Kuya 25 Ugushyingo 2020 saa 09:17
Yasuwe :
0 0

Madamu Jeannette Kagame yagaragaje ko urubyiruko rw’abakobwa ari umusingi ukomeye ukwiye kubakirwaho iterambere ry’Umugabane wa Afurika binyuze mu kubahiriza uburenganzira bwabo.

Ni ubutumwa yatanze kuri uyu wa Gatatu mu kiganiro cyo ku rwego rwo hejuru cyagarutse ku ntambwe imaze guterwa muri gahunda yo kwimakaza ihame ry’uburinganire n’ubwuzuzanye izwi nka “Africa Young Women Beijing+25 Manifesto.”

Mu 2020 nibwo huzuye imyaka 25 hatangijwe urugendo rwa gahunda yubakiye ku nkingi 12 zirimo kurandura ivangura rikorerwa abagore, guteza imbere uburenganzira bwabo no kububakamo ubushobozi.

Uyu mwanzuro wafatiwe mu Nama Mpuzamahanga ya Kane yiga ku Iterambere ry’Abagore yabereye mu Mujyi wa Beijing mu 1995.

Ikiganiro cyabaye kuri uyu wa 25 Ugushyingo 2020 cyahuriranye no kwizihiza Umunsi Mpuzamahanga ugamije kurandura ihohoterwa rikorerwa abakobwa n’abagore.

Abacyitabiriye batanze ubutumwa bugaruka ku bikibangamira iterambere ry’abakobwa n’abagore n’umuti urambye kuri cyo.

Mu busabe bwabo, abagore bakiri bato basabye uburenganzira bungana ku kubona imirimo, kwigenga ku bukungu n’ibindi.

Madamu Jeannette Kagame yatangaje ko ibyuho bijyanye no kongerera ubushobozi abakobwa ku mugabane bidakwiye gukomeza kwirengagizwa.

Yagize ati “Hari ahakiri ibyuho bikeneye kwinjizwamo ubwenge bw’abato mu rugendo rwo kubaka ubukungu na politiki bihamye. Dukeneye umusanzu w’urubyiruko mu gukuraho imyumvire n’imyemerere ndetse tugomba guharanira kugaragaza ko uburinganire butaragerwaho.’’

Yavuze ko ibibazo bigaragazwa nk’ibibangamira iterambere ry’abakobwa bihuzwa n’ubukene, ubusumbane mu mahirwe bahabwa no guhezwa mu ifatwa ry’ibyemezo.

Yakomeje ati “Birababaza kubona iyo myemerere ishingiye ku muco igikomeje kwimakazwa muri bimwe mu bihugu byacu.’’

Ubushakashatsi bwakozwe n’Ishami ry’Umuryango w’Abibumbye rishinzwe Iterambere (UNDP) muri uyu mwaka yagaragaje ko 90% by’abagabo n’abagore bo mu bihugu 75 babona abagabo nk’abavamo abanyapolitiki beza mu gihe abarenga 40% basanga abagabo bavamo abashoramari beza kandi bakaba bafite amahirwe yo kubona akazi mu gihe kabaye gake.

Mu bihugu 13 byakorewemo ubushakashatsi , birimo ibigaragaza ko iyo myumvire iheza abakobwa iri hejuru kandi ikomeza gukura.

Ku Isi abagore bari mu kigero cy’imyaka 24-35, abangana na 35% babayeho mu bukene, mu gihe abagabo bihariye imyanya ingana na ¾ mu nteko zishinga Amategeko.

Madamu Jeannette Kagame yavuze ko ibiganiro bihuza ab’ingeri zitandukanye ari ingenzi cyane ndetse hari amasomo meza bisiga.

Ati “Dukeneye kwigira kuri mwe urubyiruko mu gukuraho iyi myumvire n’imico ndetse tugakomeza guharanira ko ihame ry’uburinganire n’ubwuzuzanye rigerwaho. Ni inshingano duhuriraho zo gushyiraho inzira iharuye ifasha abagore n’abakobwa gukoresha imbaraga n’ubushobozi mu buryo bungana.’’

- U Rwanda nk’urugero mu kwimakaza uburinganire mu iterambere ry’igihugu

Madamu Jeannette Kagame yavuze ko u Rwanda rwahisemo guteza imbere uburinganire no kubaka ubushobozi bw’umugore nk’inzira iganisha ku iterambere rirambye.

Ati “Ni igikorwa cyakozwe hashyizweho ubushake bwa politiki. Ibi byabaye moteri y’iterambere ku cyerekezo cy’igihugu n’impinduka zacyo.’’

U Rwanda rwageze kuri iyi ntambwe binyuze mu ishyirwaho ry’amategeko atandukanye, yiyongeraho Itegeko Nshinga rigena ko nibura 30% by’abagore bagomba kuba mu nzego zifata ibyemezo.

Kuri ubu, abagore bafite imyanya ingana na 50% muri Guverinoma, 60% bari mu Nteko Ishinga Amategeko, Umutwe w’Abadepite na 38% muri Sena.

Madamu Jeannette Kagame ashingiye ku inararibonye ry’u Rwanda yavuze ko hari ibyakorwa mu kwihutisha ihame ry’uburinganire.

Yakomeje ati “Ni inshingano zacu nk’ababyeyi, abakuru n’abafatanyabikorwa kubaha uburyo n’ubufasha bwatuma mutanga ibitekerezo byanyu. Tuzi neza ko dukeneye cyane ibitekerezo byanyu, inararibonye n’imitekerereze ishabukiye guhanga udushya.’’

“Turabakeneye mu gukora ubuvugizi bwo guteza imbere ishoramari n’indi mishinga itandukanye no gukoresha ikoranabuhanga no kwimakaza ibi biganiro mu gusangira amakuru akenewe. Muri inkingi y’umugabane wacu, ibyifuzo byanyu ni itegeko kuri twe.’’

U Rwanda rwashimwe ko rwahaye urubyiruko ijambo aho nibura 45% by’abakozi ba Leta bari munsi y’imyaka 35, mu gihe 79% bari munsi y’imyaka 45. Nibura 38% by’abakozi ba Leta bari munsi y’imyaka 30 ni abagore bato.

Ambasaderi w’Umuryango wa Afurika Yunze Ubumwe ushinzwe kurandura ikibazo cy’abana barongorwa bakiri bato, Nyaradzayi Gumbonzvanda, yashimangiye ko bikwiye ko abantu basuzuma intambwe yatewe mu kubaka ahazaza.

Yagize ati “Ibiganiro bihuza abantu b’ingeri zitandukanye barimo abayobozi, abagore n’urubyiruko bitanga amahirwe yo kwiga ku bisubizo bikwiye mu gutegura ahazaza.’’

Muri ibi biganiro byabaye mu gihe Isi ihanganye na COVID-19, abayobozi bakuru bagaragaje ko kwinjiza abato mu bibagenewe byoroshya ishyirwa mu bikorwa ryayo. Bagaragaje ko uburinganire ari ingenzi mu kurandura ihohoterwa no gucecekesha intwaro.

Kuri ubu, abakobwa barenga miliyoni 50 muri Afurika ntibashobora kugera mu ishuri kubera COVID-19.

Madamu Jeannette Kagame yagaragaje ko urubyiruko rw’abakobwa ari umusingi ukomeye ukwiye kubakirwaho iterambere ry’Umugabane wa Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .