Mureshyankwano Rose na Dr Havugimana mu batorewe kuba Abasenateri

Yanditswe na Habimana James
Kuya 16 Nzeri 2019 saa 06:13
Yasuwe :
0 0

Mureshyankwano Marie Rose wabaye Umudepite na Guverineri w’Intara y’Amajyepfo hamwe na Dr Havugimana Emmanuel wigisha muri Kaminuza y’u Rwanda; bari muri 12 batorewe kuba Abasenateri.

Kuri uyu wa Mbere tariki 16 Nzeri 2019, Abagize inama njyanama z’Uturere n’Imirenge hirya no hino mu gihugu, bazindukiye mu gikorwa cy’amatora y’Abasenateri bagomba gusimbura abagiyeho mu 2011.

Ni amatora yitabiriwe n’abakandida 63 bagombaga gutorwamo 12.

Duhereye mu Mujyi wa Kigali, hari hiyamamaje abasenateri bane hakenewemo umwe. Ntidendereza William wigeze kuba Meya w’Akarere ka Kicukuro ni we watowe ku majwi 60%, atsinze Mutimura Zeno wagize 18%, Butera John agira 14.5% na ho Rwakayiro Mpabuka Ignace agira 7.7%.

Mu Ntara y’Amajyaruguru hagombaga gutorwa babiri, hatsinze Dr. Laetitia Nyinawamwiza na Dr. Faustin Habineza.

Mu Ntara y’u Burengerazuba ho hagombaga gutorwamo batatu.

Mureshyankwano Marie Rose wigeze kuba Guverineri w’Intara y’Amajyepfo ndetse akaba yaranabaye umudepite yagize amajwi 68%, Dr Havugimana Emmanuel usanzwe ari umwarimu muri Kaminuza y’u Rwanda agira 56%, naho Dushimimana Lambert wabaye Perezida w’Inama Njyanama y’Akarere ka Rubavu agira amajwi 52%.

Mu Ntara y’Amajyepfo ho hagombaga gutorwamo batatu. Hatowe Umuhire Adrien, Nkurunziza Innocent na Uwera Pelagie.

Mu Ntara y’Iburasirazuba hagombaga gutorwamo batatu naho, hakaba hatowe Bideri John, Nsengiyumva Fulgence na Mupenzi George.

Nyuma y’amatora yabaye kuri uyu wa Mbere, hateganyijwe andi tariki 17 Nzeri yo gutora umusenateri mu barimu n’abashakashatsi uzahagararira amashuri makuru ya Leta, tariki 18 Nzeri hatorwe umusenateri mu barimu n’abashakashatsi uzahagararira amashuri makuru yigenga.

Sena y’u Rwanda igizwe n’abasenateri 26 barimo 12 batorwa bahagarariye intara enye z’igihugu n’Umujyi wa Kigali n’abasenateri umunani bashyirwaho na Perezida wa Repubulika, bane bashyirwaho n’Ihuriro ry’imitwe ya Politiki yemewe mu Rwanda na babiri bahagarariye amashuri makuru ya Leta n’ayigenga.

Mureshyankwano Marie Rose yatorewe kuba Umusenateri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza